រាត្រីថ្ងៃ១៥កើត ពេញបរមី ខែកត្តិក ឆ្នាំថោះ ត្រូវនឹងថ្ងៃទី២៧ ខែវិច្ឆិកា ឆ្នាំ២០២៣ ស្របពេលដែលប្រជាពលរដ្ឋកំពុងតែសប្បាយរីករាយក្នុងព្រះរាជពិធីបុណ្យអុំទូក
ខេត្តពោធិ៍សាត់ ៖ រាត្រីថ្ងៃ១៥កើត ពេញបរមី ខែកត្តិក ឆ្នាំថោះ ត្រូវនឹងថ្ងៃទី២៧ ខែវិច្ឆិកា ឆ្នាំ២០២៣ ស្របពេលដែលប្រជាពលរដ្ឋកំពុងតែសប្បាយរីករាយក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកនៅរាជធានីភ្នំពេញ។
ដោយឡែកនៅខេត្តពោធិ៍សាត់ឯណេះវិញ ក៏មានការរៀបចំពិធីនេះផងដែរ ដែលបានប្រារព្ធធ្វើឡើងនៅលើបុរីវប្បធម៌កោះសំពៅមាស ជាបេះដូងនៃខេត្តពោធិ៍សាត់ ដោយមានការនិមន្ត និងអញ្ជើញចូលរួមពីព្រះមេគណខេត្តទាំងពីរគណៈ, លោក ម៉ក់ រ៉ា ប្រធានក្រុមប្រឹក្សាខេត្ត, លោក ខូយ រីដា អភិបាលនៃគណៈអភិបាលខេត្តនិងលោកជំទាវ ព្រមទាំងមន្ត្រីរាជការ និងប្រជាពលរដ្ឋសរុបប្រមាណជាង១ម៉ឺននាក់។
នៅតាមដងផ្លូវក្នុងទីប្រជុំជនក្រុងពោធិ៍សាត់ តាមសួនច្បារ លើកោះសំពៅមាស និងលើស្ពានថ្ម មានការតុបតែងភ្លើងពណ៌ចម្រុះគ្រប់ពណ៌ និងមានការពង្រាយកម្លាំងសមត្ថកិច្ចជាច្រើននាក់ ដើម្បីរឹតបន្តឹងសន្តិសុខ និងសុវត្ថិភាពជូនបងប្អូនប្រជាពលរដ្ឋ ព្រមទាំងភ្ញៀវទេសចរដែលបានមកលេងកម្សាន្ត។
ចំពោះគ្រឿងរន្ដាប់សំខាន់ៗដែលគេយកមកប្រើក្នុងពិធីអកអំបុកនេះ រួមមាន ៖ អំបុក ចេកទុំ ដូងខ្ចី ផ្កាភ្ញី រួមទាំងគ្រឿងសក្ការៈបូជាមួយចំនូនទៀត ។ ពិធីអកអំបុក សំពះព្រះខែ និងបណ្ដែតប្រទីប នៅខេត្តពោធិ៍សាត់ បានដំណើរការទៅតាមការគ្រោងទុក តាមទំនៀមទំលាប់ព្រះពុទ្ធសាសនាផង និងព្រហ្មញ្ញសាសនាផង ដោយមានសម្រក់ទៀនសម្គាល់ក្រុងស្រុកទាំង០៧របស់ខេត្តពោធិ៍សាត់ ដើម្បីបង្ហាញពីភោគផលដាំដុះ និងការរីចម្រើនលើគ្រប់វិស័យរបស់ប្រជាកសិករ ជាពិសេសវិស័យកសិកម្ម។ កម្មវិធីនេះមានការប្រគំតន្ត្រី បទចម្រៀងទាក់ទងទៅនឹងបុណ្យអុំទូក របាំជូនពរ របាំទូកងនារី និងរបាំប្រមូលផលជាដើម ដែលសម្ដែងដោយក្រុមសិល្បៈ របស់មន្ទីរវប្បធម៌និងវិចិត្រសិល្បៈខេត្តពោធិ៍សាត់។
មិនត្រឹមតែប៉ុណ្ណោះ គណៈអធិបតីបានចែកអំបុក និងចេកទុំ ជូនដល់បងប្អូនប្រជាពលរដ្ឋ និងភ្ញៀវទេសចរ ព្រមទាំងមានការបា.ញ់កាំជ្រួចក្នុងពេលអកអំបុក បណ្ដែតប្រទីប ព្រមទាំងបង្ហោះគោម ស្រែកហ៊ោកញ្ច្រៀវយ៉ាងសប្បាយរីករាយក្រៃលែង។
បើតាមតាមរបាយការណ៍ពីមន្ទីរទេសចរណ៍ខេត្ត បានឲ្យដឹងថា ពិធីអកអំបុក សំពះព្រះខែ និងបណ្ដែតប្រទីប នៅខេត្តពោធិ៍សាត់នារាត្រីថ្ងៃពេញបូរមីណ៍នេះ មានភ្ញៀវទេសចរចូលរួមសរុបប្រមាណ ១៤.៦០៧នាក់ ក្នុងនោះបរទេស០៧នាក់។
ហើយប្រជាពលរដ្ឋខេត្តពោធិ៍សាត់ បានកោតសរសើរដោយស្មោះចំពោះលោក ខូយ រីដា ដែលចាប់តាំងពីលោកឡើងកាន់តំណែងជាអភិបាលនៃគណៈអភិបាលខេត្តមក លោកមានភាពឈ្លាសវៃក្នុងការដឹកនាំ ធ្វើឲ្យខេត្តប្រែមុខមាត់ថ្មីជាបន្តបន្ទាប់ ព្រមទាំងមានប្រជាប្រិយភាព ធ្វើឲ្យប្រជាពលរដ្ឋគោរពស្រលាញ់គ្រប់គ្នា៕
ចែករំលែកព័តមាននេះ