រដ្ឋ​ធានី​ឡាប៉ាស់៖ ប្រទេស​បូលីវី​ប្រកាស​ផ្ដាច់​ទូត​ពី​អ៊ីស្រាអែល​​ ​បន្ទាប់​ពី​សម្លឹង​ឃើញ​ថា​អ៊ីស្រាអែល​បន្ត​ទម្លាក់​គ្រាប់​បែក​យ៉ាង​ខ្លាំង​ក្លា​ទៅ​លើ​ជន​ស៊ីវិល​។ បូលីវី​ចោទ​ប្រកាន់ថា​អ៊ីស្រាអែល​កំពុង​ប្រព្រឹត្ត​​​ឧក្រិដ្ឋ​កម្ម​ប្រឆាំង​នឹង​មនុស្ស​ជាតិ​តាម​រយៈ​ការ​វាយ​​ប្រហារ​​ជន​ស៊ីវិល​ប៉ាឡេស្ទីន​នៅ​តំបន់​ហ្កាហ្សា​ស្ទ្រីប​។ អនុ​រដ្ឋ​មន្ត្រី​ការ​បរទេស​បូលីវី លោក​​ហ្វ្រេឌី ម៉ាម៉ានី (Freddy Mamani)​ ថ្លែង​ថាការ​ផ្ដាច់​ទូត​នេះ​​​​ដើម្បី​​ថ្កោល​ទោស​​យុទ្ធ​នា​ការ​យោធា​របស់​អ៊ីស្រាអែល​​ដែល​មាន​ចរិត​​កោង​កាច​ និង​គ្មាន​​សមា​មាត្រ​។

​លោក​បន្ថែម​ថា​បូលីវី​​​អំពាវ​នាវ​ឱ្យ​មាន​បទ​ឈប់​បាញ់​ និង​បញ្ឈប់​ការ​បិទ​ខ្ទប់​​តំបន់​ហ្កាហ្សា​។ ​ការ​បិទ​ខ្ទប់​នេះ​រា​រាំង​ការ​ដឹក​ជញ្ជូន​​​​​​​ស្បៀង​អាហារ ទឹក​ស្អាត និង​​របស់​របរ​ចាំ​បាច់​សម្រាប់​ជីវ​ភាព​រស់​នៅប្រចាំ​ថ្ងៃ​​។ រដ្ឋ​មន្ត្រី​​ស្ដីទី​នៃ​ក្រសួង​ការ​បរទេស​បូលីវី​ថ្លែង​ថា​ការ​រៀប​ចំ​សន្និសីទ​​សារ​ព័ត៌មាន​នេះ​ដើម្បី​បញ្ជាក់​ថា​​​មាន​ការ​ប្រព្រឹត្ត​បទ​​ឧក្រិដ្ឋ​​ប្រឆាំង​នឹង​​ជន​ស៊ីវិល​ប៉ាឡេស្ទីន។​​

ពាក់​ព័ន្ធ​នឹង​បញ្ហា​នេះ, ក្រសួង​ការ​បរទេស​អ៊ីស្រាអែល​មិន​ទាន់​ធ្វើ​អត្ថា​ធិប្បាយ​យ៉ាង​ណា​នៅ​ឡើយ​ទេ​នៅ​ពេល​អ្នក​សារ​ព័ត៌មាន​ព្យាយាម​ទាក់​ទង​ដើម្បី​ស្នើ​សុំ​ការ​ឆ្លើយ​បំភ្លឺ ឬ​ប្រតិកម្ម​ផ្សេង​​ៗ​។ បូលីវី​ជា​ប្រទេស​ដំបូង​ដែល​ប្រកាស​ផ្ដាច់​ទូត​ពី​អ៊ីស្រា​អែល​ដោយ​សារ​សង្គ្រាម​ដែល​កំពុង​ឆាប​ឆេះ​​​នៅ​តំបន់​ហ្កាហ្សា។ ប្រទេ​ស​នេះ​ធ្លាប់​ផ្ដាច់​ទូត​​ម្ដង​​​ហើយ​កាល​ពី​ឆ្នាំ​២០០៩​ដើម្បី​ប្រឆាំង​នឹង​ទង្វើ​របស់​អ៊ីស្រាអែល​នៅ​តំបន់​ហ្កាហ្សា​។​ រហូត​ដល់​ឆ្នាំ​​​២០២០​ទើប​ប្រទេស​នេះ​​​ដាក់​ទំនាក់​ទំនង​​ការ​ទូត​ឡើង​វិញ​។​
​
​​ការ​ផ្ដាច់​ទូត​នេះ​ធ្វើ​ឡើង​​បន្ទាប់​ពី​​អតីត​ប្រធានា​ធិបតី​បូលីវី​ លោក​ម៉ូរ៉ាឡេស (Morales) ដែល​ធ្លាប់​ផ្ដាច់​ទូត​កាល​ពី​ឆ្នាំ​២០០៩​នោះ​បាន​អំពាវ​នាវ​ឱ្យ​ប្រធានាធិបតី​បច្ចុប្បន្ន​ថ្កោល​ទោស​អ៊ីស្រាអែល​ និង​​ចាត់​ទុក​អ៊ីស្រាអែល​​ជា​រដ្ឋ​ភេរវកម្ម​។ កាល​ពី​ថ្ងៃ​ចន្ទ​ ប្រធានាធិបតី​បូលីវី​​​ជួប​ឯក​អគ្គ​រដ្ឋ​ទូត​ប៉ាឡេស្ទីន​ និង​ថ្លែង​​​ថា​បូលីវី​​ប្រឆាំង​​​​​អំពើ​ឧក្រិដ្ឋ​ប្រឆាំង​នឹង​មនុស្ស​ជាតិ​នៅ​តំបន់​ហ្កាហ្សា​។ យើង​គាំទ្រ​សំណើ​របស់​សហ​គមន៍​អន្តរ​ជាតិ​ដែល​ចង់​ធានា​​ការ​ដឹក​ជញ្ជូន​ជំនួយ​មនុស្ស​ធម៌​ស្រប​តាម​ច្បាប់​អន្តរ​ជាតិ​។​ ​

អាជ្ញាធរ​សុខា​ភិ​បាល​នៅ​តំបន់​ហ្កាហ្សា​ថ្លែង​ថា​ការ​ទម្លាក់​គ្រាប់​បែក​របស់​អ៊ីស្រាអែល​រយៈ​ពេល​ជាង​៣​អាទិត្យ​នេះ​បាន​សម្លាប់​មនុស្ស​ជាង​៨៥០០​នាក់​។​ ក្នុ​ងនោះ កុមារ​មាន​ចំនួន​​ជាង​៣​ពាន់​នាក់​។ អង្គ​ការ​សហ​ប្រជា​ជាតិ​ថ្លែង​ថា​ជន​ស៊ីវិល​ជាង​១លាន​ ៤​សែន​នាក់​នៅ​ក្នុង​ចំណោម​ប្រជា​ជន​សរុប​នៅ​ហ្កាហ្សា​២លាន ៣សែន​នាក់​​ ​ត្រូវ​តែ​បង្ខំ​ចិត្ត​ចាក​ចោល​ផ្ទះ​សម្បែង​របស់​ខ្លួន៕​​

ប្រភព៖ Reuters
https://www.reuters.com/world/americas/bolivia-severs-diplomatic-ties-with-israel-citing-crimes-against-humanity-2023-10-31/