ទីក្រុងហាណូយ៖ ថ្មីៗនេះ តុលាការទីក្រុងហូជីមិញកាត់ទោសនារីជនជាតិវៀតណាមម្នាក់ឱ្យជាប់ពន្ធនាគារ៩ឆ្នាំពីបទល្បួងក្មេងស្រីតូចៗពីរនាក់ថតរូបអាក្រាត និងផ្ញើទៅឱ្យសង្សាររបស់ខ្លួនជាជនជាតិអាមេរិកដើម្បីមើលកម្សាន្ត។ នារីឈ្មោះហ្វាមហ៊ីងញ៉ាតវី (Pham Huynh Nhat Vi) អាយុ២១ឆ្នាំត្រូវតុលាការកាត់ទោសដោយប្រើប្រាស់ច្បាប់ប្រឆាំងនឹងការថតរូបអាសអាភាសអនីតិជនក្រោមអាយុ១៦ឆ្នាំមួយករណី និងពីបទចាប់ពង្រត់អនីតិជនក្រោមអាយុ១៦ឆ្នាំមួយករណីទៀត។
នារីឈ្មោះវីដែលត្រូវតុលាការផ្ដន្ទាទោសពីបទល្បួងក្មេងស្រីថតស្រាតតុលាការរកឃើញថានារីឈ្មោះវីម្នាក់នេះបានល្បួងក្មេងស្រីតូចៗពីរនាក់ និងថតរូបអាក្រាតរបស់ពួកគេដោយមានសង្សាររបស់ខ្លួនជាអ្នកបង្ហាត់បង្ហាញថាត្រូវចាប់ប្លង់ថតបែបណាៗ។ សង្សាររបស់នារីម្នាក់នេះឈ្មោះរីឆាតរស់នៅប្រទេសអាមេរិក ហើយបានទាក់ទងនារីឈ្មោះវី។ ខែតុលា ឆ្នាំ២០២៣ វី និងសង្សារបានស្នាក់នៅជាមួយគ្នានៅក្នុងសណ្ឋាគារទីក្រុងហូជីមិញ។ ក្រោយមក រីឆាតចាកចេញពីវៀតណាមទៅអាមេរិកវិញ ហើយនៅតែបន្តទាក់ទងគ្នាពីចម្ងាយជាមួយស្ត្រីឈ្មោះវីដដែល។
រីឆាតឧស្សាហ៍ផ្ញើទៅឱ្យនារីឈ្មោះវីមើលឈុតវីឌីអូអាក្រាតរបស់នារីដែលមានដើមកំណើតអាស៊ីដទៃទៀត ហើយគាត់ប្រាប់ឱ្យនារីឈ្មោះវីល្បួងក្មេងស្រីៗអាយុចន្លោះពី៦ដល់១២ឆ្នាំដើម្បីថតឈុតអាក្រាត។ រីឆាតសន្យាផ្ដល់លុយទៅស្ត្រីឈ្មោះវី, សន្យារៀបការជាមួយនាង និងសន្យាធានារូបនាងទៅរស់នៅប្រទេសអាមេរិក។ សំខាន់ឱ្យតែនាងធ្វើតាមបង្គាប់របស់គាត់។
នារីឈ្មោះវីក៏យល់ព្រម និងទទួលបានប្រាក់៥រយដុល្លារពីរីឆាត។ អ្នកទាំង២និយាយត្រូវគ្នាថានៅពេលវីរកបានក្មេងស្រីៗដើម្បីថតវីឌីអូ រីឆាតនឹងជួយចេញលុយជួលផ្ទះល្វែងសម្រាប់ស្នាក់នៅ និងថតវីឌីអូ។ ថ្ងៃទី៣ ខែមេសា ឆ្នាំ២០២៤ ស្ត្រីឈ្មោះវីដើរតាមផ្លូវសុខៗក៏ប្រទះឃើញក្មេងស្រី២នាក់អង្គុយលេងតាមមាត់ផ្លូវ។ វីក៏ដើរទៅនិយាយលេងជាមួយពួកគេ ហើយហុចលុយ១ម៉ឺនដុងឱ្យពួកគេ (ស្មើនឹង០,៤ដុល្លារ)។ វីបាននាំពួកគេទៅញ៉ាំការ៉េម និងមាន់បំពង និងថតរូបពួកគេផ្ញើទៅឱ្យរីឆាត។
វីបាននាំក្មេងៗទាំងនោះដើរឆ្លងកាត់ពីផ្លូវមួយទៅផ្លូវមួយទៀតដើម្បីឆ្លៀតពេលសរសេរអក្សរ ផ្ញើសារទៅឱ្យរីឆាត និងជជែកគ្នាពីទីតាំងដែលត្រូវថត។ ក្រោយមក រីឆាតជួលបានបន្ទប់១នៅអគារសៃហ្កនផឺល (Saigon Pearl)។ នៅរាត្រីនោះ វីនាំក្មេងៗទាំង២ចូលទៅក្នុងបន្ទប់ ហើយចាប់ផ្ដើមរៀបចំប្លង់ថតអាក្រាតតែម្ដង។ ចាប់ពីថ្ងៃទី៣-៧ ខែមេសា ឆ្នាំ២០២៤ វីបានថតវីឌីអូអាក្រាតរបស់ក្មេងៗទាំងនេះចំនួន១២ឈុត និងផ្ញើទៅឱ្យរីឆាត។ ក្រោយមក រីឆាតផ្ញើលុយឱ្យនារីឈ្មោះវីចំនួន២រយដុល្លារ។
ថ្លែងអំពីម្ដាយរបស់ក្មេងស្រីរងគ្រោះទាំងពីរនាក់នោះវិញ។ បន្ទាប់ពីបាត់ដំណឹងកូនស្រីរបស់ខ្លួនជាច្រើនថ្ងៃមិនដឹងថាពួកគេទៅណា និងមានសុខទុក្ខយ៉ាងណា ស្ត្រីជាម្ដាយក៏តាមរកកូន និងរាយការណ៍ប្រាប់សមត្ថកិច្ច។ ស្ត្រីជាម្ដាយជាអ្នកលក់នំតាមតាមចិញ្ចើមផ្លូវ ហើយតែងតែនាំយកកូនតូចៗរបស់ខ្លួនទាំងបួននាក់ទៅតាមខ្លួន។ គាត់ទុកឱ្យកូនច្បងអាយុដប់ឆ្នាំមើលប្អូនពៅរបស់ខ្លួនអាយុ៩ខែ។ ចំណែកស្ត្រីជាម្ដាយ និងកូនៗ២នាក់ទៀតដើរលក់នំតាមផ្លូវ។
ស្ត្រីជាម្ដាយប្រាប់ថាមុនពេលកើតហេតុ ខ្លួនផ្ញើកូនទាំង២នឹងអ្នកលក់ជិតនោះឱ្យជួយមើលកូនឱ្យខ្លួនផង។ ចំណែកខ្លួនដើរទៅលក់នៅឆ្ងាយពីនោះតែបន្តិចទេ។ គ្រាន់តែ១ភ្លែតសោះ កូនទាំង២ក៏បាត់ដំណឹងសូន្យឈឹង។ បន្ទាប់ពីស្វែងរកជាច្រើនថ្ងៃ សមត្ថកិច្ចក៏កំណត់មុខសញ្ញាបាន និងចាប់ខ្លួនស្ត្រីឈ្មោះវីនៅថ្ងៃទី៩ ខែមេសា។ ក្មេងៗទាំង២នាក់ក៏ត្រូវបានជួយសង្គ្រោះនៅក្នុងពេលនោះផងដែរ។ សមត្ថកិច្ចស្នើសុំឱ្យអាជ្ញាធរអាមេរិកចាប់ខ្លួនបុរសឈ្មោះរីឆាតបញ្ជូនទៅវៀតណាមដើម្បីកាត់ទោស៕
ចែករំលែកព័តមាននេះ