អភិបាលស្រុកឯកភ្នំ លោក ម៉ិល សុផល រួមនឹងមន្ត្រីពាក់ព័ន្ធមួយចំនួនទៀត ត្រូវបានពលរដ្ឋរបស់ខ្លួនចង្អុលចំៗថា បានឃុ.បឃិ.តគ្នាផ្ដល់សិទ្ធិឲ្យថៅកែលក់ម៉ូតូម្នាក់ សាងសង់សំណង់រំលោ.ភយកដីចំណីស្ទឹងសង្កែទាំងគ្មានច្បាប់
ខេត្តបាត់ដំបង ៖ អភិបាលស្រុកឯកភ្នំ លោក ម៉ិល សុផល រួមនឹងមន្ត្រីពាក់ព័ន្ធមួយចំនួនទៀត ត្រូវបានពលរដ្ឋរបស់ខ្លួនចង្អុលចំៗថា បានឃុ.បឃិ.តគ្នាផ្ដល់សិទ្ធិឲ្យថៅកែលក់ម៉ូតូម្នាក់ សាងសង់សំណង់រំលោ.ភយកដីចំណីស្ទឹងសង្កែទាំងគ្មានច្បាប់ នៅចំណុចភូមិខ្វិត ស្ថិតក្នុងឃុំព្រែកខ្ពប ស្រុកឯកភ្នំ ជាថ្នូរនឹងផលលាភ ខណៈការឆ្លើយបំភ្លឺរបស់លោកជាច្រើនលើកជាមួយអ្នកសារព័ត៌មាន គឺជាការបំភ្លឺភូតកុហកមហាជន។
សំណង់ធ្វើអំពីដែកលើ និងរៀបចាត់បេតុខាងក្រោមយ៉ាងរឹងមាំ រំលោ.ភយដីចំណីស្ទឹងសង្កែខាងលើនេះ ជាកម្មសិទ្ធិរបស់ឈ្មោះ តាន់ ប៊ុនធុល ម្ចាស់ហាងលក់-ទិញម៉ូតូ «គឹម អេង» ស្ថិតនៅក្នុងភូមិខ្វិត ឃុំព្រែកខ្ពប ស្រុកឯកភ្នំ។
លោក ម៉ិល សុផល ធ្លាប់បានបំភ្លឺប្រាប់កោះសន្តិភាព ក៏ដូចជាអ្នកសារព័ត៌មានដទៃទៀត ក្នុងចម្លើយភូតកុហកដដែលថា «សំណង់របស់ថៅកែលក់ម៉ូតូឈ្មោះ តាន់ ប៊ុនថុល ខាងលើនេះគ្មានច្បាប់អនុញ្ញាតទេ។ សំណង់នេះ បានសាងសង់រំលោ.ភយកដីចំណីស្ទឹងទាំងស្រុងតែម្ដង»។
លោកចៅហ្វាយស្រុក បានបញ្ជាក់ម្ដងហើយម្ដងទៀតថា «លោកធ្លាប់បានចេញលិខិតឲ្យម្ចាស់សំណង់នេះ បញ្ឈប់ការសាងសង់ ហើយថែមទាំងបញ្ជាឲ្យអាជ្ញាធរមូលដ្ឋានកោះហៅក្រុមជាង និងម្ចាស់សំណង់ឲ្យធ្វើកិច្ចសន្យាទៀតផង»។
ក្រោយការបំភ្លឺបែបភូតកុហករបស់លោកចៅហ្វាយស្រុកខាងលើនេះ និងបន្ទាប់ពីមានក្រុមអ្នកសារព័ត៌មានយកទៅផ្សាយបង្អើលមួយប្រាវ ស្រាប់តែគេឃើញក្រុមជាងបានផ្អាកធ្វើសកម្មភាព និងនាំគ្នាប្រមូលសម្ភារៈចេញពីការដ្ឋានសំណង់។ ប៉ុន្តែមិនទាន់បានប៉ុន្មានថ្ងៃផង គេក៏ឃើញក្រុមជាងទាំងនោះ ដឹកសម្ភារៈចូលធ្វើសកម្មភាពសាងសង់ស្ងាត់ៗវិញដដែល។ នេះបើតាមប្រភពពីប្រជាពលរដ្ឋ ដែលតែងតែតាមឃ្លាំមើលការសាងសង់សំណង់ខុសច្បាប់របស់លោកថៅកែ តាន់ ប៊ុនថុល។
ហើយបើគិតត្រឹមថ្ងៃទី០៥ ខែវិច្ឆិកា ឆ្នាំ២០២៣នេះ សំណង់គ្មានច្បាប់ខាងលើនេះ សាងសង់ជិតរួចរាល់ជាស្ថាបពរហើយ ក្រោយសញ្ញាភ្លើងខៀវពីលោកចៅហ្វាយស្រុកឯកភ្នំ និងមន្ត្រីជំនាញ។
ប្រជាពលរដ្ឋបានលើកឡើងថា «មានសំណង់ខុសច្បាប់ ដែលពលរដ្ឋសាងសង់ជាលក្ខណៈតូចតាច ដើម្បីប្រកបរបរលក់ដូរកំប៉ិកកំប៉ុកតាមស្ទឹងដូចគ្នា និងសំណង់លោកថៅកែម៉ូតូខាងលើដែរ តែត្រូវបានលោក ម៉ិល សុផល អភិបាលស្រុកឯកភ្នំ បញ្ជាឲ្យសមត្ថកិច្ច និងអាជ្ញាធរមូលដ្ឋាន ចុះបង្ក្រាបរុះរើអស់គ្មានសល់ គឺ «យុត្តិធម៌ស្មើដូចម្រាមដៃ»។
ពាក់ព័ន្ធនឹងសំណង់ខុសច្បាប់រំលោ.ភដីចំណីស្ទឹងនេះ បើតាមមន្ត្រីមូលដ្ឋានដែលសុំមិនបង្ហាញអត្តសញ្ញាណ ក៏បានទម្លាយរឿងអាស្រូ.វលោកចៅហ្វាយស្រុកឯកភ្នំដែរថា «សំណង់តូចធំ ដែលសាងសង់រំលោ.ភលើដីចំណីស្ទឹង សុទ្ធតែគ្មានច្បាប់អនុញ្ញាតទាំងអស់ ហើយមានច្រើនណាស់សព្វថ្ងៃនេះ។ ប៉ុន្តែលោកចៅហ្វាយស្រុក តែងតែបញ្ជាឲ្យមន្ត្រីជំនាញ ឬសមត្ថកិច្ចចុះទៅពិនិត្យ និងរារាំង រួចហៅម្ចាស់សំណង់ទៅជួបស្ងាត់ៗ ធ្វើជាសួរនាំរកច្បាប់ទម្លាប់ ដែលគេនិយមប្រើពាក្យថា ហៅទៅ «គោះ»។
ផ្ទុយទៅវិញ បើម្ចាស់សំណង់ណា គ្មានសំណែន សំណូកក្រោមតុទេ លោកចៅហ្វាយស្រុករូបនេះ នឹងចេញបញ្ជាឲ្យសមត្ថកិច្ច និងមន្ត្រីមូលដ្ឋាន ចុះទៅរុះរើភ្លាម មិនថា ខ្ទម ឬរោងប្រក់ស្បូវស្អីនោះទេ។
ជាក់ស្ដែងដូចជា សំណង់គ្មានច្បាប់របស់ថៅកែលក់ម៉ូតូនៅផ្សារខ្ពបខាងលើនេះជាដើម ដែលលោកអភិបាកស្រុកឯកភ្នំ អះអាងដដែលៗថា «ជាសំណង់គ្មានច្បាប់ សង់រំលោ.ភលើដីចំណីស្ទឹងសង្កែ» ហើយថែមទាំងបញ្ជាក់ថា «លោកបានចេញលិខិតឲ្យម្ចាស់សំណង់បញ្ឈប់ការសាងសង់ និងបានហៅក្រុមជាងទៅធ្វើកិច្ចសន្យាទៀតផង»។ ប៉ុន្តែផ្ទុយទៅវិញ ម្ចាស់សំណង់នៅតែឲ្យក្រុមជាងធ្វើសកម្មភាព រហូតមកដល់ពេលនេះ គេឃើញសាងសង់ជិតរួចស្ទើរ១០០% ទៅហើយ។
ត្រង់ចំណុចនេះហើយ ដែលមហាជន ក៏ដូចជាមន្ត្រីមួយចំនួននៅក្រោមឱវាទ ដែលបានដឹងពីសម្ដីភូតកុហក បោ.កប្រាស់របស់លោកចៅហ្វាយស្រុកឯកភ្នំ បានដាក់ការសង្ស័យថា «លោក ម៉ិល សុផល និងមន្ត្រីជំនាញរបស់លោកមួយចំនួន អាចទទួលបានផលប្រយោជន៍ក្រោមតុពីម្ចាស់សំណង់នេះ ទើបបិទភ្នែក បិទច្រមុះ បណ្ដោយឲ្យម្ចាស់សំណង់រូបនេះ សាងសង់រហូតរួចរាល់ជាស្ថាបពរ»។
បើតាមប្រភពដដែលនេះ បានបង្ហើបឲ្យដឹងថា «នៅមានរឿងអាស្រូ.វជាច្រើនទៀត ដែលកំពុងចងរឹតនៅពីក្រោយខ្នងលោកអភិបាលស្រុករូបនេះ ដែលរង់ចាំតែម៉ោងផ្ទុះតែប៉ុណ្ណោះ ជាពិសេសរឿងដីធ្លីតែម្ដង»។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព។
ចែករំលែកព័តមាននេះ