ទីក្រុងសេអ៊ូល៖ មានហេតុការណ៍ដ៏គួរឱ្យភ្ញាក់ផ្អើល និងដ៏រន្ធត់១កើតឡើងនៅកណ្ដាលរដ្ឋធានីសេអ៊ូល ប្រទេសកូរ៉េខាងត្បូង កាលពីយប់មិញនៅពេលរថយន្ត១គ្រឿងមិនដឹងជាយ៉ាងម៉េចនៅសុខៗស្រាប់តែបើកទៅបុករះអ្នកថ្មើរជើងនៅជិតសាលាក្រុងសេអ៊ូលតែម្ដង។ គេដឹងថាមនុស្សយ៉ាងតិច៩នាក់បានស្លាប់ និងមនុស្ស៤នាក់ទៀតរងរបួស។ នៅក្នុងចំណោមនោះ ជនរងគ្រោះ៦នាក់ស្លាប់ភ្លាមៗនៅនឹងកន្លែងកើតហេតុ។ ចំណែក៣នាក់ទៀតបញ្ជូនទៅសង្គ្រោះបន្ទាន់នៅមន្ទីរពេទ្យមិនបានប៉ុន្មានផងក៏បានស្លាប់ជាបន្តបន្ទាប់។ នេះបើយោងតាមការរៀបរាប់របស់សាក្សីដែលឃើញហេតុការណ៍ផ្ទាល់ភ្នែក។
ទីភ្នាក់ងារព័ត៌មានយុនហាប់ផ្សាយថាអ្នកបើករថយន្តបង្កជាបុរសវ័យ៦៨ឆ្នាំ។ គាត់បើកឡានបញ្ច្រាសទិស ហើយជ្រុលទៅបុករថយន្ត២គ្រឿង។ បន្ទាប់មកជ្រុលទៅបុករះអ្នកថ្មើរជើងតែម្ដង។ សមត្ថកិច្ចចាប់ខ្លួនជនបង្កបានហើយ ហើយកំពុងសាកសួរ។ គេក៏ចង់ដឹងផងដែរថាតើគាត់បើកបរក្រោមឥទ្ធិពលគ្រឿងញៀន ឬគ្រឿងស្រវឹងដែរឬទេ។ ចំណុច១ទៀត គេនឹងស៊ើបអង្កេតចង់ដឹងថាតើការជ្រុលចង្កូតទៅប៉ះពាររថយន្តអ្នកដទៃ និងជ្រុលទៅបុកមនុស្សស្រស់ៗបែបនេះបណ្ដាលមកពីការជាន់ហ្គែច្រឡំ ឬយ៉ាងណា? ទាំងនេះសុទ្ធតែជាមូលដ្ឋាននៃការវិនិច្ឆ័យពីធាតុផ្សំ និងការកំណត់ទោសទណ្ឌចំពោះជនបង្ក។
ប្រភពខ្លះឱ្យដឹងថារថយន្តបង្កបានបើកទៅបុករថយន្ត២គ្រឿងយ៉ាងពេញទំហឹង។ រួចក៏បង្ហួសដំណើរទៅបុកអ្នកថ្មើរជើងដែលកំពុងឈរមួយកន្លែងនៅកន្លែងភ្លើងស្តុបដើម្បីត្រៀមដើរឆ្លងផ្លូវនៅលើបន្ទាត់ឆ្នូតសម្រាប់អ្នកដំណើរឆ្លងកាត់។ យោងតាមគេហទំព័ររបស់ទូរទស្សន៍ប៊ីប៊ីស៊ី (BBC) ហេតុការណ៍នេះកើតឡើងនៅម៉ោង៩:៣០យប់ថ្ងៃចន្ទ។ អ្នកបើកបររថយន្តបង្កប្រាប់ថាគាត់បើកឡានសុខៗ។ ប៉ុន្តែមិនដឹងយ៉ាងម៉េចស្រាប់តែឡានរបស់គាត់បង្កើនល្បឿនស្ទុះទៅមុខយ៉ាងលឿន១រំពេចធ្វើឱ្យគាត់បាត់ម្ចាស់ការទាំងស្រុង។
យោងតាមការស្រាវជ្រាវថយក្រោយរបស់សមត្ថកិច្ច, រថយន្តបង្កនោះបានបើកចេញពីសណ្ឋាគារវេសស្ទីន ឆូស៊ុន ហូថែល (Westin Chosun Hotel) ដែលស្ថិតនៅក្បែរសាលាក្រុងសេអ៊ូល។ ចេញដំណើរនៅម៉ោង៩:២៧នាទី បើកបរបានពីរបីនាទីប៉ុណ្ណោះក៏ជួបនឹងហេតុការណ៍នេះតែម្ដងនៅម៉ោង៩:៣០យប់។ អ្នកបើកបររូបនេះបាននិយាយប្រកែកថាខ្លួនមិនបានប្រើប្រាស់សារធាតុអ្វីទាំងអស់។ ប៉ុន្តែនេះជារឿងចៃដន្យតែប៉ុណ្ណោះ។ នៅពេលគាត់បើកបរសុខៗស្រាប់តែរថយន្តនេះបង្កើនល្បឿនស្ទុះទៅមុខដោយខ្លួនឯងធ្វើឱ្យគាត់បាត់ម្ចាស់ការទាំងស្រុងមិនដឹងថាត្រូវបញ្ឈប់សកម្មភាពរបស់វាដោយវិធីណា។
ហេតុការណ៍នេះកើតឡើងនៅតំបន់កណ្ដាលក្រុង និងកើតឡើងចំពេលដែលមនុស្សកំពុងធ្វើដំណើរកកកុញ។ ហេតុនេះធ្វើឱ្យមានមនុស្សស្លាប់ច្រើន។ សាក្សីខ្លះនិយាយថារថយន្តបង្កនោះមុនដំបូងបានបើកលឿនស្លេវទៅបុករថយន្តអ្នកដទៃជាច្រើនគ្រឿង។ បន្ទាប់មកបើកទៅបុកអ្នកថ្មើរជើងដែលឈរស្ងៀមនៅកន្លែងភ្លើងស្តុប។ បន្ទាប់ពីបើកបុកស្លាប់មនុស្សមិនចេះតិចនាក់ហើយ, រថយន្តនេះនៅតែបន្តដំណើរទៅមុខប្រហែល១រយម៉ែត្រទើបឈប់ស្ងៀម។
មិនយូរប៉ុន្មាន រថយន្តសង្គ្រោះ៣៧គ្រឿង និងបុគ្គលិក១៣៤នាក់បានចុះទៅកន្លែងកើតហេតុ។ អ្នកដែលសន្លប់ស្ដូកស្ដឹងត្រូវគេដាក់ឧបករណ៍ឆក់បេះដូង។ ប្រភពខ្លះអះអាងថាជនរងគ្រោះទាំងរបួស និងស្លាប់សុទ្ធតែជាបុរសទាំងអស់។ ក្នុងនោះ ៤នាក់អាយុជាង៥០ឆ្នាំ, ៤នាក់អាយុជាង៣០ឆ្នាំ និងម្នាក់អាយុជាង៤០ឆ្នាំ។ ដំណឹងនេះបានលេចឮទៅដល់ប្រធានាធិបតីកូរ៉េខាងត្បូង លោកយូនស៊ុកយូល។ លោកបានណែនាំទៅរដ្ឋមន្ត្រីមហាផ្ទៃ និងសុវត្ថិភាព លោកលីសាងមីន (Lee Sang-min) ដើម្បីខិតខំជួយសង្គ្រោះអាយុជីវិតរបស់មនុស្ស និងព្យាបាលមុខរបួសរបស់ពួកគេរហូតដល់ជាសះស្បើយឡើងវិញ៕
ចែករំលែកព័តមាននេះ