ប្រសិន បើអ្នកជាអាជីវរកនៅតាមទីផ្សារធម្មតាមួយរូប ដែលចង់ជោគជ័យទៅថ្ងៃអនាគត សូមចាប់ផ្តើមរិះគិត និងអនុវត្តដំណើរការអភិវឌ្ឍអាជីវកម្មរបស់អ្នកមួយកម្រិតថែមទៀត ដើម្បីរត់ឲ្យទាន់សភាពការណ៍និងដំណើរវិវត្តន៍ទៅមុខនៃសង្គម ។ ដំណើរការលក់ដូររបស់អ្នកនៅតាមទីផ្សារនានា នៅក្នុងរាជធានីភ្នំពេញ ផ្តល់នូវទំនាក់ទំនងផ្ទាល់ខ្លួនជាមួយអតិថិជនស្រាប់…
ប្រសិន បើអ្នកជាអាជីវរកនៅតាមទីផ្សារធម្មតាមួយរូប ដែលចង់ជោគជ័យទៅថ្ងៃអនាគត សូមចាប់ផ្តើមរិះគិត និងអនុវត្តដំណើរការអភិវឌ្ឍអាជីវកម្មរបស់អ្នកមួយកម្រិតថែមទៀត ដើម្បីរត់ឲ្យទាន់សភាពការណ៍និងដំណើរវិវត្តន៍ទៅមុខនៃសង្គម ។
ដំណើរការលក់ដូររបស់អ្នកនៅតាមទីផ្សារនានា នៅក្នុងរាជធានីភ្នំពេញ ផ្តល់នូវទំនាក់ទំនងផ្ទាល់ខ្លួនជាមួយអតិថិជនស្រាប់ និយាយឲ្យចំទៅ គឺអ្នកមានម៉ូយស្រាប់ រីឯដំណើរការអភិវឌ្ឍតាមអនឡាញដែលអ្នកត្រូវប្រឹង គឺជាវិធីដែលអាចឲ្យអ្នកពង្រីកអាជីវកម្មរបស់អ្នកមួយកម្រិតបន្ថែមទៀត ដូច្នេះគួរតែរិះគិត និងអភិវឌ្ឍន៍ទៅជាទីផ្សារកូនកាត់ឲ្យហើយទៅ ។
នៅក្នុងដំណើរការកែប្រែអាជីវកម្ម និងបន្សាំខ្លួន ទៅក្នុងបរិបទទីផ្សាថ្មី សូមអ្នកកុំលោ.ភលន់ ដោយចាប់ផ្តើមរិះគិតហើយកំណត់អត្តសញ្ញាណផលិតផលណា ដែលអ្នកគិតថា លក់ដាច់ ហើយអាចដឹកជញ្ជូនបានយ៉ាងងាយស្រួលម្តងមួយជំហានៗ ។ នៅពេលដែលអ្នកគិតឃើញហើយ សូមបង្កើតចក្ខុវិស័យឲ្យច្បាស់លាស់អំពីអ្វីដែលអ្នកចង់សម្រេចបានដោយ អ្នកអាចកំណត់គោលដៅអ្នកទិញ ។
សម័យនេះខុសពីសម័យមុននេះបន្តិច ដោយអាជីវកម្មអនឡាញរបស់អ្នក គឺអ្នកមិនត្រូវការគេហទំព័រស្មុគស្មាញ ដើម្បីចាប់ផ្តើមលក់អនឡាញទេ ។ អ្នកអាចជ្រើសរើសជម្រើសនៃការធ្វើអាជីវកម្មនេះ តាមការសាកល្បងនៅលើបណ្តាញសង្គមដែលមាន Facebook ឬ Instagram ឬតេឡេក្រាម ។ បណ្តាញសង្គមទាំងនេះ គឺជាកន្លែងចាប់ផ្តើមសាកល្បងដ៏ល្អ ដើម្បីចាប់ផ្តើមអភិវឌ្ឈន៍ និងពង្រីកទីផ្សារបស់អ្នក ។
នៅក្នុងដំណើរការនេះ អ្នកអាចនឹងចាប់ផ្តើមថតរូបផលិតផល ដែលអ្នកចង់លក់ចង់ផ្សព្វផ្សាយឲ្យបានច្បាស់ល្អ រួចហើយសរសេរការពិពណ៌នាលម្អិតច្បាស់លាស់ ហើយព្យាយាមនិយាយតាមនោះដោយធ្វើយ៉ាងណារំលេចអត្ថប្រយោជន៍នៃវត្ថុនីមួយៗតាមដែលអាចធ្វើទៅបាន និងងាយស្រួលឲ្យផលិតផលយើងទៅដល់គោលដៅនៃអាជីវកម្មរបស់យើង តែអ្នកក៏ត្រូវតែមានភាពស្មោះត្រង់ និងតម្លាភាពអំពីតម្លៃ និងគុណភាពរបស់ទំនិញ ។
ក្រៅពីនេះអ្នកក៏ត្រូវតែរិះគិតហើយត្រូវចាំថា ការលក់អនឡាញមិនមានន័យថា ជាការណែនាំឲ្យអ្នកបោះបង់អតិថិជនចាស់ៗ ដែលមានស្រាប់នៅតាមទីផ្សារនោះទេ នៅក្នុងការធ្វើពាណិជ្ជកម្មទ្រឹស្តីសំខាន់ គឺថែរក្សាម៉ូយចាស់ សម្លឹងហើយទាក់ទាញឲ្យបានម៉ូយថ្មី ដូច្នេះអ្នកចាំបាច់កុំចាប់ដៃមួយព្រលែងដៃមួយ អ្នកត្រូវតែហាត់ពុតលុតដំធ្វើយ៉ាងណាឲ្យវាសកម្ម និងអាចទប់ទល់បានគ្រប់ស្ថានការណ៍ ។
អ្នកត្រូវតែគិតថា ទីផ្សារ គឺជាឆ្នាំងបាយចាស់ ហើយអតិថិជនដែលយើងមានស្រាប់ពួកគេខ្លះនឹងបន្តមករក យើង ។ ដូច្នេះចាំបាច់ត្រូវតែថែរក្សាឲ្យបាន ហើយនៅក្នុងករណីបាត់ម៉ូត គួរតែរៀនប្រើប្រាស់បណ្តាញសង្គមទាំងនេះ ស្វែងរកអតិថិជនចាស់ៗយកមកវិញ ហើយប្រសិនបើអាច គឺត្រូវតែផ្តល់លក្ខខណ្ឌអំណោយផល និងផលចំណេញខ្លះដល់ពួកគេ ៕
ចែករំលែកព័តមាននេះ