រាជធានីភ្នំពេញ ៖ ដំណឹងដ៏សោកសៅតារាកំប្លែងស្ងួត នាយ ស្វិត បានទទួលមរណភាពហើយនៅថ្ងៃទី២៧ ខែមករា នេះ ដោយជំងឺ បន្ទាប់ពីលោកត្រូវបានក្រុមគ្រួសារបញ្ជូននៅមន្ទីរពេទ្យសង្គ្រោះបន្ទាន់អស់រយៈប៉ុន្មានសប្តាហ៍មកនេះ ។
ដំណឹងពីមរណភាពរបស់តារាកំប្លែងរូបនេះ ត្រូវបានផ្សព្វផ្សាយនៅលើបណ្តាញសង្គមពីសំណាក់តារាកំប្លែងនាយ ខ្ចៅ ដែលត្រូវជាកូននាយ ខ្ជឹប ដៃគូសម្តែងរបស់នាយស្វិត ។ នាយ ខ្ចៅ បានបង្ហោះសារដោយភ្ជាប់ជាមួយនឹងរូបភាពនាយ ស្វិត ថា លឿនពេកហើយលោកគ្រូស្វិត ជីវិតមនុស្សខ្លីណាស់លោកអើយ សូមដួងវិញ្ញាណខន្ធលោកគ្រូទៅកើតទីឋានសុគតិភពផងចុះ។
ជាការកត់សម្គាល់មុនមរណភាពនាយស្វិត នេះកន្លងមកតារាកំប្លែងជើងចាស់ នាយ ក្រឹម ធ្លាប់បានប្រកាសនៅលើបណ្តាញសង្គមថា ខ្ញុំបាទ នាយក្រឹម ជាប្រធានក្រុមកំប្លែង ប្រចាំក្រុមគ្រូពេទ្យស្មគ្រ័ចិត្ត យុវជនសម្តេចតេជោ សូមគោរពថ្លែងអំណរគុណយ៉ាងជ្រាលជ្រៅចំពោះ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមន្នី ព្រមទាំងក្រុមគ្រូពេទ្យ#TYDA ទាំងអស់ ដែលបានយកចិត្តទុកដាក់ ព្យាបាលជំងឺប្រកបដោយវិជ្ជាជីវ: ដល់តារាកំប្លែងនាយស្វិត ដែលមានជំងឺប្រចាំកាយសម្រាកនៅមន្ទីរពេទ្យដោយមិនគិតថវិកា និងបានឧបត្ថមការចំណាយបន្ថែមផ្សេងៗជាច្រើនទៀត ដល់តារាកំប្លែងនាយស្វិត ។
លោកបញ្ជាក់ថា នាយស្វិតបានសំរាកព្យាបាលនៅមន្ទីរពេទ្យលោកសង្ឃ ដោយគាត់មានជំងឺទឹកនោមផ្អែម ខូចក្រលៀន ត្រូវលាងឈាមជាប្រចាំ។ យ៉ាងណាដំណឹងមរណភាពរបស់នាយ ស្វិត នាពេលនេះបានធ្វើអោយទស្សនិកជន ជាពិសេសបណ្តាអ្នកគាំទ្របាននាំគ្នាចូលរួមសោកស្តាយ និងរំលែកទុក្ខទៅកាន់ក្រុមគ្រួសារ ខណះពេលមរណភាពរបស់នាយ ស្វិត នាពេលនេះគឺជាការបាត់បង់ធនធានអ្នកសិល្បះមួយដ៏ល្អដែលធ្លាប់បម្រើអារម្មណ៍ទស្សនិកជនអោយបានសើចសប្បាយ ។
គួរបញ្ជាក់ថា នាយស្វិត ជាយស្វិត ររ មានឈ្មោះដើមឈឿន រិទ្ធី ស្រុកកំណើតនៅស្រុកឯកភ្នំ ខេត្តបាត់ដំបង ។ នាយមានបងប្អូនចំនួន៦នាក់ ប្រុស៣ ស្រី៣ ក្នុងនោះនាយជាកូនទី៣ ។ បងប្អូនទាំង៦នាក់របស់នាយសុទ្ធតែជាអ្នកសិល្បៈ ដោយសារតែពូជពង្សវង្សត្រកូលជាអ្នកសិល្បៈល្ខោនបាសាក់តាំងពីដូនតាមក ។
នាយស្វិតបានចាប់អាជីពសិល្បៈល្ខោនបាសាក់តាំងពីទសវត្ស៨០មកម្ល៉េះ ។ ពីតូចនាយលេងជាតួអង្គកុមារ តែឥឡូវចាប់ជំនាញជាតួកំប្លែង ។ ការចេះលេងកំប្លែងនេះដោយសារតែនាយរៀនពីនាយវ៉ាំងដឺ ដែលធ្លាប់សម្តែងឱ្យក្រុមល្ខោនម្តាយរបស់លោក ។ នៅឆ្នាំ២០០១ នាយស្វិត បានមកនៅភ្នំពេញ ជាមួយនាយវ៉ាំងដឺ ហើយតែងតែជូនវ៉ាំងដឺ ទៅលេងកំប្លែងតាមហាង តែនាយមិនទាន់ហ៊ានសម្តែងទេ ព្រោះមិនទាន់ទុកចិត្ត ។
លុះនាយវ៉ាំងដឺ ចែកឋានទៅ នាយចាបចៀន នាយក្រឹម និងអ្នកនាងខាត់ សុឃីម ជាដើម ជួយពន្យល់ណែនាំនាយឱ្យចេះលេងកំប្លែង ព្រោះមើលឃើញនាយមាននិស្ស័យកំប្លែង ។ អ្នកទាំងនោះបើកឱកាសឱ្យនាយសម្តែង ហើយមានគេស្គាល់មកទល់នឹងពេលនេះ ៕
ចែករំលែកព័តមាននេះ