ទីក្រុងបាងកក៖ លោកអនុទីនដែលជារដ្ឋមន្ត្រីមហាផ្ទៃ ឧបនាយករដ្ឋមន្ត្រី និងជាប្រធានគណបក្សភូមិចៃថៃបានចេញមុខបដិសេធពាក្យចចាមអារ៉ាមដែលថាលោកអាចនឹងឡើងកាន់តំណែងជានាយករដ្ឋមន្ត្រីថៃនាពេលដ៏ខ្លីខាងមុខនេះបើសិនលោកសេដ្ឋា ថាក់វិស៊ីន ដែលជានាយករដ្ឋមន្ត្រីថៃបច្ចុប្បន្ននេះ និងដែលកំពុងតែប្រឈមនឹងការប្ដឹងផ្ដល់នៅតុលាការនោះត្រូវតុលាការធម្មនុញ្ញសម្រេចដកតំណែងរបស់លោក។
លោកសេដ្ឋាត្រូវសមាជិកព្រឹទ្ធសភារបស់ក្រុមយោធាដាក់ពាក្យប្ដឹងលោកពីបទតែងតាំងលោកពិចិត្រដែលពួកគេចាត់ទុកថាជាមនុស្សគ្មានលក្ខណៈសម្បត្តិគ្រប់គ្រាន់ឱ្យកាន់តំណែងជារដ្ឋមន្ត្រីទីស្ដីការគណៈរដ្ឋមន្ត្រី។ តុលាការនឹងចេញសេចក្ដីសម្រេចនៅថ្ងៃទី១៤ ខែសីហា។ នេះជាសេចក្ដីសម្រេចបិទផ្លូវតវ៉ា ដូច្នេះ មិនអាចដាក់ពាក្យប្ដឹងទៅតុលាការជាបន្តទៀតទេ។
លោកអនុទីនថ្លែងថាបើសិនលោកស្រវាយកតំណែងនាយករដ្ឋមន្ត្រីថៃដូចពាក្យចចាមអារ៉ាមបាននិយាយមែននោះហាក់ដូចជាអាក្រក់មើលខ្លាំងណាស់។ សូម្បីតែលោកខ្លួនឯងក៏មិនជឿថារឿងនេះអាចនឹងកើតមាននោះដែរ។ គេគិតថាពាក្យចចាមអារ៉ាមនេះទំនងជាកើតឡើងក្រោយពេលបែកធ្លាយរូបថតជាច្រើនសន្លឹកដែលបង្ហាញរូបលោកថាក់ស៊ីនថតជាមួយលោកអនុទីន និងក្រុមគ្រួសាររបស់គាត់កាលពីចុងសប្ដាហ៍កន្លងទៅនេះនៅសួនឧទ្យានជាតិខាវយ៉ៃ។
អ្នកខ្លះគិតថាប្រហែលជាគណបក្សភឿថៃ និងគណបក្សភូមិចៃថៃមានកិច្ចព្រមព្រៀងសម្ងាត់ជាមួយគ្នាហើយមើលទៅ។ បន្ថែមពីលើនេះ គេសង្កេតឃើញថាលោកសេដ្ឋាក៏មិនសូវប្រកាន់គោលជំហរដាច់ខាតតទៅទៀតដែរពាក់ព័ន្ធនឹងការប្រើប្រាស់គ្រឿងញៀនប្រភេទកញ្ឆា។ មានន័យថាកញ្ឆាអាចនឹងអនុញ្ញាតឱ្យប្រើប្រាស់សម្រាប់ការកម្សាន្តនៅប្រទេសថៃ។
សូមជម្រាបថាគណបក្សភឿថៃបានបម្រុងបេក្ខជននាយករដ្ឋមន្ត្រី២នាក់ទៀតបន្ថែមពីលើលោកសេដ្ឋា ថាក់វិស៊ីន។ ម្នាក់គឺលោកស្រីផែថងថានដែលជាកូនស្រីពៅលោកថាក់ស៊ីន និងម្នាក់ទៀតជាគ្រូបង្រៀនច្បាប់។ មានន័យថាបើទុកជាតុលាការធម្មនុញ្ញដកតំណែងលោកសេដ្ឋាក៏ប្រហែលជាកូនស្រីលោកថាក់ស៊ីនឡើងកាន់តំណែងម្ដង។ នេះបើយោងទៅតាមគោលការណ៍របស់គណបក្សនយោបាយ។
ក៏ប៉ុន្តែអ្នកវិភាគយល់ថាបេក្ខជនបម្រុងទាំង២សុទ្ធតែមានចំណុចខ្វះខាតដូចគ្នា។ លោកឆៃកាសឹមជាមនុស្សចាស់ជរា និងមានបញ្ហាសុខភាព។ ចំណែកលោកស្រីផែថងថានមានបទពិសោធតិចតួចណាស់នៅក្នុងវិស័យនយោបាយ។ ម៉្យាងទៀត លោកថាក់ស៊ីនមិនចង់ឱ្យកូនស្រីរូបនេះកាន់តំណែងជានាយករដ្ឋមន្ត្រីនៅពេលនេះទេនាំឱ្យទទួលរងសម្ពាធនយោបាយ។
នៅក្នុងហេតុផលទាំងនេះ គេគិតថាតំណែងនាយករដ្ឋមន្ត្រីអាចនឹងធ្លាក់ទៅបានទៅបេក្ខជនរបស់គណបក្សភូមិចៃថៃដែលជាដៃគូរបស់គណបក្សភឿថៃនៅក្នុងរដ្ឋាភិបាលចម្រុះ។ គណបក្សនេះដាក់លោកអនុទីនជាបេក្ខជននាយករដ្ឋមន្ត្រីរបស់ខ្លួន។ ចំពោះសំណួរថា «តើត្រូវធ្វើយ៉ាងដូចម្ដេចបើគណបក្សភឿថៃមិនអាចរកអ្នកជំនួសលោកសេដ្ឋាបាន?» លោកអនុទីនឆ្លើយតបថាលោកភុំថាម វិឆាយ៉ាឆៃ ដែលជាអ្នកចាត់ចែងកិច្ចការរដ្ឋសព្វថ្ងៃនេះអាចនឹងកាន់តំណែងនាយករដ្ឋមន្ត្រី។
គេដឹងថាលោកថាក់ស៊ីនមានគម្រោងធ្វើដំណើរទៅទីក្រុងឌូបៃដើម្បីពិនិត្យសុខភាព និងព្យាបាលជំងឺ។ ប៉ុន្តែសំណើនេះត្រូវតុលាការជំទាស់។ ចំណែកលិខិតឆ្លងដែនរបស់លោកថាក់ស៊ីនកំពុងស្ថិតនៅក្នុងដៃតុលាការរួចជាស្រេច។ លោកអនុទីនបកស្រាយថាការដែលលោកថាក់ស៊ីនចង់ចាកចេញពីប្រទេសថៃនៅក្នុងពេលនេះមិនពាក់ព័ន្ធនឹងការដកតំណែងលោកសេដ្ឋាទេ។ អ្នកខ្លះគិតថាការដែលលោកថាក់ស៊ីនចង់ចេញទៅក្រៅស្រុកមួយគ្រាសិនព្រោះលោកមិនចង់មើលឃើញទិដ្ឋភាពនយោបាយដែលពោរពេញដោយភាពអ័ព្ទអួរដូចសព្វនេះទេ។ នេះបើយោងតាមការផ្សាយរបស់កាសែតបាងកកប៉ុស្តិ៍៕
ចែករំលែកព័តមាននេះ