រាជធានីភ្នំពេញ ៖ នៅទីបំផុត តារាពហុជំនាញ អ្នកនាង ខាត់ សុឃីម បានចេញមុខបកស្រាយហើយជុំវិញព័ត៌មានក្លែងក្លាយមួយ ដែលបានបង្ហោះលើបណ្តាញសង្គមហ្វេសប៊ុករឿងថ្នាក់ដឹកនាំព្រមានចាប់រូបនាងដាក់គុក ប្រសិនបើនាងបង្កភាពវឹកវរក្នុងសង្គម…
រាជធានីភ្នំពេញ ៖ នៅទីបំផុត តារាពហុជំនាញ អ្នកនាង ខាត់ សុឃីម បានចេញមុខបកស្រាយហើយជុំវិញព័ត៌មានក្លែងក្លាយមួយ ដែលបានបង្ហោះលើបណ្តាញសង្គមហ្វេសប៊ុករឿងថ្នាក់ដឹកនាំព្រមានចាប់រូបនាងដាក់គុក ប្រសិនបើនាងបង្កភាពវឹកវរក្នុងសង្គម ។
ព័ត៌មានខាងលើនេះ បានធ្វើឲ្យមហាជន ជាពិសេស បណ្តាអ្នកលេងបណ្តាញសង្គមមានការភ្ញាក់ផ្អើលយ៉ាងខ្លាំង រហូតមានប្រិយមិត្តគាំទ្ររូបនាងជាច្រើនបានទាក់ទងសាកសួរអ្នកនាង ខាត់ សុឃីម ដោយផ្ទាល់ដោយសារបារម្ភពីសុខទុក្ខ និងសុវត្ថិភាព ។ យ៉ាងណា ជុំវិញរឿងរ៉ាវខាងលើនេះ ត្រូវបានអ្នកនាង ខាត់ សុឃីម ចេញមុខបកស្រាយហើយ ដោយនៅក្នុងនោះអ្នកនាងស្នើឲ្យមហាជនកុំឱ្យមានការភាន់ច្រឡំចំពោះបញ្ហានេះ ខណៈពេលដែលនាងមិនមានអ្វីកើតឡើង ដូចការផ្សព្វផ្សាយនូវព័ត៌មានក្លែងក្លាយនេះឡើយ ។
តាមរយៈវីដេអូដែលបានបង្ហោះលើបណ្តាញសង្គមអ្នកនាង ខាត់ សុឃីម បានលើកឡើងថា កន្លងមក អ្នកនាងបានបង្ហោះសំណេរមួយដែលយើងបង្ហាញពីការឈឺចាប់ចំពោះ ការឈ្លានពានរបស់សៀមមកលើប្រទេសរបស់យើង ។ អ្នកនាងថា ជាចៃដន្យនាងបានបាត់គណនីហ្វេសប៊ុករបស់ខ្ញុំ នៅពេលបង្ហោះសំណេរនេះ ប៉ុន្តែជាភព្វសំណាងនាងក៏យកបានមកវិញ ហើយក៏មានបងប្អូនមួយចំនួនឆាតមកសួរខ្ញុំដោយមានការយល់ច្រឡំចំពោះរឿងនេះ ។
អ្នកនាងបញ្ជាក់ថា តាមពិត អ្នកនាងផុសនោះជាទូទៅទេ ប៉ុន្តែមានអ្នកយកទៅកាត់តជាមួយឈ្មោះសារព័ត៌មានក្នុងស្រុកមួយ ដោយដាក់ចំណងជើងថា «សម្តេចតេជោព្រមានអ្នកនាង ខាត់ សុឃីម កុំឲ្យញុះញង់ បង្កភាពវឹកវរក្នុងសង្គម បើមិនចង់ជាប់គុក» ។ នាងបន្តថា ការផ្សព្វផ្សាយព័ត៌មានខាងលើនេះ បានកើតឡើង បន្ទាប់បីនាងបានបង្ហោះសំណេរថា ចូរយើងជាខ្មែរទាំងអស់គ្នា រួមគ្នាបង្ហោះសារក្រោមចំណងជើងថា «ថៃឈ្លានពានកម្ពុជា» ឲ្យបានជាង១៧លានដង ។
ការបង្ហោះនេះ ដោយសារនាងបានឃើញមានមហាជនជាច្រើនបានបង្ហោះដូចគ្នានេះដែរ ហើយដោយសារសំណេរនេះហើយធ្វើឲ្យមានអ្នកយកទៅលាបពណ៌មកលើរូបនាង ។ នាងថា ខ្ញុំចង់ជម្រាបប្រាប់បងប្អូនចំពោះរឿងនេះ ខ្ញុំមិនមានការព្រួយបារម្ភ ហើយមិនមានរឿងអ្វីកើតឡើងឡើយ ក្នុងពេលដែលសម្តេចពុក (សម្តេចតេជោ) មិនបានមកគំរាមកំហែង ឬមួយដាក់សម្ពាធមកលើរូបនាងនោះដែរ នេះខ្ញុំនិយាយតាមត្រង់ ។
នាងបញ្ជាក់ថា តាំងពីតូចដល់ធំ គឺអ្នកនាងបម្រើអារម្មណ៍បងប្អូនទូទៅ ហើយការលាបពណ៌នេះ គឺវាធ្ងន់ធ្ងរណាស់ ព្រោះមិនត្រឹមតែរូបនាងទេ តែប៉ះពាល់ដល់ថ្នាក់ដឹកនាំ ហេតុនេះ អ្នកនាងស្នើមហាជនកុំមានការភាន់ច្រឡំ ហើយនាំឲ្យមានបែកបាក់សាមគ្គី ។
បើតាមអ្នកនាង ខាត់ សុឃីម ចាប់តាំងពីមានការឈ្លានពានមក អ្នកនាងបានឃើញមកប្អូនយើងមានការរួមសាមគ្គីគ្នាយ៉ាងខ្លាំង ដែលបង្ហាញឲ្យនាងឃើញថា ប្រជាជនយើងមានគ្នាតែ១៧លាននាក់មែន ប៉ុន្តែយើងបានសាមគ្គីគ្នាបានយ៉ាងល្អ និងជឿជាក់លើថ្នាក់ដឹកនាំរបស់យើង ៕
ចែករំលែកព័តមាននេះ