រាជធានីភ្នំពេញ ៖ អ្នកនាង ទូច ស្រីល័ក្ខ បានបង្ហាញអារម្មណ៍ក្តុកក្តួល និងរន្ធត់យ៉ាងខ្លាំង ក្រោយពេលដែលនាងបានទទួលដំណឹងថា តារាសម្តែងលោក យូ…
រាជធានីភ្នំពេញ ៖ អ្នកនាង ទូច ស្រីល័ក្ខ បានបង្ហាញអារម្មណ៍ក្តុកក្តួល និងរន្ធត់យ៉ាងខ្លាំង ក្រោយពេលដែលនាងបានទទួលដំណឹងថា តារាសម្តែងលោក យូ ឌីស្កូ ត្រូវបានក្រុមគ្រួសារបញ្ជូនទៅព្យាបាលបន្ទាន់នៅក្នុងប្រទេសឥណ្ឌា ដោយសារជាតិពុលឡើងខ្លាំង ។
អ្វីដែលធ្វើឲ្យនាងកាន់តែកាន់តែរន្ធត់ទៀតនោះ គឺនាងបានស្តាប់សំដីផ្ទាល់ពីលោកយូ ឌីស្កូ ថា ពេលនេះ លោកនៅសល់តែ៥០ភាគរយប៉ុណ្ណោះសម្រាប់ក្តីសង្ឃឹមចុងក្រោយ បន្ទាប់ពីជំងឺរបស់លោកបានរើឡើងជាថ្មីឡើងវិញនាពេលនេះ ។
ជាមួយរូបភាពតារាសម្តែងលោក យូ ឌីស្កូ កំពុងសម្រាកព្យាបាលនៅលើគ្រែក្នុងមន្ទីរពេទ្យ តារាចម្រៀងអ្នកនាង ទូច ស្រីល័ក្ខ បានភ្ជាប់ជាមួយនឹងសំណេរបង្ហោះលើបណ្តាញសង្គមថា អារម្មណ៍របស់ខ្ញុំក្តុកក្តួលណាស់មួយយប់គេងមិនលក់ ដោយសារបានដឹងថា បងយូឌីស្កូត្រូវបញ្ចូលទៅប្រទេសឥណ្ឌាបន្ទាន់ ដោយសារជាតិពុលឡើងខ្លាំងកំរិតធ្ងន់ ។
អ្នកនាងបន្តថា សំលេងបងបានប្រាប់ថា ល័ក្ខអូនបងគ្មានអ្វីទៀតទេ សល់តែ៥០ភាគរយនៃក្តីសង្ឃឹមនៅពេលនេះ🥹 ។ ខ្ញុំមិនអាចឈរមើលបងដោយដង្ហើមហត់មួយនេះបានទេ😔 ខ្ញុំនឹងលើកដៃសុំពីមិត្តភ័ក្តិ និងរាប់អានខ្ញុំដូចគ្នាអោយជួយសង្គ្រោះបងម្នាក់តិចៗ🙏 ។ នាងបញ្ជាក់ថា សំលេងយំរបស់បងកំពុងដក់ក្នុងខួរក្បាលរបស់ខ្ញុំ ហើយពាក្យថា ជួយបងផងអូន ។
គួរបញ្ជាក់ថា តារាសម្តែងលោកយូឌីស្កូ បានធ្លាក់ខ្លួនឈឺតាំងពីអំឡុងចុងឆ្នាំ២០១៧ ដោយសារលោកកើតមានជំងឺជាច្រើនស្ថិតក្នុងកម្រិតធ្ងន់ធ្ងររួមមានក្រលៀន ទឹកនោមប្រៃ និងឈាមសឡើងខ្ពស់នោះ ប៉ុន្តែជាភ័ព្វសំណាង លោកបានទទួលការវះកាត់ដោយជោគជ័យក្នុងការប្តូរក្រលៀននៅប្រទេសឥណ្ឌា ។
កន្លងមក អ្នកនាង ទូច ស្រីល័ក្ខ ធ្លាប់បានគូសបញ្ជាក់ថា សម្រាប់ថវិការក្នុងការចំណាយព្យាលបាលរបស់លោក យូ ឌីស្កូ ទាំងអស់ នៅឯមន្ទីរពេទ្យប្រទេសឥណ្ឌា គឺសរុបជាទឹកប្រាក់ជិត៧ម៉ឺនដុល្លារ ក្នុងនោះ ថវិកាមួយចំនួនធំគឺបានមកពីជំនួយឧបត្ថម្ភដ៏ខ្ពស់ខ្ពស់របស់សម្តេចទាំង២ និងមួយចំនួយទៀតបានពីសមាគមន៍សិល្បៈករខ្មែរ ហើយនឹងការប្រមូលបានពីការប្រគំតន្ត្រីសប្បុរសពីមិត្តរួមអាជីពលោក៣នាក់មានរូបអ្នកនាងផ្ទាល់ តារាចម្រៀងលោក អៀម វន្នី និងតារាសម្តែងលោក ប៉ែន ចំរ៉ុង ។
យ៉ាងណាបើតាមអ្នកនាង ស្រីលក្ខ៍ បើទោះបីពេលនេះលោក យូ ឌីស្កូ បានជោគជ័យក្នុងការព្យាបាលក៏ដោយតែលោកនៅតែត្រូវការចាំបាច់រាល់ការឈឺឆ្អាលរបស់បងប្អូន ព្រោះលោកត្រូវការសម្រសករយៈពេលវែង ដើម្បីថែទាំសុខភាពឲ្យដូចដើម ណាមួយលោកត្រូវការថវិកាចំណាយថ្នាំរាល់៦ខែម្តង ព្រោះរបស់របរមានផ្ទាល់ខ្លួននិងឡានលោកបានលក់ឡៃឡុងមើលជំងឺអស់ហើយ ។
គិតមកមកទល់ពេលនេះ មានរយៈជាង៧ឆ្នាំមកហើយដែលតារាសម្តែងលោក យូ ឌីស្កូ បានវះកាត់ប្តូរក្រលៀនបានជោគជ័យ ដោយទើបតែពេលថ្មីៗនេះប៉ុណ្ណោះ ស្ថានភាពជំងឺរបស់លោកបានរើឡើងជាថ្មីឡើងវិញ ទើបក្រុមគ្រួសារបញ្ជូនលោកទៅសម្រាកព្យាបាលនៅក្នុងប្រទេសឥណ្ឌាជាថ្មីម្តងទៀត ។
ក្នុងអំឡុងពេលសម្រាកព្យាបាលនៅក្នុងប្រទេសឥណ្ឌានាពេលនេះលោក យូ ឌីស្កូ បានបង្ហោះរូបភាពរបស់ខ្លួនដែលកំពុងសម្រាកព្យាបាលនៅលើគ្រែដោយអមជាមួយនឹងសំណេរខ្លីថា ជីវិតព្យាបាលជំងឺតែម្នាក់ឯង នៅប្រទេសឥណ្ឌាពិតជាកំសត់ខ្លួនណាស់ ៕
ចែករំលែកព័តមាននេះ