ខេត្តព្រៃវែង ៖ រដូវទឹកសម្រកប្រជាពលរដ្ឋរស់នៅក្នុងភូមិព្រែករាំង ឃុំបន្លិចប្រាសាទ ស្រុកពាមរក៍ ខេត្តព្រៃវែង បន្ទាប់ទំនេរពីការបង្កបង្កើនផលដំណាំស្រូវ ជារៀងរាល់ឆ្នាំពួកគាត់តែងតែឆ្លៀតពេលនាំគ្នាមកបង់សំណាញ់រកត្រីត្រង់ចំណុចអូស្ពានព្រែករាំង ដើម្បីលើកស្ទួយជីវភាពគ្រួសារបន្ថែម ប៉ុន្តែបែរជាមានបុគ្គលម្នាក់ឈ្មោះ…
ខេត្តព្រៃវែង ៖ រដូវទឹកសម្រកប្រជាពលរដ្ឋរស់នៅក្នុងភូមិព្រែករាំង ឃុំបន្លិចប្រាសាទ ស្រុកពាមរក៍ ខេត្តព្រៃវែង បន្ទាប់ទំនេរពីការបង្កបង្កើនផលដំណាំស្រូវ ជារៀងរាល់ឆ្នាំពួកគាត់តែងតែឆ្លៀតពេលនាំគ្នាមកបង់សំណាញ់រកត្រីត្រង់ចំណុចអូស្ពានព្រែករាំង ដើម្បីលើកស្ទួយជីវភាពគ្រួសារបន្ថែម ប៉ុន្តែបែរជាមានបុគ្គលម្នាក់ឈ្មោះ គង់ កីឡា ធ្វើជាប្រជាការពារភូមិ និងត្រូវជាក្មួយរបស់លោកមេភូមិព្រែករាំង មករាយរបាំងព្រួលដាក់ឡុកស្បៃមុងបិតជិតខាងមុខអូរពីត្រើយម្ខាងទៅត្រើយម្ខាងចម្ងាយប្រវែងប្រហែល ២០០ម៉ែត្រ ធ្វើអោយពួកគាត់ជួបការលំបាក់បង់ត្រីមិនបាន ។
ពលរដ្ឋបានលើកឡើងប្រហាក់ប្រហែលគ្នាថា ពួកគាត់បន្ទាប់ទំនេរពីការធ្វើស្រូវទឹកសម្រក ក៍នាំគ្នាឆ្លៀតពេលមកបង់សំណាញ់រកត្រី ដើម្បីលើកស្ទួយជីវភាពគ្រួសារបន្ថែម ។ ពលរដ្ឋបន្តថា កាលពីមុនពួកគាត់បង់សំណាញ់បានត្រីក្នុង ១ថ្ងៃចាប់ពី ២០ទៅ ៣០គីឡូត្រីឯណោះ តែចាប់តាំងពីមានបុគ្គលឈ្មោះ គង់ កីឡា នេះមករាយរបាំងដាក់ឡុកស្បៃមុងកាត់មុខមាត់លូមក ធ្វើអោយពួកគាត់ជួបការលំបាកក្នុងការបង់សំណាញ់មិនបានត្រីដូចមុន ដោយក្នុង ១ថ្ងៃបានត្រឹម ៤ទៅ ៥គីឡូតែប៉ុណ្ណោះ ។
ពលរដ្ឋបញ្ជាក់បន្ថែមថា បញ្ហានេះពួកគាត់ក៏ធ្លាប់បានជំរាបជូនទៅភូមិ ឃុំ នឹងប៉ូលិសប៉ុស្តិ៍រដ្ឋបាលចុះមកពិនិត្យមើល និងអនុញាតអោយពលរដ្ឋចុះរុះរើដោយខ្លួនឯងដែរ ។ តែក្រោយពីអាជ្ញាធរសមត្ថកិច្ចចេញទៅផុត បែរជាបុគ្គលឈ្មោះ គង់ កីឡា មកសួររកមុខអ្នករុះរើរបាំងព្រួលស្បៃមុងគាត់ នឹងគំរាមប្តឹងពលរដ្ឋព្រមទាំងពោលពាក្យដាក់ពលរដ្ឋថា ប្រយ័ត្នគាត់បោះបង្គោលពីខាងមុខលូ«កន្លែងពលរដ្ឋបង់សំណាញ់» ហើយយកប្រឡាលួសមករាយខានបង់សំណាញ់ទៅ ។
ប្រជាពលរដ្ឋសូមសំណូមពរដល់អាជ្ញាធរ សមត្ថកិច្ចមន្ត្រីជំនាញជលផលស្រុក-ខេត្ត មេត្តាជួយអន្តរាគមន៍អោយបុគ្គលម្នាក់នេះ បើមិនបានបើកទាំងអស់ សុំបើកត្រឹមតែ ៣ ទៅ៤ ម៉ែត្រក៏បានដែរ ដើម្បីអោយពួកគាត់រកនេសាទត្រីជាលក្ខណៈគ្រួសារបានខ្លះគ្រាន់ចិញ្ចឹមជីវិតប្រចាំថ្ងៃអោយកូនចៅបានទៅរៀនសូត្រហ្នឹងគេ ។
ជុំវិញបញ្ហានេះអង្គភាពសារព័ត៌មានក៍បានព្យាយាមសុំការបកស្រាយបំភ្លឺពីអាជ្ញាធរមន្ត្រីជំនាញ និងបុគ្គលឈ្មោះ គង់ កីឡា ដែរ តែមិនអាចទំនាក់ទំនងបាន ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ