ទីក្រុងម៉ូស្គូ៖ ទីភ្នាក់ងារស៊ើបការណ៍សម្ងាត់របស់រុស្ស៊ី អែហ្វអែសប៊ី (FSB) ថ្លែងថាជនជាតិបារាំងម្នាក់ដែលត្រូវចាប់ខ្លួនកាលពីខែមិថុនានោះបានប្រមូលព័ត៌មានសម្ងាត់របស់រុស្ស៊ីដែលអាចបានជាប្រយោជន៍សម្រាប់ក្រុមស៊ើបការណ៍បរទេស។ ទង្វើនេះត្រូវរុស្ស៊ីចាត់ទុកថាធ្វើឱ្យអន្តរាយចំពោះខ្លួន។ លោកឡូរ៉ង់ (Laurent Vinatier) ត្រូវចាប់ខ្លួនជាមួយជនជាតិស្វីសម្នាក់កាលពីខែមិថុនា ហើយជាប់ចោទពីបទធ្វើខុសនឹងច្បាប់ប្រឆាំងនឹងទីភ្នាក់ងារចារកម្មបរទេស។
អែហ្វអែសប៊ីនិយាយថាលោកឡូរ៉ង់បានប្រមូលព័ត៌មានសម្ងាត់យោធា និងព័ត៌មានបច្ចេកវិទ្យាយោធាពីប្រទេសរុស្ស៊ី។ កាលពីពេលកន្លងមកជនជាតិបរទេសដទៃទៀតក៏ត្រូវអាជ្ញាធររុស្ស៊ីចោទប្រកាន់ស្រដៀងគ្នានេះផងដែរ។ ប៉ុន្តែលើកនេះធ្វើឱ្យក្រុមបស្ចិមប្រទេសព្រួយបារម្ភកាន់តែខ្លាំង។ រុស្ស៊ីមិនទាន់ចោទប្រកាន់លោកឡូរ៉ង់ថាធ្វើការឱ្យទីភ្នាក់ងារស៊ើបការណ៍សម្ងាត់បរទេស ឬពាក់ព័ន្ធដោយផ្ទាល់នៅក្នុងការស៊ើបការណ៍សម្ងាត់ទេ។
ប៉ុន្តែកាលពីពេលមុនៗ ជនជាតិបរទេសច្រើនត្រូវអាជ្ញាធររុស្ស៊ីចាប់ខ្លួនជាមុនសិនដោយចោទប្រកាន់ត្រឹមបទធ្វើខុសនឹងច្បាប់ស្ដីពីការប្រឆាំងនឹងភ្នាក់ងារបរទេស។ បន្ទាប់មកចោទប្រកាន់លើច្រើនករណីទៀតដែលមានស្ថានទម្ងន់ទោស។ នៅក្នុងសេចក្ដីថ្លែងការណ៍ដាច់ដោយឡែក១ទៀត គណៈកម្មការស៊ើបអង្កេតរបស់រុស្ស៊ីថ្លែងថាលោកឡូរ៉ង់បានទទួលស្គាល់ទោសកំហុសរបស់ខ្លួនរួចហើយ។ គាត់ប្រឈមនឹងការជាប់ពន្ធនាគារ៥ឆ្នាំបន្ទាប់ពីសូមអភ័យទោសនៅក្នុងតុលាការ។
អែហ្វអែសប៊ីនិយាយនៅថ្ងៃពុធថាខ្លួនមានខ្សែអាត់សំឡេងជួបគ្នាសម្ងាត់រវាងលោកឡូរ៉ង់ និងជនជាតិរុស្ស៊ីមួយចំនួន។ នៅក្នុងសំឡេងនោះ មានភស្តុតាងបង្ហាញថាគាត់កំពុងប្រមូលព័ត៌មានសម្ងាត់យោធា។ ក្រោមច្បាប់របស់រុស្ស៊ី អ្នកដែលប្រមូល, រាយការណ៍ ឬចែករំលែកព័ត៌មានសម្ងាត់ពាក់ព័ន្ធនឹងយោធា ឬវិស័យសន្តិសុខជាតិត្រូវចាត់ទុកជាភ្នាក់ងាររបស់បរទេស៕
ចែករំលែកព័តមាននេះ