ខេត្តរតនគិរី ៖ ទឹកបឹងយក្សឡោម ប្រែពីថ្លា ទៅជាល្អក់ ជាលើកទី៣ហើយ។ ការប្រែប្រួលទឹកបឹងយក្យឡោមពីថ្លាមកល្អក់នេះ បានកើតឡើងចាប់តាំងពីថ្ងៃទី២១ ខែមករា ឆ្នាំ២០២៦មក…
ខេត្តរតនគិរី ៖ ទឹកបឹងយក្សឡោម ប្រែពីថ្លា ទៅជាល្អក់ ជាលើកទី៣ហើយ។ ការប្រែប្រួលទឹកបឹងយក្យឡោមពីថ្លាមកល្អក់នេះ បានកើតឡើងចាប់តាំងពីថ្ងៃទី២១ ខែមករា ឆ្នាំ២០២៦មក បង្កឲ្យមានការភ្ញាក់ផ្អើលដល់ប្រជាពលរដ្ឋ ភ្ញៀវទេសចរណ៍ជាតិ អន្តរជាតិ និងមន្ត្រីរាជការទូទាំងខេត្ត ។
លោក វ៉េន ចិក អនុប្រធានរមណីយដ្ឋានបឹងយក្សឡោម នៅព្រឹកថ្ងៃទី២៦ មករា ២០២៦ បានឲ្យអ្នកយកព័ត៌មានដឹងថា ករណីទឹកបឹងយក្សឡោម ជាបាតុភូតធម្មជាតិ ប្រែពីថ្លាមកល្អក់ជាលើកទី៣ រួចមកហើយ រួមមាន៖
លើកទី១ ៖ កើតឡើងនៅក្នុងឆ្នាំ១៩៩៩
លើកទី២ ៖ កើតឡើងនៅក្នុងឆ្នាំ២០១១
លើកទី៣ ៖ កើតឡើងនៅក្នុងឆ្នាំ២០២៦នេះ ។
លោកបន្តថា កាលឆ្នាំ១៩៩៩ បាតតុភូតធម្មជាតិ កើតឡើងគួរឲ្យភ័យខ្លាចបំផុត ដោយសង្កេតឃើញមានបច្ឆាទាំងតូចទាំងធំងាប់រាយប៉ាយអណ្តែតព្រោងព្រាតនៅលើផ្ទៃទឹកបឹងនោះតែម្តង។ ដោយឡែក មកដល់ឆ្នាំ២០១១ បាតុភូតនេះ បានកើតមកម្តងទៀត ពោលគឺរយៈពេល១២ឆ្នាំ។
រហូតមកដល់ឆ្នាំ២០២៦នេះ បាតុភូតធម្មជាតិ មានរយៈពេល១៥ឆ្នាំ កើតឡើងទៀត ប៉ុន្តែមិនឃើញមានបច្ឆាងាប់ច្រើន នោះទេ ។
លោកបញ្ជាក់ថា ក្រោយបាតុភូតធ្មជាតិកើតឡើងបែបនេះ តាមការយល់ឃើញតាមជំនឿ និងជាប្រពៃណីទំនៀមទម្លាប់នោះ លោកថា វាជាប្រផ្នូល មិនសូវល្អ ចំពោះប្រទេសជាតិ ឬនៅក្នុងសហគមន៍នោះឡើយ ។
ទាក់ទងនឹងបឹងយក្សឡោម ដែលប្រែពីថ្លា មកល្អក់ខុសធម្មតា លោក ព្រីម សំបូរ អនុប្រធានមន្ទីរបរិស្ថានខេត្ត នៅរសៀលថ្ងៃទី២៦ មករានេះ បានបញ្ចាក់ថា ខាងក្រុមបច្ចេកទេសជំនាញបរិស្ថានខេត្តរតនគិរី បានយកសំណាក់មកពិនិត្យនៅមន្ទីរពិសោធន៍ហើយ ប៉ុន្តែលទ្ធផលមិនទាន់ដឹងទេ ប្រហែលជា១សប្តាហ៍ អាចដឹងលទ្ឋផល ។ ករណីបាតុភូតធម្មជាតិកើតឡើងក្នុងឆ្នាំ២០២៦នេះ ចំពោះផលប៉ះពាល់ដល់ហ្វូងបច្ឆា ដូចជាពុំទាន់មាននោះទេ ។
បឹងយក្សឡោមជារមណីដ្ឋានធម្មជាតិ ដ៏ស្រស់ផូរផង់ ស្ថិតនៅក្នុងភូមិឡូន សង្កាត់យក្សឡោម ក្រុងបានលុង ខេត្តរតនគិរី ។ បច្ចុប្បន្នរមណីដ្ឋានធម្មជាតិមួយនេះ បានទាក់ទាញភ្ញៀវទេសចរណ៍ជាតិ អន្តរជាតិមកទស្សនាកម្សាន្តគ្រប់រដូវកាល ៕
ចែករំលែកព័តមាននេះ