ខេត្តបឋមធានី៖ មានហេតុការណ៍ដ៏គួរឱ្យភ្ញាក់ផ្អើលមួយកើតឡើងនៅប្រទេសថៃដោយសារតែរឿងជម្លោះពាក់ព័ន្ធនឹងសត្វចិញ្ចឹមរបស់ខ្លួនឈានដល់ការផ្ដាច់ជីវិតអ្នកដទៃ និងខ្លួនឯងយ៉ាងអាណោចអធ័ម។ ថ្មីៗនេះ បុរសម្នាក់ជាយោធិនចូលនិវត្តបានដាច់ចិត្តលើកកាំភ្លើងបាញ់ប្រហារអ្នកជិតខាងម្នាក់ស្លាប់ភ្លាមៗនៅនឹងកន្លែង។ បន្ទាប់មក គាត់ទាញកាំភ្លើងបាញ់សម្លាប់ខ្លួនឯងតាមក្រោយ។ ហេតុការណ៍នេះកើតឡើងនៅស្រុកក្លងហ្លួង (Khlong Luang) ខេត្តបឋមធានីកាលពីព្រឹកថ្ងៃចន្ទ។
សាក្សីនិយាយថាអ្នកជិតខាងទាំង២នាក់នេះមានទំនាស់គ្នាជាច្រើនខែមកហើយពាក់ព័ន្ធនឹងសត្វចិញ្ចឹម២ក្បាល។ ផ្ទះមួយមានសត្វសុនខ និងផ្ទះមួយទៀតមានសត្វឆ្មា។ នៅម៉ោង៧:៣០ព្រឹក នគរបាលទទួលការហៅទូរស័ព្ទដើម្បីធ្វើអន្តរាគមន៍បន្ទាន់នៅក្នុងផ្ទះដីឡូតិ៍មួយកន្លែងនៃតំបន់ក្លងសាម (Khlong Sam)។ នៅពេលទៅដល់ឃើញសាកសពមនុស្ស២នាក់។ ម្នាក់ជាវរសេនីយ៍យោធាចារូឆាត ចារូផាន អាយុ៦៤ឆ្នាំ (Jaruchart Jarupan) និងម្នាក់ទៀតឈ្មោះសាវវ៉ាគុល សាសាដូ (Saowagul Sasadoh) អាយុ៥៣ឆ្នាំ។
កូនប្រុសអាយុ៣០ឆ្នាំរបស់ស្ត្រីដែលត្រូវយោធិនចូលនិវត្តបាញ់សម្លាប់នោះក៏ត្រូវរបួសនៅត្រង់ដៃខាងឆ្វេងផងដែរ។ អ្នកជិតខាងទាំង២មានទំនាស់នឹងគ្នាយូរហើយ ហើយកាលពីព្រឹកថ្ងៃចន្ទ ពួកគាត់ក៏ទាស់សម្ដីគ្នាម្ដងទៀត។ លើកនេះមិនមែនទាស់តែសម្ដីទេ ប៉ុន្តែឈានដល់ការបញ្ចប់ជីវិតទាំងសងខាងតែម្ដង។ សាក្សីប្រាប់ថាមុនដំបូង យោធិនចូលនិវត្តដើរចូលទៅក្នុងផ្ទះ និងដើរចេញមកវិញដោយកាន់កាំភ្លើងខ្លី៩មិល្លីម៉ែត្រ។ គាត់ដើរចូលទៅក្នុងផ្ទះរបស់ស្ត្រីនោះ និងបាញ់ជាច្រើនគ្រាប់។
ទិដ្ឋភាពនៅកន្លែងកើតហេតុលទ្ធផលកោសល្យវិច័យបង្ហាញថាស្ត្រីរូបនោះរងការបាញ់ប្រហារ៥គ្រាប់ត្រូវចំថ្ពាល់ខាងឆ្វេង, ពោះ, កំភួនដៃខាងស្ដាំ និងដើមដៃខាងស្ដាំ។ យោធិនចូលនិវត្តរូបនេះត្រូវគេប្រទះឃើញស្លាប់នៅក្បែរមាត់របងផ្ទះរបស់ស្ត្រីរងគ្រោះដោយមានស្នាមបាញ់ទម្លុះសៀតផ្កាខាងឆ្វេង ហើយធ្លាយគ្រាប់កាំភ្លើងមកសៀតផ្កាខាងស្ដាំ។ នេះបើយោងតាមការពិនិត្យរបស់សមត្ថកិច្ច។
អ្នកស្រីអនុថៃ ចារូផាន (Anothai Jarupan) វ័យ៦៣ឆ្នាំ ជាប្រពន្ធរបស់យោធិនចូលនិវត្តប្រាប់ថាស្វាមីរបស់គាត់ និងអ្នកជិតខាងដែលគាត់បានបាញ់សម្លាប់នោះធ្លាប់មានទំនាស់ពាក្យសម្ដីនឹងគ្នាកន្លះឆ្នាំមកហើយ។ នៅថ្ងៃកើតហេតុនោះ គាត់ឃើញស្វាមីច្រកគ្រាប់នៅក្នុងបង់កាំភ្លើង ហើយដើររ៉ុយចេញពីក្នុងផ្ទះ។ មិនយូរប៉ុន្មាន គាត់ក៏ស្ដាប់ឮសំឡេងគ្រាប់កាំភ្លើងបាញ់ផូងៗផ្ទួនៗគ្នាជាច្រើនគ្រាប់។ គាត់ក៏ប្រញាប់ស្ទុះចេញពីក្នុងផ្ទះឃើញស្វាមីយកកាំភ្លើងខ្លីភ្ជង់សៀតផ្កាខ្លួនឯងដើម្បីធ្វើអត្តឃាត។
លោកក្រៃទីន ណាត់ថាវីន (Kritin Natawin) ជាកូនប្រុសរបស់ស្ត្រីរងគ្រោះប្រាប់ថាគ្រាន់តែស្ដាប់ឮសំឡេងផ្ទុះគ្រាប់កាំភ្លើងភ្លាម គាត់ក៏ស្ទុះវឹងសំដៅទៅមាត់ទ្វារ។ ពេលនោះ យោធិនចូលនិវត្តក៏ទាញកាំភ្លើងបាញ់សំដៅទៅរកកូនប្រុសស្ត្រីរងគ្រោះ។ ប៉ុន្តែសំណាងល្អ គាត់មិនស្លាប់ ត្រឹមតែរបួសដៃខាងឆ្វេង។ កូនប្រុសរូបនេះប្រាប់ថាមុនដំបូងអត់មានទំនាស់អីនឹងគ្នាទេ។
ប៉ុន្តែនៅពេលយោធិនចូលនិវត្តយកឆ្មាមួយក្បាលមកចិញ្ចឹម រឿងក៏ចេះតែកើតឡើងជាហូរហែ។ សត្វឆ្មារបស់គាត់ឧស្សាហ៍ផ្លោះរបងចូលទៅក្នុងបរិវេណផ្ទះរបស់ស្ត្រីរងគ្រោះ។ នៅពេលផ្លោះរបងបែបនេះក៏វាក់អើជាមួយសត្វសុនខរបស់ស្ត្រីរងគ្រោះ។ ជាធម្មតា សុនខ និងឆ្មាមិនសូវត្រូវធាតុគ្នាទេ។ កុំថាឡើយដល់ទៅឆ្មា និងសុនខនៅផ្ទះផ្សេងគ្នា សូម្បីតែម្ចាស់តែមួយក៏មិនសូវត្រូវគ្នាផង។ ហេតុដូច្នេះហើយក៏បង្កជាបញ្ហារវាងម្ចាស់របស់សត្វទាំង២ និងការបាញ់ប្រហារដូចរៀបរាប់ខាងលើ៕
ចែករំលែកព័តមាននេះ