ខេត្តកំពង់ស្ពឺ ៖ រដ្ឋបាលខេត្តកំពង់ស្ពឺ បានរៀបចំបង្កើតគណៈកម្មការចំរុះថ្នាក់ខេត្ត ចុះពិនិត្យស្រាវជ្រាវ និងធ្វើបច្ចុប្បន្នភាព លើដីដែលពលរដ្ឋកំពុងអាស្រ័យផល នៅក្នុងផ្ទៃអាងទឹក ស្ថិតក្នុងឃុំពោធិ៍ ម្រាល…
ខេត្តកំពង់ស្ពឺ ៖ រដ្ឋបាលខេត្តកំពង់ស្ពឺ បានរៀបចំបង្កើតគណៈកម្មការចំរុះថ្នាក់ខេត្ត ចុះពិនិត្យស្រាវជ្រាវ និងធ្វើបច្ចុប្បន្នភាព លើដីដែលពលរដ្ឋកំពុងអាស្រ័យផល នៅក្នុងផ្ទៃអាងទឹក ស្ថិតក្នុងឃុំពោធិ៍ ម្រាល ស្រុកបសេដ្ឋ ដែលគ្រប់គ្រងដោយមន្ទីរធនធានទឹក។ នេះបើយោងតាមការលើកឡើងរបស់លោក ជេត ដុំ នាយករងរដ្ឋបាលសាលាខេត្តកំពង់ស្ពឺ ក្នុងអង្គប្រជុំពិភាក្សាលើសំណើរសុំវាស់វែង និងចុះបញ្ជីដីជូនប្រជាពលរដ្ឋ១៥៦គ្រួសារ នៅភូមិតាដែងថ្មី ភូមិតាដែងចាស់ និងភូមិតានួន ស្ថិតក្នុងឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ ថ្ងៃទី១០ ខែកក្កដា ឆ្នាំ២០២៥។
លោក ជេត ដុំ បានលើកឡើងថា អភិបាលខេត្តកំពង់ស្ពឺ ជាប្រធានគណៈកម្មាធិការគ្រប់គ្រងដីរដ្ឋ និងជាប្រធានគណៈកម្មាធិការដោះស្រាយវិវាទដីធ្លីថ្នាក់ខេត្ត លោក ជាម ច័ន្ទសោភ័ណ បានជម្រុញឱ្យមានការដោះស្រាយពីគ្រប់ភាគីពាក់ព័ន្ធ ដើម្បីឱ្យពលរដ្ឋមានលទ្ធភាពគ្រប់គ្រាន់ក្នុងការទទួលបានសិទ្ធិស្របច្បាប់ ក្នុងការគ្រប់គ្រង និងអាស្រ័យផល។ ប៉ុន្តែទន្ទឹមនឹងការប្រគល់នេះ អាជ្ញាធរ និងមន្ទីរអង្គភាពពាក់ព័ន្ធទាំងអស់ ត្រូវតែសិក្សាស្រាវជ្រាវ និងចុះឱ្យដល់មូលដ្ឋានឬដីដែលអាស្រ័យផលជាក់ស្តែង ដើម្បីរកឃើញអ្នកគ្រប់គ្រងអាស្រ័យផលពិតប្រាកដ និងអ្នកដែលមានតែឈ្មោះហើយមិនបានធ្វើអ្វីសោះ។
លោកនាយករងរដ្ឋបាល បានគូសបញ្ជាក់ថា ស្ថិតិពលរដ្ឋដែលសុំឱ្យរដ្ឋបាលខេត្តកំពង់ស្ពឺ កំណត់ព្រំអាងទឹក ហើយកាត់ឆ្វៀលដីប្រគល់ឱ្យពលរដ្ឋ មានរហូតដល់១៥៦គ្រួសារ។ តាមការអះអាងថា ដីដែលពួកខ្លួនបាននិងកំពុងអាស្រ័យផល គឺបានមកពីឪពុកម្តាយចែកឱ្យ និងខ្លះទៀតបានពីរដ្ឋចែកឱ្យ ដោយក្នុងនោះ អាជ្ញាធរឃុំ ក៏បានបញ្ជាក់ថា ពួកគាត់កាន់កាប់អាស្រ័យផលតាំងពីឆ្នាំ ១៩៨៦-១៩៨៧ មកម្ល៉េះ ហើយដីនេះ គឺជាដីសាមគ្គី មិនមានឯកសារកាន់កាប់ច្បាស់លាស់នោះទេ។
មួយវិញទៀត ប្រធានមន្ទីរធនធានទឹក និងឧតុនិយមខេត្តកំពង់ស្ពឺ លោក ញ៉ាញ់ ជាបហ៊ង ក៏បានសុំឱ្យអាជ្ញាធរខេត្ត ធ្វើការស្រាវជ្រាវ និងបញ្ជាក់អត្តសញ្ញាណឱ្យបានច្បាស់លាស់សម្រាប់ពលរដ្ឋពាក់ព័ន្ធទាំង១៥៦គ្រួសារនេះដែរ ។ហើយក្នុងករណីរកឃើញថា ការកាន់កាប់អាស្រ័យផលមានលក្ខៈសមស្រប នោះមន្ទីរ និងការកាត់ឆ្វៀលជូនពលរដ្ឋតាមនីតិវិធី ប៉ុន្តែក្នុងការចុះពិនិត្យនោះ សុំឱ្យអង្គភាពប្រឆាំងអំពើពុករលួយ និងក្រសួងធនធានទឹក ចូលរួមក្នុងការចុះអង្កេតនោះផងដែរ។
ជាមួយនឹងការលើកឡើងនេះ លោក ជេត ដុំ បានធ្វើការក្រើនរំឭកដល់អាជ្ញាធរភូមិ ឃុំ ស្រុក ត្រូវផ្សព្វផ្សាយឱ្យបានទូលំទូលាយដល់ប្រជាពលរដ្ឋទាំងបីភូមិ ចុះប្រមូលទិន្នន័យ គំនូសបង្ហាញទីតាំងដីជាក់លាក់ ដើម្បីមានមូលដ្ឋានដោះស្រាយក្នុងក្របខណ្ឌគណៈកម្មាធិការគ្រប់គ្រងដីរដ្ឋថ្នាក់ខេត្តជាមួយអង្គភាពប្រឆាំងអំពើពុករលួយ និងស្ថាប័នអន្តរក្រសួងពាក់ព័ន្ធ៕
ចែករំលែកព័តមាននេះ