តារាសម្តែង និងជាថៅកែផលិតកម្ម PR Production អ្នកនាង ព្រំ រដ្ឋា បានទម្លាយរឿងរ៉ាវនៅពីក្រោយ នៃការខាតបង់ទ្រព្យសម្បត្តិ និងកិត្តិយស នៅក្នុងមុខ
រាជធានីភ្នំពេញ ៖ តារាសម្តែង និងជាថៅកែផលិតកម្ម PR Production អ្នកនាង ព្រំ រដ្ឋា បានទម្លាយរឿងរ៉ាវនៅពីក្រោយ នៃការខាតបង់ទ្រព្យសម្បត្តិ និងកិត្តិយស នៅក្នុងមុខជំនួញបើកផលិតកម្មផ្ទាល់ខ្លួនក្នុងរយៈពេល២ឆ្នាំកន្លងមកនេះ។
តារារូបនេះបានបញ្ជាក់ថា មិនត្រឹមតែបាត់បង់ទ្រព្យសម្បត្តិតែប៉ុណ្ណោះទេ ប៉ុន្តែអ្នកនាងស្ទើរតែបាត់បង់អាយុជីវិតថែមទៀតផង ដោយសារតែនាងជួបបញ្ហាចាក់ស្រះលើមុខជំនួញខាងលើនេះ ដោយសារជំងឺកូវីដចាប់ផ្តើមវា.យលុកខ្លាំង។
តាមរយៈសំណេរដែលបង្ហោះនៅលើបណ្តាញសង្គម អ្នកនាង ព្រំ រដ្ឋា បានលើកឡើងថា «រយៈពេល២ឆ្នាំហើយដែលខ្ញុំបានបាត់បង់គ្រប់យ៉ាង កិត្តិយស ការងារ ទ្រព្យសសម្បត្តិ សឹងទាំងជីវិត ដោយការទទួលយកមិនបាន»។ នាងបញ្ជាក់ថា «កូវីដបានបំផ្លាញខ្ញុំ ឆ្នាំ២០១៩ ការចាប់ផ្ដើមកូវីដ ទោះមិនទាន់មកដល់ប្រទេសយើង តែយើងគ្រប់គា្នគឺខ្លាច ការងាររបស់ខ្ញុំចាប់ផ្ដើមជួបបញ្ហា ព្រោះតួមួយចំនួនគាត់ខ្លាច ទោះជាយើងមានវិធីការពារ»។
នាងបន្តថា «ខាង TV ក៏តម្រូវអោយខ្ញុំកាត់សាច់រឿង ព្រោះគាត់ខ្លាចខ្ញុំថតមិនចប់ ព្រោះរឿងកំពុងចាក់ផ្សាយទាំងដែលខ្ញុំថតជិតចប់។ ខ្ញុំចាប់ផ្ដើមខាតបង់ ខ្ញុំតស៊ូធ្វើការងារដែលជាបេះដូងរបស់ខ្ញុំ ទីបំផុតខ្ញុំត្រូវបាត់បង់ការងារមួយនេះនៅចុងឆ្នាំ២០២១។ ខាងអ្នកធ្វើការឲ្យទូរទស្សន៍លើកឡើង ខ្ញុំធ្វើលើសកុងត្រា៥ខែ ត្រូវបញ្ចប់កុងត្រាទាំងដែលប្រទេសត្រូវបិទក្រុង ចុះការខាតបង់របស់ខ្ញុំ ដែលគិតថាចប់កូវីដនឹងប្រឹងប្រែងជាថ្មី។ ខ្ញុំគិតថា មិននិយាយ តែពេលនេះខ្ញុំមានអារម្មណ៍ថា ហេតុអ្វីពេលដែលយើងស្លូតត្រូវគេធ្វើបាបបែបនេះ ? តែយ៉ាងណា ខ្ញុំក៏សូមអគុណប្អូនស្រី Thyda ខាងទូរទស្សន៍ PNN ដែលនៅតែផ្តល់ឱកាស និងខ្វល់ខ្វាយពីសុខទុក្ខខ្ញុំ បានផ្តល់ការងារដល់ខ្ញុំ ។ ខ្ញុំពិតជាចង់ live និយាយរឿងក្នុងចិត្ត និងភាពអយុត្តិធម៌ដែលខ្ញុំជួប បានបៀមទុក្ខ២ឆ្នាំមកនេះណាស់»។
ជាការកត់សម្គាល់ នេះជាលើកទី១ហើយដែលអ្នកនាង ព្រំ រដ្ឋា បានទម្លាយពីរឿងរ៉ាវនៅពីក្រោយការខាតបង់ដ៏ធំនៅលើមុខជំនួញនៃការបើកផលិតកម្មផ្ទាល់ខ្លួន ក្នុងពេលកន្លងទៅ នាងក៏ត្រូវបានតារាមួយចំនួនប្រកាសយ៉ាងជំហរឲ្យអ្នកនាងចេញមុខទូទាត់បំណុលថ្លៃថត និងការជំពាក់ផ្សេងៗទៀតផងដែរ។
គួរបញ្ជាក់ផងដែរថា អ្នកនាង ព្រំ រដ្ឋា ធ្លាប់រៀបអាពាហ៍ពិពាហ៍ជាមួយអាណិកជនម្នាក់នៅសហរដ្ឋអាមេរិកកាលពីអំឡុងឆ្នាំ២០០៣ ហើយក្រោយរៀបការ នាងបានចេញទៅរស់នៅលើទឹកដីសហរដ្ឋអាមេរិកជាមួយស្វាមី រហូតដល់បង្កើតបានកូនស្រីម្នាក់ជាចំណងដៃទៀតផង។ ប៉ុន្តែក្រោយមក គឺនៅអំឡុងឆ្នាំ២០០៩ ចំណងស្នេហ៍នេះត្រូវបានបែកបាក់ទៅវិញ។ ក្រោយពីលែងលះដាច់ស្រេចជាមួយស្វាមី អ្នកនាង ព្រំ រដ្ឋា ក៏បានត្រឡប់មករស់នៅស្រុកខ្មែរវិញ ដោយទុកឲ្យកូនស្រីរស់នៅជាមួយឪពុក។ ពេលត្រឡប់មកស្រុកខ្មែរ នាងបានចាប់យកអាជីពសម្ដែងឡើងវិញ រហូតដល់នាងបានក្លាយជាចាងហ្វាងផលិតកម្មមួយឈ្មោះថា «PR» រហូតមកដល់សព្វថ្ងៃនេះ៕
ចែករំលែកព័តមាននេះ