ខេត្តស្វាយរៀង ៖ ប្រជាពលរដ្ឋចំនួន០៤ភូមិ ក្នុងសង្កាត់បាវិត និងប្រជាពលរដ្ឋភូមិចុងសម្រិត សង្កាត់ប្រាសាទ អបអរសាទរដោយលោកអភិបាលក្រុងបាវិត បានឲ្យក្រុមហ៊ុនធ្វើអាជីវកម្មដឹកអាចម៍ដីលក់ជួសជុលផ្លូវឡើងវិញ និងបានធ្វើដំណើរបានស្រួលបណ្តើរៗហើយ។ នេះបើតាមប្រជាពលរដ្ឋបានលើកឡើងនៅរសៀលថ្ងៃទី៨…
ខេត្តស្វាយរៀង ៖ ប្រជាពលរដ្ឋចំនួន០៤ភូមិ ក្នុងសង្កាត់បាវិត និងប្រជាពលរដ្ឋភូមិចុងសម្រិត សង្កាត់ប្រាសាទ អបអរសាទរដោយលោកអភិបាលក្រុងបាវិត បានឲ្យក្រុមហ៊ុនធ្វើអាជីវកម្មដឹកអាចម៍ដីលក់ជួសជុលផ្លូវឡើងវិញ និងបានធ្វើដំណើរបានស្រួលបណ្តើរៗហើយ។ នេះបើតាមប្រជាពលរដ្ឋបានលើកឡើងនៅរសៀលថ្ងៃទី៨ ខែវិច្ឆិកា ឆ្នាំ២០២៤ នៅសង្កាត់បាវិត ក្រុងបាវិត។
សូមបញ្ជាក់ផងដែរថា កាលពីថ្ងៃទី០៥ ខែវិច្ឆិកា ឆ្នាំ២០២៤ ប្រជាពលរដ្ឋចំនួន០៤ភូមិ ស្ថិតក្នុងសង្កាត់បាវិត និងប្រជាពលរដ្ឋរស់នៅភូមិចុងសំរិត ស្ថិតក្នុងសង្កាត់ប្រាសាទ បានអំពាវនាវសុំឲ្យអាជ្ញាធរក្រុងបាវិត លោកអភិបាលខេត្តស្វាយរៀង មេត្តាចុះពិនិត្យដោះស្រាយបញ្ហារថយន្តដឹកអាចម៍ដីលក់ជាច្រើនគ្រឿង ដែលកំពុងបំផ្លាញផ្លូវនៅក្នុងភូមិសាស្ត្រសង្កាត់បាវិត និងតំបន់ជិតខាង នៃក្រុងបាវិត ខេត្តស្វាយរៀង អោយក្លាយទៅជារណ្តៅសម្បុកមាន់ជ្រៅៗ បែកល្បាប់ បង្កឲ្យរអឹលក្នុងការពិបាកធ្វើដំណើរយ៉ាងខ្លាំង ដូច្នេះសូមឲ្យលោកអភិបាលក្រុងបាវិត លោកអភិបាលខេត្តស្វាយរៀង មេត្តាចុះពិនិត្យ និងដោះស្រាយផង។
ទាក់ទិនករណីនេះដែរ លោក លឹម សៀងហេង អភិបាលក្រុងបាវិត បានប្រាប់អ្នកសារព័ត៌មានយើងថា ក្រោយពីទទួលសំណើរពីប្រជាពលរដ្ឋនៅព្រឹកថ្ងៃទី៧ ខែវិច្ឆិកា ឆ្នាំ២០២៤ ម្សិលម៉ិញនេះ លោកបានឲ្យក្រុមហ៊ុនធ្វើអាជីវកម្ម ស្តាររណ្តៅដីព្រែកតាពៅ គៀរល្បាប់ និងជួសជុលផ្លូវឡើងវិញ ជូនប្រជាពលរដ្ឋ ដើម្បីធ្វើដំណើរបានងាយស្រួលតាមសំណូមពរ ។
លោក លឹម សៀងហេង បានបន្តថា ក្រោយពេលមេឃរាំងភ្លៀង ទើបលោក និងក្រុមស្ដារប្រឡាយព្រែកតាពៅ នឹងធ្វើការជួសជុលផ្លូវលំមួយខ្សែឡើងវិញ ស្ថិតនៅភូមិតាពៅ សង្កាត់បាវិត ក្រុងបាវិត ខេត្តស្វាយរៀង។
លោកអភិបាលក្រុង បានបន្តឲ្យដឹងទៀតថា ដោយសាររដូវនេះ គឺជារដូវវស្សា ហេតុដូច្នេះហើយទើបធ្វើឲ្យបណ្ដាផ្លូវលំមួយចំនួន បានរងការខូចខាត ដោយសារជំនន់ទឹកភ្លៀងនាចុងរដូវវស្សា។ ម្យ៉ាងទៀត នៅពេលដែលមានទឹកភ្លៀង ដូច្នេះយើងមិនអាចដាក់គ្រឿងចក្រជួសជុលបានទេ លុះត្រាតែមេឃរាំងភ្លៀង ។ ហើយការជួសជុលផ្លូវមួយខ្សែនេះ គឺបន្តរហូតដល់សង្កាត់ប្រាសាទ គឺនឹងចាក់ថ្មមិច ទៅតាមលទ្ធភាពជាជំហានៗ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ក៏ដូចជាអ្នកដែលបានធ្វើដំណើរឆ្លងកាត់ផ្លូវមួយខ្សែខាងលើនេះផងដែរ។
ប្រជាពលរដ្ឋនៅភូមិទាំង០៤ភូមិ ក្នុងសង្កាត់បាវិត និងភូមិចុងសំរិត សង្កាត់ប្រាសាទ នៅព្រឹកថ្ងៃទី០៨ វិច្ឆិកា ២០២៤ បានអបអរសាទរ និងរីករាយយ៉ាងខ្លាំង ដោយសារលោកអភិបាលក្រុង បានជួសជុលផ្លូវឡើងវិញ។
តំណាងប្រជាពលរដ្ឋ បានប្រាប់អ្នកសារព័ត៏មានយើងថា ករណីផ្លូវស្រុតខូចពិបាកធ្វើដំណើរនេះ កើតឡើងរយៈពេល១ខែជាងមកហើយ គិតត្រឹមថ្ងៃទី៨ វិច្ឆិកានេះ ហើយប្រជាពលរដ្ឋបានប្តឹងទៅលោក សាញ់ សាខុន ចៅសង្កាត់បាវិត ឲ្យពិនិត្យដោះស្រាយ ក៏ប៉ុន្តែគ្មានប្រសិទ្ធភាព ។ ចំណែកក្រុមហ៊ុន ធ្វើអាជីវកម្មជីករណ្តៅដី យកអាចម៍ដីលក់ នៅតែបន្តចរាចរណីដឹកអាចម៍ដីលក់ដដែល ហើយពេលរាំងភ្លៀង ហ៊ុយធូលីដីលើផ្ទះប្រជាពលរដ្ឋ ដែលរស់នៅតាមដងផ្លូវ ប៉ះពាល់ដល់សុខភាពកូនចៅប្រជាពលរដ្ឋ ដោយក្រុមហ៊ុនអត់ស្រោចទឹកនោះទេ។ ពេលមានភ្លៀង ត្រូវទឹកជន់លិចផ្លូវ រថយន្តរាប់សិបគ្រឿងបើកបរលើផ្លូវ បណ្តាលឲ្យស្រុតក្លាយជារណ្តៅ បែកល្បាប់ រអិលពិបាកធ្វើដំណើរយ៉ាងខ្លាំង។ ហើយក្រុមហ៊ុនដែលពាក់ព័ន្ធមានចំនួន០៣ គឺ៖ ក្រុមហ៊ុនឈ្មោះ ហែមសាមន ក្រុមហ៊ុនឈ្មោះភណ្ឌ័ និងក្រុមហ៊ុនលោករតនា ហៅឌឿក មន្ត្រីយោធាពាក់ផ្កាយ១។ ទើបប្រជាពលរដ្ឋ សូមអំពាវនាវដល់លោក ប៉េង ពោធិសា អភិបាលខេត្តស្វាយរៀង និងស្ថាប័នជំនាញពាក់ព័ន្ធ មេត្តាចុះពិនិត្យ និងដោះស្រាយដោយក្តីអនុគ្រោះ។
ទាក់ទិនករណីនេះដែរ លោក ចាន់ រតនា ហៅឌឿក មន្ត្រីយោធា មានឋានន្តរសក្តិឧត្តមសេនីយ៍ត្រី បានបំភ្លឺប្រាប់អ្នកសារព័ត៌មានយើងថា លោកសូមបដិសេធនឹងពាក្យប្រជាពលរដ្ឋបានចោទប្រកាន់ថា «លោកកាងរថយន្តដឹកអាចម៍ដីបំផ្លាញផ្លូវសាធារណៈ»។ លោកបានបញ្ជាក់ថា ការពិតមានក្រុមហ៊ុនចំនួន០៣ បានកំពុងដឹកដីធ្វើចរាចរណ៍លើដងផ្លូវក្នុងភូមិសាស្ត្រក្រុងបាវិត បានធ្វើឲ្យខូចផ្លូវពិតប្រាកដមែន ។ ចំពោះក្រុមហ៊ុនលោកបានធ្វើកិច្ចសន្យាជាមួយលោកចៅសង្កាត់បាវិត និងលោកអភិបាលក្រុងបាវិតរួចហើយ បើស្រុតខូចផ្លូវលោកនឹងជួសជុលឡើងវិញ និងស្រោចទឹកនៅពេលរដូវក្តៅ ក៏ប៉ុន្តែក្រុមហ៊ុនចំនួន០២ទៀត បានដឹកអាចម៍ដីធ្វើចរាចរណ៍លើផ្លូវនេះដែរ អត់បានសុំច្បាប់ និងធ្វើកិច្ចសន្យាជាមួយលោកចៅសង្កាត់បាវិត និងលោកអភិបាលក្រុងបាវិត «ឱ្យស្រោចទឹក និងជួសជុលផ្លូវឡើងវិញ ពេលផ្លូវស្រុតខូចនោះទេ» ។
លោករតនា បន្តទៀតថា ពេលប្រជាពលរដ្ឋប្តឹងទៅលោកចៅសង្កាត់បាវិត ឲ្យដោះស្រាយ លោកចៅសង្កាត់ដោះស្រាយមិនបាន លោកក៏បានប្តឹងទៅលោកអភិបាលក្រុងបាវិត ឲ្យដោះស្រាយ ដោយលោកមិនអាចជួសជុលផ្លូវតែម្នាក់ឯងបានទេ។ ម្យ៉ាងទៀត លោកបានផ្អាកសកម្មភាពហើយ ចំណែកក្រុមហ៊ុន០២ទៀត នៅបន្តធ្វើសកម្មភាព។ រីឯលោកអភិបាលរងក្រុងបាវិត បានចុះទៅអញ្ជើញក្រុមហ៊ុន០២នោះ (គឺក្រុមហ៊ុនឈ្មោះ ហែមសាមាន និងឈ្មោះភ័ណ្ឌ) ឲ្យមកធ្វើកិច្ចសន្យាជួសជុលផ្លូវឡើងវិញ ក៏ប៉ុន្តក្រុមហ៊ុនទាំង២ មិនព្រមចូលមកធ្វើកិច្ចសន្យានោះទេ ពេលថ្នល់ស្រុតខូច បែកល្បាប់ រអិលពិបាកធ្វើដំណើរ ទើបប្រជាពលរដ្ឋប្តឹង បែរចោទប្រកាន់មកលើរូបលោកទៅវិញ។
ទោះបីជាយ៉ាងណា នៅព្រឹកថ្ងៃទី០៨ ខែវិច្ឆិកា ឆ្នាំ២០២៤នេះ លោកអភិបាលក្រុងបាវិត បានឲ្យក្រុមហ៊ុនលោក ចាន់ រតនា ហៅឌឿក បានកៀរល្បាប់សម្អាត និងចាក់ថ្មមិច ជួសជុលផ្លូវឡើងវិញតាមសំណូមពររបស់ប្រជាពលរដ្ឋហើយ។ ចំណែកក្រុមហ៊ុន លោក ហែម សាមាន និងលោកភ័ណ្ឌ មិនបានចូលរួមជួសជុលផ្លូវនេះទេ៕
ចែករំលែកព័តមាននេះ