រាជធានីភ្នំពេញ ៖ នារសៀលថ្ងៃទី៣ ខែកុម្ភៈ ឆ្នាំ២០២៦ ក្រសួងការងារ និងបណ្តុះបណ្តាលវិជ្ជាជីវៈ បានសហការ ជាមួយមន្ទីរពហុព្យាបាល សុខ…
រាជធានីភ្នំពេញ ៖ នារសៀលថ្ងៃទី៣ ខែកុម្ភៈ ឆ្នាំ២០២៦ ក្រសួងការងារ និងបណ្តុះបណ្តាលវិជ្ជាជីវៈ បានសហការ ជាមួយមន្ទីរពហុព្យាបាល សុខ រក្សា រៀបចំសិក្ខាសាលាផ្សព្វផ្សាយស្តីពី “ការកែប្រែរបៀបរស់នៅ ដើម្បីកាត់បន្ថយហានិភ័យជំងឺមហារីក” ក្នុងការលើកកម្ពស់ការយល់ដឹងផ្នែកសុខភាពជូនដល់បុគ្គលិក មន្ត្រីរាជការ សរុបប្រមាណជាង ៣០០នាក់ នៅទីស្តីការក្រសួង ។
ក្នុងឱកាសនោះ លោកវេជ្ជបណ្ឌិត ធូ សារ៉ាម៉េត ដែលជាអ្នកជំនាញឯកទេសវេជ្ជសាស្ត្រនុយក្លេអ៊ែរ ជំងឺពកក និងជំងឺមហារីក និងជានាយកប្រតិបត្តិផ្នែកវេជ្ជសាស្ត្រ នៃមន្ទីរពហុព្យាបាល សុខ រក្សា បានបង្ហាញយ៉ាងច្បាស់ ពីទំនាក់ទំនងរវាងទម្លាប់រស់នៅប្រចាំថ្ងៃ ដូចជាការហូបចុក ការរស់នៅ និងហ្សែន ដែលជាកត្តាចម្បងៗ ដែលជំរុញឱ្យកើតមានជំងឺមហារីក ។ លោកវេជ្ជបណ្ឌិតបានសង្កត់ធ្ងន់លើការរស់នៅបែបសុខភាព ដើម្បីបង្ការជំងឺរ៉ាំរ៉ៃផ្សេងៗ ជាពិសេសគឺសារសំខាន់នៃការពិនិត្យសុខភាពតាមដានឱ្យបានទាន់ពេលវេលា ឬការស្វែងរកមហារីក តាំងពីដំណាក់កាលដំបូងតាមរយៈបច្ចេកវិទ្យាទំនើប ជាជាងការរង់ចាំរហូតដល់មានរោគសញ្ញាឈឺទើបទៅព្យាបាល ។
សិក្ខាសាលានេះផ្តល់អត្ថប្រយោជន៍យ៉ាងសំខាន់ តាមរយៈអនុស្សរណៈយោគយល់គ្នា (MoU) រវាងក្រសួង និងមន្ទីរពហុព្យាបាល ដែលមានគោលបំណងលើកកម្ពស់សុខុមាលភាពសាធារណៈ និងអប់រំលើកកម្ពស់ ការយល់ដឹងអំពីសុខភាពទូទៅ ដើម្បីបង្កើនភាពងាយស្រួលដល់បុគ្គលិក មន្ត្រីរាជការ និងសមាជិកគ្រួសារ ក្នុងការទទួលបានសេវាថែទាំសុខភាពបន្ថែម ព្រមទាំងជួយសម្រាលបន្ទុកចំណាយលើការពិនិត្យកញ្ចប់សុខភាពទូទៅ បន្ទប់សម្រាកព្យាបាល ការថតរូបភាពវេជ្ជសាស្ត្រ ការធ្វើតេស្តមន្ទីរពិសោធន៍ និងការចាក់វ៉ាក់សាំងផ្សេងៗ ដែលកិច្ចសហការនេះបង្ហាញនូវការយកចិត្តទុកដាក់ខ្ពស់របស់ក្រសួង ចំពោះសុខុមាលភាពរបស់បុគ្គលិក មន្ត្រីរាជការ និងក្រុមគ្រួសារ និងជាពិសេសធានាឱ្យមន្ត្រីរាជការដែលជាអ្នកបម្រើសេវាសាធារណៈ មានសុខភាពមាំមួន ដើម្បីបន្តបំពេញភារកិច្ចផ្ដល់សេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់ ។
សូមបញ្ជាក់ថា មន្ទីរពហុព្យាបាល សុខ រក្សា គឺជាមជ្ឈមណ្ឌលវេជ្ជសាស្ត្រដែលបង្កើតឡើងដោយកូនខ្មែរ មានទីតាំងស្ថិតនៅខណ្ឌទួលគោក រាជធានីភ្នំពេញ មានផ្តល់សេវាថែទាំសុខភាពកម្រិតស្តង់ដាអន្តរជាតិ ជាពិសេសមានឯកទេសខ្ពស់ក្នុងការពិនិត្យ និងព្យាបាលជំងឺក្រពះ ពោះវៀន និងមហារីក ដោយប្រើប្រាស់បច្ចេកវិទ្យាទំនើប និងមានបទពិសោធច្បាស់លាស់ ផ្តល់នូវការព្យាបាលប្រកបដោយគុណភាព និងទំនុកចិត្តខ្ពស់បំផុតជូនដល់អ្នកជំងឺគ្រប់រូប ៕ អត្ថបទសហការ
ចែករំលែកព័តមាននេះ