ទីក្រុងវ៉ាស៊ីនតោន៖ បន្ទាប់ពីមានករណីបាញ់ប្រហារដែលបង្កើឡើងដោយយុវជនជំទង់អាយុ១៤ឆ្នាំនៅក្នុងបរិវេណសាលារៀនមធ្យមសិក្សា១កន្លែងនៃរដ្ឋចចចា (Georgia) ប្រទេសរដ្ឋអាមេរិក ដែលបណ្ដាលឱ្យស្លាប់មនុស្ស៤នាក់ និងរបួស៩នាក់ លោកបៃដិនបានអំពាវនាវជាថ្មីម្ដងទៀតទៅសភាដើម្បីពន្លឿនការអនុម័តច្បាប់ស្ដីពីការគ្រប់គ្រងកាំភ្លើង។ លោកសូមចូលរួមរំលែកមរណទុក្ខដ៏ក្រៀមក្រំបំផុតជាមួយក្រុមគ្រួសារសព។ គេដឹងថានៅក្នុងចំណោមអ្នកស្លាប់ទាំងនោះ ២នាក់ជាគ្រូបង្រៀន និង២នាក់ទៀតជាសិស្សសាលា។
យោងតាមការបង្ហើបឱ្យដឹងពីអាជ្ញាធរ ជនសង្ស័យរូបនោះឈ្មោះខូលហ្គ្រ (Colt Gray) អាយុ១៤ឆ្នាំជាសិស្សសាលា។ ហ្គ្រេត្រូវសមត្ថកិច្ចចាប់ខ្លួន និងចោទប្រកាន់ពីបទមនុស្សឃាត។ ការិយាល័យស៊ើបអង្កេតប្រចាំរដ្ឋចចចាថ្លែងថានៅក្នុងចំណោមអ្នករបួសទាំង៩នាក់នោះ ៨នាក់ជាសិស្សសាលា និងម្នាក់ជាគ្រូបង្រៀន។ ថ្វីដ្បិតមុខរបួសមិនធ្ងន់ធ្ងរដល់ស្លាប់ ប៉ុន្តែពួកគេត្រូវស្នាក់នៅក្នុងមន្ទីរពេទ្យជាបន្តទៀត។
សមត្ថកិច្ចឱ្យដឹងថាហេតុការណ៍នោះកើតឡើងនៅវេលាម៉ោង១០:២០ព្រឹកមិញនៅពេលជនដៃដល់កាន់កាំភ្លើងម៉ាកអេអ័រ (AR) ដើរចូលទៅក្នុងបរិវេណសាលា។ រួមគាត់បាញ់រះទៅលើមនុស្សនៅក្នុងបរិវេណនោះដោយឥតរើសមុខ។ ក្រោយមកតែប៉ុន្មាននាទីប៉ុណ្ណោះ មានគេហៅទូរស័ព្ទទៅសមត្ថកិច្ចដើម្បីធ្វើអន្តរាគមន៍ជាបន្ទាន់។
នៅពេលសមត្ថកិច្ចចុះទៅដល់ឃើញជនដៃដល់រូបនោះកំពុងធ្វើសកម្មភាព។ បន្ទាប់ពីឃើញថាខ្លួនមិនអាចរត់គេចខ្លួនទៅណាបានទេ ហើយបើទុកជាបាញ់គ្នាក៏មិនឈ្នះសមត្ថកិច្ច ជនសង្ស័យរូបនោះក៏លើកដៃសូមចុះចាញ់។ គាត់ប្រគល់ខ្លួនឱ្យសមត្ថកិច្ចចាប់តាំងសម្រួលយកទៅឃុំឃាំង ដើម្បីរង់ចាំនាំខ្លួនឡើងតុលាការ។
រហូតមកដល់ពេលនេះ គេមិនទាន់ដឹងអំពីមូលហេតុនៃការបាញ់ប្រហារនេះទេព្រោះសំណុំរឿងនេះកំពុងស្ថិតនៅក្នុងការស៊ើបអង្កេត។ ម៉្យាងទៀត គេក៏មិនទាន់ដឹងច្បាស់ថាតើជនសង្ស័យ និងជនរងគ្រោះធ្លាប់បានស្គាល់គ្នាពីមុនមកទេ? ឬក៏ធ្លាប់មានទំនាស់អ្វីជាមួយគ្នា? គិតចាប់ពីឆ្នាំ២០០៦មក ហ្គ្រេជាជនសង្ស័យក្មេងជាងគេដែលបាញ់ប្រហារនៅក្នុងបរិវេណសាលារៀន៕
ចែករំលែកព័តមាននេះ