ទីក្រុងវ៉ាស៊ីនតោន៖ ភ្នាក់ងារអែហ្វប៊ីអាយថ្លែងថាលោកត្រាំជាគោលដៅនៃការប៉ុនប៉ងធ្វើឃាតនៅទីលានវាយកូនគោលនៃរដ្ឋផ្លរីដាកាលពីថ្ងៃអាទិត្យ។ ហេតុការណ៍នេះកើតឡើងរយៈពេល៩អាទិត្យបន្ទាប់ពីលោករងការបាញ់ប្រហារពីជនប្រដាប់អាវុធវ័យក្មេងម្នាក់។ ប៉ុន្តែលោកអាចរួចផុតពីការប៉ុនប៉ងទាំង២លើកនេះ។ លោកត្រាំបានបង្ហោះសារនៅលើបណ្ដាញសង្គមថា «លោកមានសុវត្ថិភាពជាធម្មតា»។
នគរបាលមូលដ្ឋានថ្លែងថាកងការពារសម្ងាត់របស់អាមេរិកបានបាញ់តម្រង់ទៅរកបុរសម្នាក់នៅពេលគាត់លើកកាំភ្លើងវែងដែលមានភ្ជាប់កែវយឹតតម្រង់ទៅរកលោកត្រាំ។ នៅពេលនោះ លោកកំពុងស្ថិតនៅលើទីលានវាយកូនគោល។ ជនប្រដាប់អាវុធរូបនោះដាក់កាបូបស្ពាយចំនួន២ទៅតាមខ្លួន ហើយព្យួរទុកនៅនឹងរបង។ គាត់ក៏ដាក់កាមេរ៉ាម៉ាកហ្គោប្រូ (GoPro)មួយគ្រឿងទៅតាមខ្លួនផងដែរ។ គាត់លាក់ខ្លួននៅក្នុងគម្ពោតព្រៃចម្ងាយប្រហែលជាង៣០០-ជាង៤០០ម៉ែត្រពីលោកត្រាំ។
បន្ទាប់ពីទីភ្នាក់ងារការពារសម្ងាត់បាញ់កាំភ្លើងដើម្បីកម្លាបុរសនោះ គាត់ក៏បោះចោលកាំភ្លើង និងឡើងជិះឡានដើម្បីរត់គេចខ្លួន។ ប៉ុន្តែគាត់ត្រូវសមត្ថកិច្ចចាប់ខ្លួនយកទៅឃុំឃាំង។ តាមរយៈអ៊ីមែលផ្ញើជូនក្រុមអ្នកគាំទ្ររបស់លោក លោកត្រាំសរសេររៀបរាប់ថា «មានហេតុការណ៍បាញ់កាំភ្លើងជាច្រើនគ្រាប់នៅក្នុងបរិវេណទីលានវាយកូនគោលរបស់លោក។ ប៉ុន្តែលោកសូមបញ្ជាក់ថាលោកមានសុវត្ថិភាព និងមានសុខភាពល្អជាធម្មតា។ គ្មានអ្វីដែលធ្វើឱ្យលោកខ្លបខ្លាចឡើយ ហើយលោកនឹងមិនចុះចាញ់ជាដាច់ខាត»។
មុនពេលកើតហេតុនោះ ទីលានវាយកូនគោលរបស់លោកត្រាំបើកដំណើរការត្រឹមតែ១ផ្នែកប៉ុណ្ណោះ។ ចំណែកភ្នាក់ងារសម្ងាត់ក៏បានដាក់ពង្រាយកម្លាំងការពារយ៉ាងច្រើនស្អេកស្កះនៅក្បែរៗកន្លែងវាយកូនគោល។ រំពេចនោះ ពួកគេក្រឡេកភ្នែកទៅឃើញបុរសម្នាក់កាន់កាំភ្លើងវែងមួយដើមសម្ងំលាក់ខ្លួនដើម្បីប្រុងធ្វើសកម្មភាពបាញ់ប្រហារ។ លោកត្រាំច្រើនចំណាយពេលមួយព្រឹកថ្ងៃអាទិត្យដើម្បីវាយកូនគោល។ បន្ទាប់មក លោកញ៉ាំអាហារពេលថ្ងៃនៅទីលាននោះដដែល។
ក្រោយហេតុការណ៍ប៉ុនប៉ងធ្វើឃាតមិនបានសម្រេចកាលពីខែកក្កដា លោកត្រាំចាប់ផ្ដើមពង្រឹងសន្តិសុខកាន់តែខ្លាំង។ នៅពេលលោកស្ថិតនៅវិមានត្រាំ (Trump Tower) ឯទីក្រុងញូយ៉ក មានរថយន្តធុនធំមួយជួរដាក់តម្រៀបគ្នានៅខាងក្រៅអគារដើម្បីការពារគ្រាប់កាំភ្លើង។ នៅពេលលោកចេញទៅបើកវេទិកាជួបអ្នកគាំទ្រ ទីកន្លែងនោះត្រូវបិទបាំងដោយកញ្ចក់នៅពីក្រោយទីកន្លែងដែលគាត់ឈរដើម្បីការពារគ្រាប់កាំភ្លើង។
ដំណឹងស្ដីពីការប៉ុនប៉ងធ្វើឃាតលោកត្រាំជាលើកទី២នេះបានលេចឮដល់សេតវិមានហើយ។ លោកបៃដិន និងលោកស្រីហារីសបានជ្រាបដំណឹងនេះ និងរង់ចាំទទួលព័ត៌មានថ្មីៗពាក់ព័ន្ធនឹងការស៊ើបអង្កេត។ អ្នកនាំពាក្យសេតវិមានថ្លែងថារដ្ឋបាលរបស់លោកបៃដិនបានស្ងប់ចិត្តខ្លះនៅពេលទទួលដំណឹងថាលោកត្រាំមានសុវត្ថិភាពជាធម្មតា។
លោកស្រីហារីសចេញសេចក្ដីថ្លែងការណ៍មួយបង្ហាញអារម្មណ៍ធូរស្បើយនៅក្នុងចិត្តនៅពេលទទួលដំណឹងថាលោកត្រាំមានសុវត្ថិភាពជាធម្មតា។ លោកស្រីថ្លែងថា «អំពើហិង្សាមិនត្រូវកើតមានជាដាច់ខាតនៅលើទឹកដីនៃប្រទេសអាមេរិក»៕
អ្នកនាំពាក្យអែហ្វប៊ីអាយថ្លែងនៅក្នុងសន្និសីទសារព័ត៌មាន
ចែករំលែកព័តមាននេះ