រាជធានីភ្នំពេញ ៖ បេក្ខភាពបវរកញ្ញានាង ពេជ្រ វត្តីសារ៉ាវឌ្ឍី បានបង្ហាញគម្រោងដ៏ពិសេសមួយ ដោយនាងនឹងធ្វើជាមាតិកាផ្សព្វផ្សាយ (Content Catwalk) តាមរយៈការដើរម៉ូត…
រាជធានីភ្នំពេញ ៖ បេក្ខភាពបវរកញ្ញានាង ពេជ្រ វត្តីសារ៉ាវឌ្ឍី បានបង្ហាញគម្រោងដ៏ពិសេសមួយ ដោយនាងនឹងធ្វើជាមាតិកាផ្សព្វផ្សាយ (Content Catwalk) តាមរយៈការដើរម៉ូត និងទម្រង់បែបបវរកញ្ញា ក្នុងគោលបំណងចូលរួមផ្សព្វផ្សាយតំបន់ទេសចរណ៍តាមបណ្តាខេត្ត-ក្រុងទាំងអស់នៅទូទាំងប្រទេសកម្ពុជា ។
ការផ្តើមផ្តួចពីតារាស្រីរូបនេះបានធ្វើឡើង បន្ទាប់ពីនាងទទួលបានជោគជ័យ ជាមួយការចាប់អារម្មណ៍ និងការគាំទ្រយ៉ាងច្រើនពីមហាជន បន្ទាប់ពីនាងបានរៀបចំ Content Catwalk នេះ ដោយការស្លៀកពាក់បែបបុរាណខ្មែរដើរបង្ហាញភ្ញៀវជាតិ និងអន្តរជាតិនៅតាមប្រាសាទនានាលើទឹកដីអង្គរនៃខេត្តសៀមរាប ។
យ៉ាងណា ដើម្បីសម្រេចគោលដៅមួយនេះ ពេជ្រ វត្តីសារ៉ាវឌ្ឍី បានស្នើឲ្យមានការគាំទ្រពីសំណាក់បងប្អូនទាំងអស់ ជាពិសេស បណ្តាអ្នកគាំទ្រ ដ្បិតក្នុងកម្មវិធីនេះ នាងក៏មានឆ្លៀតឱកាសចូលរួមធ្វើការងារសប្បុរសធម៌នានាផងដែរ ។
បើតាមការបញ្ជាក់ពីតារសម្តែងនាង ពេជ្រ វត្តីសារ៉ាវឌ្ឍី តាមរយៈសំណេរបង្ហោះលើ
បណ្តាញសង្គមបានឲ្យដឹងថា គាំទ្រទេបងប្អូនទាំងអស់គ្នា? ប្រសិនបើនាងខ្ញុំធ្វើ Content Catwalk តាមបណ្តាខេត្ត-ក្រុងទាំង25របស់យើង ចូលរួមផ្សព្វផ្សាយពីតំបន់ទេសចរណ៍ក្នុងទម្រង់បែប Queen ផង បែប Fashion ផង គិតមិចដែរ? 👠តែដំណើរមួយនេះមិនត្រឹមតែ Promote សក្តានុពលតាមបណ្តាខេត្ត-ក្រុងប៉ុណ្ណោះទេ តែនាងខ្ញុំនឹងឆ្លៀតឱកាសចូលរួមធ្វើសប្បុរសធម៌ជួយដល់សង្គមនិងក្មេងៗតាមមណ្ឌលកុមារកំព្រាផងដែរ 🙏🤍 ។
តាមរយៈការបង្ហោះសំណេរខាងលើនេះ គេឃើញមានមហាជនជាច្រើនបានចូលទៅធ្វើការខមមិន ដោយម្នាក់ៗបានសម្តែងការគាំទ្រនូវគំនិតផ្តួចផ្តើមរបស់ ពេជ្រ វត្តីសារ៉ាវឌ្ឍី នាពេលនេះ ដ្បិតវាជារឿងមួយដ៏ល្អ ក្នុងន័យចូលរួមផ្សព្វផ្សាយសិល្បៈវប្បធម៌ និងតំបន់ទេសចរណ៍ក្នុងប្រទេសកម្ពុជា ។
ជាការកត់សម្គាល់ កាលពីពេលថ្មីៗ ពេជ្រ វត្តីសារ៉ាវឌ្ឍី និងតារាម៉ូដែលកូនកាត់នាង Mélia Constantin បានរួមគ្នាថតតុបតែងបែបបុរាណ ក្នុងសម្លៀកបំពាក់ខ្មែរ ស្ថិតនៅក្នុងសម័យឧត្តុង្គ ដែលមានស្បៃអង្កាញ់វែង និងសំពត់ចងក្បិន ថតនៅទីតាំងបរិវេណប្រាសាទបុរាណខ្មែរនាទឹកដីខេត្តសៀមរាប ។
សកម្មភាពរបស់ ពេជ្រ វត្តីសារ៉ាវឌ្ឍី និងកូនខ្មែរកាត់បារាំង Mélia Constantin ទទួលបានការចាប់អារម្មណ៍ខ្លាំង ដោយក្នុងអំឡុងពេលថតនៅបរិវេណប្រាសាទអង្គរវត្ត ទាំងភ្ញៀវទេសចរជាតិ និងអន្តរជាតិ ក៏បានសុំថតរូបជាមួយអ្នកទាំងពីរផងដែរ ។ ចំណែករូបភាពរបស់អ្នកទាំងពីរដែលបានផ្សព្វផ្សាយនៅលើបណ្តាញសង្គមនោះក៏ទទួលការចាប់អារម្មណ៍ និងបន្តចែកចាយយ៉ាងច្រើនផងដែរ ។
ជាមួយនឹងរូបភាពទាំងអស់នោះ ពេជ្រ វត្តីសារ៉ាវឌ្ឍី ក៏បានភ្ជាប់សំណេរខ្លីថា កុលធីតាខ្មែរ អមជាមួយទស្សនីយ៏ភាពនៃអច្ឆរិយៈវត្ថុដ៏មហស្ចារ្យរបស់មនុស្សជាតិក្នុងពិភពលោកនោះគឺ «ប្រាសាទអង្គរវត្ត» ស្ថិតនៅក្នុងទឹកដីខេត្តសៀមរាប ប្រទេសកម្ពុជាយើង ៕
ចែករំលែកព័តមាននេះ