រាជធានីភ្នំពេញ ៖ តបតាមការអញ្ជើញរបស់ព្រះមហាក្សត្រនៃព្រះរាជាណាចក្រកម្ពុជា ព្រះបាទសម្តេចព្រះបរមនាថ នរោត្តម សីហមុនី អគ្គលេខាធិការបក្សកុម្មុយនីស្តវៀតណាម លោក តូ ឡឹម…
រាជធានីភ្នំពេញ ៖ តបតាមការអញ្ជើញរបស់ព្រះមហាក្សត្រនៃព្រះរាជាណាចក្រកម្ពុជា ព្រះបាទសម្តេចព្រះបរមនាថ នរោត្តម សីហមុនី អគ្គលេខាធិការបក្សកុម្មុយនីស្តវៀតណាម លោក តូ ឡឹម នឹងដឹកនាំគណៈប្រតិភូជាន់ខ្ពស់នៃសាធារណរដ្ឋសង្គមនិយម វៀតណាម អញ្ជើញមកបំពេញទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា នាថ្ងៃទី ៦ ខែ កុម្ភៈ ឆ្នាំ ២០២៦ ។
កម្ពុជា និង វៀតណាម បានភ្ជាប់ទំនាក់ទំនងការទូតផ្លូវការនៅថ្ងៃទី ២៤ ខែ មិថុនា ឆ្នាំ ១៩៦៧។ ដំណើរទស្សនកិច្ចផ្លូវរដ្ឋនេះ ធ្វើឡើងចំពេលដែលទំនាក់ទំនងរវាងប្រទេសទាំងពីរ កម្ពុជា-វៀតណាម កាន់តែមានភាពល្អូកល្អឺនជាបន្តបន្ទាប់ ដោយភាគីទាំងពីរបន្តរក្សាបាននូវទំនាក់ទំនងកម្រិតខ្ពស់និងគ្រប់កម្រិត ទាំងក្នុងក្របខ័ណ្ឌទ្វេភាគីនិងនៅក្នុងវេទិកាពហុភាគី។ កិច្ចសហប្រតិបត្តិការរវាងបក្សនិងបក្ស បានដើរតួនាទីយ៉ាងសំខាន់បំផុក្នុងការកំណត់ទិសដៅនៃទំនាក់ទំនងរវាងប្រទេសទាំងពីរ។ កិច្ចសហប្រតិបត្តិការរវាងប្រទេសទាំងពីរបានបន្តអភិវឌ្ឍឥតឈប់ឈរ និងប្រកបដោយទំនុកចិត្ត នារយៈពេលចុងក្រោយនេះ ហើយចំណងមិត្តភាពរវាងថ្នាក់ដឹកនាំនិងប្រជាជននៃប្រទេសទាំងពីរកាន់តែមានភាពរឹងមាំ និងកាន់តែជិតស្និទ្ធ។
កិច្ចសហប្រតិបត្តិការលើវិស័យការពារជាតិនិងសន្តិសុខ នៅតែបន្តជាមូលដ្ឋានគ្រឹះដ៏សំខាន់ កាន់តែមានភាពជិតស្និទ្ធនិងប្រកបទៅដោយប្រសិទ្ធភាពកាន់តែខ្លាំងឡើង។ ភាគីទាំងពីរតែងតែបានអះអាងពីគោលការណ៍មិនអនុញ្ញាតឱ្យកងកម្លាំងអមិត្តណាមួយប្រើប្រាស់ទឹកដីនៃប្រទេសមួយដើម្បីបំផ្លិចបំផ្លាញសន្តិសុខរបស់ប្រទេសមួយទៀត។ ដោយផ្អែកលើសន្ធិសញ្ញា កិច្ចព្រមព្រៀង និងអនុសារណៈនៃការយោគយល់គ្នារបស់ថ្នាក់ដឹកនាំជាន់ខ្ពស់នៃប្រទេសទាំងពីរ ស្ថាប័នក៏ដូចជាអាជ្ញាធរពាក់ព័ន្ធ និងប្រជាជនដែលរស់នៅតាមតំបន់ជាប់ព្រំដែននៃប្រទេសទាំងពីរតែងតែសម្របសម្រួលគ្នាយ៉ាងសកម្មក្នុងការអនុវត្តកិច្ចការបោះបង្គោលខ័ណ្ឌសីមាព្រំដែនគោកនៃប្រទេសទាំងពីរ។ ភាគីទាំងពីរបានចុះហត្ថលេខាលើឯកសារផ្លូវច្បាប់ចំនួនពីរ ទទួលស្គាល់ការសម្រេចបាននូវការបោះបង្គោលខ័ណ្ឌសីមាចំនួន ៨៤% នៃព្រំដែនគោកកម្ពុជា-វៀតណាម ហើយកំពុងបន្តចរចាជាបន្តបន្ទាប់ដើម្បីឈានទៅសម្រេចឱ្យបានទាំងស្រុងនៃការបោះបង្គោលខ័ណ្ឌសីមាដែលនៅសល់ចំនួន ១៦% ឱ្យបានឆាប់ៗ។
កិច្ចសហប្រតិបត្តិការវិស័យពាណិជ្ជកម្ម វិនិយោគនិងទេសចរណ៍ គឺជាចំណុចដ៏ភ្លឺស្វាងនិងមានកំណើនប្រកបដោយស្ថិរភាព។ ការផ្លាស់ប្តូរពាណិជ្ជកម្មទ្វេភាគី មានការកើនឡើងដល់ ១១,៣៣ ពាន់លានដុល្លារអាម៉េរិកនៅក្នុង ២០២៥ គឺកើនឡើងជាង ១១,៧% បើធៀបនឹងឆ្នាំ២០២៤។ បច្ចុប្បន្ន វៀតណាមគឺជាដៃគូពាណិជ្ជកម្មធំបំផុតទីបីរបស់កម្ពុជា (បន្ទាប់ពីចិន និងសហរដ្ឋអាម៉េរិក) និងជាដៃគូពាណិជ្ជកម្មធំបំផុតនៅក្នុងតំបន់អាស៊ាន។ ភាគីទាំងពីរកំពុងសម្របសម្រួលយ៉ាងសកម្មដើម្បីឱ្យសម្រេចបានគោលដៅនៃការសម្រេចបាននូវពាណិជ្ជកម្មទ្វេភាគីចំនួន ២០ ពាន់លានដុល្លារអាម៉េរិកក្នុងពេលឆាប់ៗនេះ។
ទាក់ទងនឹងការវិនិយោគ បច្ចុប្បន្ន ប្រទេសវៀតណាម មានគម្រោងវិនិយោគសកម្មចំនួន ២២៩ នៅកម្ពុជា មានដើមទុនចុះបញ្ជីសរុបប្រមាណ ២,៩៤ ពាន់លានដុល្លារអាម៉េរិក ស្ថិតក្នុងចំណាត់ថ្នាក់លេខពីរក្នុងចំណោមប្រទេសចំនួន ៨៥ ដែល វៀតណាមបានដាក់ទុនវិនិយោគនៅបរទេស (បន្ទាប់ពីឡាវ) ហើយស្ថិតក្នុងចំណោមប្រទេសកំពូលទាំង ៥ ដែលដាក់ទុនវិនិយោគផ្ទាល់ច្រើនជាងគេនៅកម្ពុជា បន្ទាប់ពីចិន កូរ៉េខាងត្បូង សិង្ហបុរី និងជប៉ុន។
ក្នុងឆ្នាំ ២០២៥ ប្រទេសវៀតណាម ជាប្រទេសនាំមុខគេ ដែលមានភ្ញៀវទេសចរប្រមាណ ១,២ លាននាក់ចូលមកទស្សនាប្រទេសកម្ពុជា ជាប់ចំណាត់ថ្នាក់លេខមួយក្នុងចំណោមប្រទេសដែលមានភ្ញៀវទេសចរមកទស្សនាប្រទេសកម្ពុជាច្រើនជាងគេ ហើយវៀតណាមបានស្វាគមន៍ភ្ញៀវទេសចរកម្ពុជាជាង ៦០០,០០០ នាក់ ទៅទស្សនានៅប្រទេសជិតខាងមួយនេះ។
វិស័យនៃសហប្រតិបត្តិការផ្សេងទៀត ដូចជា អប់រំនិងបណ្តុះបណ្តាល ដឹកជញ្ជូន វប្បធម៌ សុខភាពនិងទូរគមនាគមន៍ ក៏កំពុងត្រូវបានលើកកម្ពស់យ៉ាងសកម្មផងដែរ។ ការផ្លាស់ប្តូរនិងកិច្ចសហប្រតិបត្តិការរវាងសមាគម និងអង្គការមហាជនត្រូវបានបន្តរក្សានិងបន្តលើកកម្ពស់ប្រកបដោយការច្នៃប្រឌិតថ្មី។
ប្រទេសទាំងពីរក៏បានសហការគ្នាយ៉ាងជិតស្និទ្ធ ទាំងនៅក្នុងវេទិកាអន្តរជាតិ តំបន់ និងអនុតំបន់ ជាពិសេសនៅក្នុងយន្តការអង្គការសហប្រជាជាតិ អាស៊ាននិងយន្តការដឹកនាំដោយអាស៊ាន យន្តការសហប្រតិបត្តិការអនុតំបន់មេគង្គ ដែលរួមចំណែកដល់ការលើកកម្ពស់កិត្យានុភាពនិងតួនាទីរបស់ប្រទេសនីមួយៗ នៅក្នុងតំបន់ និងនៅលើពិភពលោក។
ដំណើរទស្សនកិច្ចផ្លូវរដ្ឋមកកាន់ព្រះរាជាណាចក្រកម្ពុជា ធ្វើឡើងក្នុងក្របខ័ណ្ឌនៃដំណើរទស្សនកិច្ចក្រៅប្រទេសលើកដំបូងរបស់លោកអគ្គលេខាធិការបក្ស តូ ឡឹម បន្ទាប់ពីលោកត្រូវបានជ្រើសតាំងជាថ្មី ជាអគ្គលេខាធិការបក្សកុម្មុយនីស្ត វៀតណាម នៅក្នុងមហាសន្និបាតបក្សលើកទី១៤ ។ នេះក៏បានបង្ហាញអំពីសារៈសំខាន់របស់បក្ស និងរដ្ឋវៀតណាម ក៏ដូចជាក្នុងនាមលោកអគ្គលេខាធិការ តូ ឡឹម ផ្ទាល់ ក្នុងការភ្ជាប់និងលើកកម្ពស់ទំនាក់ទំនងយ៉ាងជិតស្និទ្ធ រវាងវៀតណាម និងកម្ពុជា។
ដំណើរទស្សនកិច្ចនេះក៏បានបង្ហាញពីការប្តេជ្ញាចិត្តខាងនយោបាយយ៉ាងមុតមាំបំផុត របស់ថ្នាក់ដឹកនាំជាន់ខ្ពស់របស់បក្សទាំងពីរ និងប្រទេសទាំងពីរ ក្នុងការអភិវឌ្ឍទំនាក់ទំនងទ្វេភាគី រវាងប្រទេសទាំងពីរឱ្យកាន់តែមានសារៈសំខាន់ មានប្រសិទ្ធភាព និងសមស្របទៅនឹងតម្រូវការនៃការអភិវឌ្ឍនិងផលប្រយោជន៍ជាយុទ្ធសាស្ត្ររយៈពេលវែងរបស់ប្រទេសនីមួយៗ។
នៅក្នុងដំណើរទស្សនកិច្ចនេះ លោកអគ្គលេខាធិការ តូ ឡឹម នឹងធ្វើជាសហប្រធាននៃកិច្ចប្រជុំកំពូល រវាងការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តវៀតណាម និងគណៈកម្មាធិការអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា ព្រមទាំងធ្វើជាសហប្រធាននៃកិច្ចប្រជុំរវាងប្រមុខបក្សនៃបក្សទាំង ៣ របស់វៀតណាម កម្ពុជា និងឡាវ នៅប្រទេសកម្ពុជា តបតាមការអញ្ជើញដ៏ខ្ពង់ខ្ពស់ពីសំណាក់សម្តេចតេជា ហ៊ុន សែន ប្រធានគណបក្សប្រជាជនកម្ពុជា ៕ (ដោយ ៖ លឹម វណ្ណារា) អត្ថបទសហការ
ចែករំលែកព័តមាននេះ