ទីក្រុងហាណូយ៖ នាយករដ្ឋមន្ត្រីវៀតណាម លោកផាំមិញជិញ បានណែនាំឱ្យក្រសួងការបរទេសវៀតណាមសហការគ្នាជាមួយប្រទេសថៃដើម្បីចូលរួមនៅក្នុងដំណើរការស៊ើបអង្កេតសំណុំរឿងស្លាប់ជនជាតិវៀតណាម៦នាក់នៅក្នុងសណ្ឋាគារទីក្រុងបាងកក។ ការដាក់ចេញវិធានការទាំងនេះសំដៅធានាសិទ្ធិរស់រានមានជីវិតរបស់ពលរដ្ឋវៀតណាមគ្រប់រូប។
![](https://kohsantepheapdaily.com.kh/wp-content/uploads/2024/07/3f1c7840ef1db4afdc028fdc86a6f31d.jpg)
ការចេញបទបញ្ជានេះធ្វើឡើងបន្ទាប់ពីការចេញសារាចរណ៍របស់នាយករដ្ឋមន្ត្រីចុះថ្ងៃទី១៧ ខែកក្កដា ឆ្នាំ២០២៤ពាក់ព័ន្ធនឹងការស្លាប់អ្នកទេសចរជនជាតិវៀតណាមនៅទីក្រុងបាងកក ប្រទេសថៃ។ សារាចរណ៍នោះត្រូវបានវៀតណាមផ្ញើជូនក្រសួងការបរទេសវៀតណាម, ក្រសួងសន្តិសុខសាធារណៈរបស់វៀតណាម និងស្ថានឯកអគ្គរដ្ឋទូតវៀតណាមប្រចាំទីក្រុងបាងកក។
![](https://kohsantepheapdaily.com.kh/wp-content/uploads/2024/07/362447f070f91ad706b5d6bf7452d143-2.jpg)
សមត្ថកិច្ចថៃរកឃើញមនុស្ស៦នាក់ដេកស្លាប់នៅក្នុងបន្ទប់សណ្ឋាគារជាន់ទី៥កាលពីម៉ោង៥:៣០ល្ងាចថ្ងៃអង្គារ។ តាមរយៈវីឌីអូឃ្លីបដែលគេទាញចេញពីកាមេរ៉ាសុវត្ថិភាពរបស់សណ្ឋាគារ គេឃើញថាស្ត្រីរស់នៅបន្ទប់ជាន់ទី៥បានកុម្ម៉ង់អាហារឱ្យបុគ្គលិកលើកដល់មុខបន្ទប់។ បន្ទាប់មក ស្ត្រីនោះបបួលជនរងគ្រោះ៥នាក់ដែលស្នាក់នៅជាន់ទី៧ដើម្បីចុះទៅញ៉ាំអាហារជុំគ្នានៅក្នុងបន្ទប់របស់ខ្លួន។
![](https://kohsantepheapdaily.com.kh/wp-content/uploads/2024/07/5063e4de090835fcd3e7dd9e1d7ac594-2.jpg)
សមត្ថកិច្ចសន្និដ្ឋានថាស្ត្រីរូបនោះទំនងជាបានដាក់ថ្នាំពុលស្យានីត (Cyanide) នៅក្នុងទឹកតែ កាហ្វេ និងបំពង់ទឹកក្ដៅ។ ចំណែកអាហារដែលបុគ្គលិកសណ្ឋាគារលើកទៅឱ្យស្ត្រីនោះដល់ក្នុងបន្ទប់គឺនៅសល់ទាំងអស់ គ្មានបានប៉ះពាល់សូម្បីតែមួយម៉ាត់។ រូបវីឌីអូនៅក្នុងកាមេរ៉ាបង្ហាញថាក្រៅពីអ្នកទាំង៦នោះគឺគ្មានអ្នកដទៃចេញចូលបន្ទប់នោះទេ។
![](https://kohsantepheapdaily.com.kh/wp-content/uploads/2024/07/4de539ababa1525417a7bee3b5bcdb7d-2.jpg)
ឥឡូវនេះ សមត្ថកិច្ចសន្និដ្ឋានជំហានដំបូងថាប្រហែលជានារីនោះជាមេគំនិតដាក់ថ្នាំពុលសម្លាប់មនុស្ស៥នាក់ ហើយក៏ផឹកថ្នាំពុលសម្លាប់ខ្លួនឯងតាមក្រោយ។ អ្នកខ្លះដាក់ការសង្ស័យថាជាការធ្វើអត្តឃាតជុំគ្នា។ ប៉ុន្តែទោះបីស្លាប់ក្រោមហេតុផលអ្វីក៏ដោយ គេដឹងច្បាស់ត្រង់ចំណុចមួយថាពួកគេស្លាប់ដោយថ្នាំពុលស្យានីត។ ក្រុមគ្រូពេទ្យនៅសាកលវិទ្យាល័យជូឡាឡុងកនរកឃើញថ្នាំពុលនេះនៅក្នុងខ្លួនសាកសព។
![](https://kohsantepheapdaily.com.kh/wp-content/uploads/2024/07/d5ee9f76da4dbe59a8f7883c592c7392.jpg)
នៅក្នុងបទបញ្ជារបស់នាយករដ្ឋមន្ត្រីវៀតណាម លោកបានណែនាំឱ្យក្រសួងការបរទេសមានបុរេសកម្មក្នុងការស្រាយបញ្ហាតាមមធ្យោបាយការទូតជាមួយប្រទេសថៃ ហើយត្រូវធ្វើបច្ចុប្បន្នភាពព័ត៌មានឱ្យបានទាន់ពេលវេលាជូនអ្នកសារព័ត៌មាន និងសាធារណជនអំពីសភាពការណ៍វិវត្តថ្មីៗ។ ក្រសួងសន្តិសុខសាធារណៈវៀតណាមបានទទួលការចាត់តាំងឱ្យសម្របសម្រួលជាមួយអាជ្ញាធរថៃដើម្បីស៊ើបអង្កេតរឿងនេះ និងចែករំលែកព័ត៌មានពាក់ព័ន្ធនឹងប្រវត្តិគ្រួសាររបស់ជនរងគ្រោះជាមួយក្រសួងការបរទេស។ ធ្វើបែបនេះដើម្បីការពារអាយុជីវិតរបស់ពលរដ្ឋ។
![](https://kohsantepheapdaily.com.kh/wp-content/uploads/2024/07/0cc530fb6c1863c9efbc57c401d7c6e4.jpg)
ឯកអគ្គរដ្ឋទូតវៀតណាមប្រចាំប្រទេសថៃមានភារកិច្ចតាមដានសភាពការណ៍ដោយយកចិត្តទុកដាក់ ក៏ដូចជារាយការណ៍អំពីដំណើរការស៊ើបអង្កេតតើវិវត្តដល់ណាហើយ និងចាត់វិធានការការពារពលរដ្ឋរបស់ខ្លួន។ នៅក្នុងចំណោមវិធានការនោះមានដូចជាការផ្ដល់ការគាំទ្រផ្សេងៗ ការផ្ដល់គោលការណ៍ណែនាំ និងការផ្ដល់ការគាំទ្រចំពោះក្រុមគ្រួសារជនរងគ្រោះ។ វិធានការទាំងនេះត្រូវធ្វើឡើងស្របទៅតាមបទបញ្ជារបស់នាយករដ្ឋមន្ត្រីវៀតណាម លោកផាំមិញជិញ៕
![](https://kohsantepheapdaily.com.kh/wp-content/uploads/2024/07/5dab208cd81d5ff176f9febcfda7cfd2.jpg)
ចែករំលែកព័តមាននេះ