ADផ្ទាំងផ្សព្វផ្សាយពាណិជ្ជកម្ម

Picture

ទំនប់​ប្រឡាយ​បង្ហូរទឹក​ដ៏​សំខាន់​ចូល​អាង​កំពីង​ពួយ​​​កំពុង​តែ​ប្រឈម​បាក់​​ដាច់​​ហើយ

8 ខែ មុន

ខេត្តបាត់ដំបង ៖ ប្រឡាយ​បង្ហូរទឹក​ដ៏​សំខាន់​នៅ​ចំណុច «​អូរ​ស្លា​ប៉ា​ង​» ប៉ែក​ខាងលិច​តំបន់​«​អាង​កំពីងពួយ​» ស្ថិត​ក្នុងស្រុក​បាណ​ន់ កំពុង​ប្រឈម​នឹង​ការ​បាក់​ដាច់​ធ្ងន់ធ្ងរ ដោយសារ​ជំនន់​ទឹកភ្លៀង​នៅ​ប៉ែក​ខាងលើ ហើយ​ត្រូវ​បាន​បើក​បង្ហូរ​ចូល​អាង​កំពីងពួយ ខណៈ​អាជ្ញាធរ​ពុំ​ទាន់​អាច​មាន​វិធាន​ការ​ទប់ទល់​មាន…

ខេត្តបាត់ដំបង ៖ ប្រឡាយ​បង្ហូរទឹក​ដ៏​សំខាន់​នៅ​ចំណុច «​អូរ​ស្លា​ប៉ា​ង​» ប៉ែក​ខាងលិច​តំបន់​«​អាង​កំពីងពួយ​» ស្ថិត​ក្នុងស្រុក​បាណ​ន់ កំពុង​ប្រឈម​នឹង​ការ​បាក់​ដាច់​ធ្ងន់ធ្ងរ ដោយសារ​ជំនន់​ទឹកភ្លៀង​នៅ​ប៉ែក​ខាងលើ ហើយ​ត្រូវ​បាន​បើក​បង្ហូរ​ចូល​អាង​កំពីងពួយ ខណៈ​អាជ្ញាធរ​ពុំ​ទាន់​អាច​មាន​វិធាន​ការ​ទប់ទល់​មាន តែ​បណ្ដែតបណ្ដោយ​តាម​សន្ទុះ​ទឹកតែ​ប៉ុណ្ណោះ ។

ទំនប់​ប្រឡាយ​បង្ហូរទឹក​ដ៏​ធំ​នេះ សាងសង់​ដោយ​មន្ទីរ​ធនធានទឹក​និង​ឧតុនិយម​ខេត្ត បាន​ត​ភ្ជាប់​ពី​សំណង់​ទ្វារ​ទឹក «​អូរ​ដូន​ពៅ​» ស្ថិត​នៅ​ឃុំ​ឃ្លាំង​មាស ស្រុក​ប​វេ​ល ឆ្ពោះទៅ​កាន់ «​អាង​កំពីងពួយ​» ស្ថិត​ក្នុង​ឃុំ​តា​គ្រាម ស្រុក​បាណ​ន់ ។ បើ​តាម​អាជ្ញាធរ​មូលដ្ឋាន​ប្រឡាយ​មេ​ដ៏​មាន​សារសំខាន់​មួយ​ខ្សែ​នេះ សម្រាប់​នាំ​ទឹក​ពី​សំណង់​ទ្វារ​ទឹក «​អូរ​ដូន​ពៅ​» ចូល​ទៅ​ក្នុង​«​អាង​កំពីងពួយ​» ។ ប៉ុន្តែ​នៅ​ពេល​នេះ ទំនប់​អម​ប្រឡាយ​បញ្ជូន​ទឹក​នេះ​មួយ​កន្លែង នៅ​ចំណុច​«​អូរ​ស្លា​ប៉ា​ង​» ស្ថិត​ក្នុង ឃុំ​តា​គ្រាម ស្រុក​បាណ​ន់ កំពុង​រង​ការ​ខូចខាត​ធ្ងន់ធ្ងរ​ដោយសារ​កម្លាំង​ទឹក​ហូរ​បុក​ផ្ដាច់ ។

អ្នក​ភូមិ​អូរ​ស្លា​ប៉ា​ង​បាន​ប្រាប់​កោះសន្តិភាព កាលពី​ថ្ងៃ​ទី​១៧ កញ្ញា ថា គេ​ឃើញ​មានទឹក​តិច​ទី​ច​នៅ​តាម​វាលស្រែ តែ​ទឹកបាន​ហូរ​បុក​ខ្លាំង​នៅ​ក្នុង​ប្រឡាយ ដែល​ត​ភ្ជាប់​ពី​ទ្វារ​ទឹក​សំណង់ «​អូរ​ដូន​ពៅ​» ហូរ​ចូល​ក្នុង​អាង​កំពីងពួយ ។ ប្រជាពលរដ្ឋ​បាន​និយាយ​ថា ប៉ុន្មាន​ថ្ងៃ​កន្លង​ទៅ​នេះ មន្ត្រី​ជំនាញ​បាន​បើកទ្វារ​ទឹក​សំណង់ «​អូរ​ដូន​ពៅ​» ដើម្បី​នាំ​ទឹក​ចូល​ក្នុង​«​អាង​កំពីងពួយ​» ទើប​ធ្វើ​ឲ្យ​ទឹក​មាន​សន្ទុះ​ខ្លាំង​រហូត​ហូរ​បុក​ផ្ដាច់​ទំនប់​អម​ប្រឡាយ​នៅ​ចំណុច​«​អូរ​ស្លា​ប៉ា​ង​» ។

ពាក់ព័ន្ធ​នឹង​ករណី​នេះ អភិបាលស្រុក​បាណ​ន់ លោក ស្រេង សុខា បាន​ថ្លែងប្រាប់​កោះសន្តិភាព នៅ​ព្រឹក​ថ្ងៃ​ទី​១៨ កញ្ញា ថា ក្រោយ​ទ​ទូល​បាន​ព័ត៌មាន​នេះ កាលពី​ថ្ងៃ​ទី​១៧ កញ្ញា អាជ្ញាធរ​ឃុំ និង​មន្ត្រី​ជំនាញ​បាន​ចុះ​ទៅ​កាន់​កន្លែង​កើតហេតុ (​ទំនប់​ដាច់​) ដើម្បី​ពិនិត្យ​ស្ថានភាព​ទឹក​ជាក់ស្ដែង ។ លោក​ថា បើ​តាម​ការ​ពិនិត្យ​ជាក់ស្ដែង ស្ថានភាព​ទឹក​ហាក់​មាន​សន្ទុះ​ខ្លាំង ដោយសារ​មន្ត្រី​ជំនាញ បើកទ្វារ​ទឹក​សំណង់​អូរ​ដូន​ពៅ ដើម្បី​នាំ​ទឹក​ចូល​ក្នុង​អាង​កំពីងពួយ ។

ដោយឡែក ត្រង់​ចំណុច​ទឹក​បុក​ផ្ដាច់​ទំនប់​វិញ លោក ស្រេង សុខា បាន​ទ​ទូល​ស្គាល់​ថា ពិតជា​ខូចខាត​ធ្ងន់ធ្ងរ​មែន ។ លោក​បាន​ប្រាប់​ថា ប្រឡាយ​ទឹក​នោះ ស្ថិត​ក្រោម​ការ​គ្រប់គ្រង​របស់​មន្ទីរ​ធនធានទឹក និង​ឧតុនិយម​ខេត្ត ។ លោក​ថា បើ​ពិនិត្យ​មើល​ស្ថានភាព​ទឹក គឺ​បាន​ហូរ​កួច​បុក​ផ្ដាច់ ធ្វើ​ឲ្យ​បាក់​ដាច់​ទំនប់​ម្ខាង​។ ប៉ុន្តែ​លោក​បាន​វាយតំលៃ​ថា យ៉ាងណា មិន​ប៉ះពាល់​ដល់​ផលដំណាំ​ពលរដ្ឋ ឬ​ការ​ធ្វើ​ដំណើរ​ឆ្លងកាត់​របស់​ប្រជាពលរដ្ឋ​ទេ ។

ចំពោះ​វិធានការ​ទប់ស្កាត់​វិញ បើ​តាម​លោក​អភិបាលស្រុក​រូប​នេះ​បាន​បញ្ជាក់​ថា ពេល​នេះ យើង​មិន​អាច​ធ្វើ​យ៉ាងណា​បាន​ទេ ដើម្បី​ទប់ស្កាត់​កុំ​ឲ្យ​បាក់​ដី​បន្ត ។ ពីព្រោះ​កម្លាំង​ទឹក​ខ្លាំង ម្យ៉ាង​ដី​បាក់​កាន់តែ​ខ្លាំង​ទៅ​ហើយ បើ​ទោះជា​ត្រូវ​ប្រើប្រាស់​ថ្មយក​ទៅ​ចាក់​ទប់ ក៏​មិន​អាច​ធ្វើ​បាន​ដែរ ។ ដូច្នេះ យើង​ត្រូវ​ទុក​តាម​ដំណើរ​សិន ហើយ​ខាង​មន្ទីរ​ធនធាន​ទឹកនឹង​មាន​វិធានការ​ជួសជុល​ឡើង​វិញ នៅ​ពេល​ក្រោយ​សំខាន់​ពេល​នេះ យើង​ត្រូវការ​នាំ​ទឹក​ចូល​ក្នុង​អាង​កំពីងពួយ​សិន ។

បើ​តាម​ប្រភព​ព័ត៌មាន​ពី​ប្រជាពលរដ្ឋ​នៅ​ព្រឹក​ថ្ងៃ​ទី​១៨ កញ្ញា នេះ បាន​ឲ្យ​ដឹង​ថា កំពស់​ទឹក​នៅ​ក្នុង​ប្រឡាយ​ខាងលើ​នេះ ហាក់​នៅ​ដដែល​មិន​ទាន់​ថមថយ​ទេ ព្រោះ​បើ​តាម​ពិនិត្យ​កំពស់​ទឹក​នៅ​ប៉ែក​ខាងលើ នៃ​ទ្វារ​ទឹក​សំណង់​«​អូរ​ដូន​ពៅ​» នៅ​តែ​មាន​សន្ទុះ​ខ្លាំង​ដដែល ។

មានព័ត៌មានបន្ថែម កោះសន្តិភាព​នឹង​ផ្សាយជូនបន្ត ។

អត្ថបទសរសេរ ដោយ