រាជធានីភ្នំពេញ ៖ លោក លិ សុខា ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី០២ ខែវិច្ឆិកា ឆ្នាំ២០២៤ បានចេញដីកាបង្គាប់ឲ្យឃុំខ្លួនជនជាតិប៉ូឡូញម្នាក់…
រាជធានីភ្នំពេញ ៖ លោក លិ សុខា ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី០២ ខែវិច្ឆិកា ឆ្នាំ២០២៤ បានចេញដីកាបង្គាប់ឲ្យឃុំខ្លួនជនជាតិប៉ូឡូញម្នាក់ ដាក់ពន្ធនាគារជាបណ្តោះ ក្រោមការចោទប្រកាន់ពីបទ.គំរាមកំហែងថា នឹងសម្លា.ប់ ដោយមានបញ្ជាឲ្យបំពេញលក្ខខណ្ឌអ្វីមួយ ទាក់ទងនឹងជនរងគ្រោះជនជាតិប៉ូឡូញដូចគ្នា ។
ដីកាបង្គាប់ឲ្យឃុំខ្លួនទៅលើជនត្រូវចោទឈ្មោះ GRZEGORZ NOWAK ភេទប្រុស អាយុ៥០ឆ្នាំ ជនជាតិប៉ូឡូញ មានអាសយដ្ឋានមុនចាប់ខ្លួនស្នាក់នៅខេត្តសៀមរាប ត្រូវបានដាក់ឲ្យស្ថិតនៅក្រោមការពិនិត្យពីបទ.គំរាមកំហែងថា នឹងសម្លា.ប់ ដោយមានបញ្ជាឲ្យបំពេញលក្ខខណ្ឌអ្វីមួយ ប្រព្រឹត្តិនៅរាជធានីភ្នំពេញ កាលពីអំឡុងឆ្នាំ២០២៣ រហូតដល់ថ្ងៃទី២៤ ខែកញ្ញា ឆ្នាំ២០២៤ ដែលបទល្មើសនេះមានចែងតាមបញ្ញត្តិឲ្យផ្តន្ទាទោសតាមមាត្រា ២៣៤ នៃក្រមព្រហ្មទណ្ឌ ។
ដើមចម នៃការឃុំខ្លួនជនសង្ស័យខាងលើនេះ ត្រូវបានសមត្ថកិច្ច បង្ហើបតាមការបំភ្លឺរបស់ដើមបណ្តឹងឈ្មោះ KUKLINSKI ARTUR WOJCIECH ជាជនជាតិប៉ូឡូញ ឲ្យដឹងថា កាលពីអំឡុងខែមីនា ឆ្នាំ២០២៣ ឈ្មោះ GRZEGORZ NOWAK ជនសង្ស័យ ដែលជាអ្នករាប់អានគ្នា បានទៅទំនាក់ទំនងសុំធ្វើការនៅក្រុមហ៊ុនជាមួយខ្លួន ជាផ្នែកផលិតមាតិការនៅលើ(យូធូប) ហើយខ្លួនប្រាប់ថា ក្រុមហ៊ុនមិនត្រូវការបុគ្គលិកទេ តែជនសង្ស័យនៅព្យាយាមទទូចសុំធ្វើការម្តងជាពីរដង និងថែមទាំងបានថតវីដេអូ ផ្ញើមកឲ្យខ្លួនមើលជាច្រើនលើក ក្នុងគោលបំណង ដើម្បីចង់ឲ្យខ្លួនទទួលយកគេ (ជនសង្ស័យ) ធ្វើការនៅក្រុមហ៊ុននោះ ។
ពាក្យបណ្តឹងបញ្ជាក់ទៀតថា នៅខែឧសភា ឆ្នាំ២០២៣ ជនសង្ស័យ បានទៅប្រកបមុខរបររកស៊ីនៅខេត្តសៀមរាប បន្ទាប់មកក៏ក្ស័យធនអស់លុយកាក់ពីខ្លួន ក៏បានទាក់ទងមកជនរងគ្រោះ និងឈ្មោះ PETER ដែលជាមិត្តភក្តិ ដើម្បីសុំប្រាក់ចាយ ។ ដោយមានការអាណិតអាសូ ទើបជនរងគ្រោះ និងមិត្តភក្តិម្នាក់នោះ ក៏បានវេលុយចំនួន២លើកឲ្យទៅជនសង្ស័យ សរុបចំនួន ៤,០០០ដុល្លារអាមេរិក ។ ក្រោយពីបានប្រាក់នោះ យកទៅចាយវាយអស់ហើយ ដល់ខែកុម្ភៈ ឆ្នាំ២០២៤ ជនសង្ស័យបានផុសវីដេអូលើបណ្តាញសង្គមយូធូប បរិហារកេរ្តិ៍ ថា ជនរងគ្រោះជាជនឆបោក ជាចោរ និងបានទាមទារប្រាក់ចំនួន ១,៥០០,០០០ដុល្លារអាមេរិក ថែមទៀតផង ហើយនឹងបានគំរាមជនរងគ្រោះថា បើសិនមិនប្រគល់ប្រាក់ឲ្យគេទេ គេនៅតែបង្ហោះវីដេអូបន្តបន្ទាប់ទៀត ។ លុះថ្ងៃទី២៤ ខែកញ្ញា ឆ្នាំ២០២៤ ជនសង្ស័យបានផុសលើបណ្តាញសង្គមយូធូប ហើយបានទារប្រាក់ពជនរងគ្រោះ និងមិត្តភក្តិឈ្មោះ PETER សារជាថ្មីម្តងទៀត ចំនួន ៥,៥០០,០០០ដុល្លារអាមេរិក ថែមទាំងគំរាមសម្លាប់ក្រុមគ្រួសារជនរងគ្រោះ ដែលកំពុងរស់នៅប្រកមមុខរបររកស៊ីក្នុងប្រទេសកម្ពុជា និងប្រទេសប៉ូឡូញ ។ ដោយមានការភ័យខ្លាចពីការគំរាមកំហែងប៉ុនប៉ងអាយុជីវិត ជនរងគ្រោះទាំង២ នាក់ក៏បានចាកចេញពីលំនៅឋាន ទៅស្នាក់នៅកន្លែងផ្សេង ដើម្បីឲ្យមានសុវត្តិភាព រួចក៏សម្រេចចិត្តប្តឹងសមត្ថកិច្ចឲ្យជួយចាត់ការលើរឿងនេះទៅតាមផ្លូវច្បាប់ ។
សមត្ថកិច្ចបន្តថា ក្រោយពីទទួលបានពាក្យបណ្តឹងរបស់ជនរងគ្រោះ ក្រោមការចង្អុលបង្ហាញពីនាយឧត្តមសេនីយ៍ ស ថេត អគ្គស្នងការនគរបាលជាតិ និងមានការដឹកនាំបញ្ជាដោយលោកឧត្តមសេនីយ៍ឯក ង៉េង ជួរ ប្រធាននាយកដ្ឋាននគរបាលព្រហ្មទណ្ឌ លោកឧត្តមសេនីយ៍ទោ ស៊ឹង យុត្ថា អនុប្រធាននាយកដ្ឋាន លោកវរសេនីយ៍ទោ សាន សីហា នាយការិយាល័យស៊ើបការណ៍ បានបើកការស៊ើបអង្កេត និងស្រាវជ្រាវរហូតឈានដល់ការឃាត់ខ្លួនជនសង្ស័យ កាលពីថ្ងៃទី២៨ ខែតុលា ឆ្នាំ២០២៤ នៅចំណុចមុខសណ្ឋាគារជីមេគង្គ ស្ថិតក្នុងសង្កាត់អូរឬស្សីទី១ ខណ្ឌ៧មករា ដោយអនុវត្តតាមដីកាបញ្ជាឲ្យចូលខ្លួនរបស់លោក ប្លង់ សុផល ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។ បន្ទាប់ពីឃាន់ខ្លួនជនសង្ស័យ សមត្ថកិច្ចបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធីច្បាប់ ៕
ចែករំលែកព័តមាននេះ