រាជធានីភ្នំពេញ ៖ មហាជន ជាពិសេសបណ្តាអ្នកលេងបណ្តាញសង្គមបានសម្តែងការភ្ញាក់ផ្អើល បន្ទាប់ពីគេឃើញតារាសម្តែងអ្នកនាង គីម លីហ្សា ទម្លាយរឿងរ៉ាវលែងលះស្វាមីប្រមាណជិត១ឆ្នាំមកហើយ ប៉ុន្តែអ្នកនាងទើបតែប្រកាសជាធារណៈ។
កាលពីពេលថ្មីៗនេះ អ្នកនាង គីម លីហ្សា បានប្រកាសជាសាធារណៈតាមរយៈបណ្តាញសង្គមថា «នាងនិងបុគ្គល គីវ វុឌ្ឍី (ឈ្មោះស្វាមីនាង) មិនជាប់ពាក់ព័ន្ធអ្វីគ្នានោះទេ ព្រោះនាងបានលែងលះអស់រយៈពេលជិត១ឆ្នាំមកហើយ»។
ដោយឡែកពាក់ព័ន្ធការបីបាច់ថែរក្សាកូន២នាក់ ដែលជាតំណក់ឈា.មរួមគ្នានោះ ត្រូវបានអ្នកនាងបញ្ជាក់ថា កាតព្វកិច្ចចិញ្ចឹមកូន គឺនាងជាអ្នករ៉ាប់រងទាំងអស់ ដោយនាងបដិសេធមិនទទួលយកអាហារកិច្ចពីអតីតស្វាមីនាងនោះឡើយ។
ជាងនេះទៅទៀតនោះ ពាក់ព័ន្ធនឹងការលែងលះនាពេលនេះ ត្រូវបានអ្នកនាង គីម លីហ្សា បានបញ្ចេញលិខិតព្រមព្រៀងលែងលះមួយច្បាប់ និងស្នាមផ្តឹតមេដៃជាភស្តុតាង ដោយអមជាមួយនឹងសំណេរខ្លីមួយថា «អស់ឈ្មោះជាប្តីប្រពន្ធយូរហើយ តែខ្ញុំទុកឱកាសអោយក្រែងកែចរិត តែទង្វើនៅដដែល»។
ទោះជាយ៉ាងណា ពាក់ព័ន្ធបញ្ហាខាងលើនេះ គេនៅមិនទាន់ច្បាស់នៅឡើយទេថា តើ អ្នកនាង គីម លីហ្សា និងស្វាមីពិតជាលែងលះគ្នាដោយមិនបកក្រោយឬយ៉ាងណា? ក្នុងពេលដែលអ្នកនាងបានសម្រេចលុបសារដែលនាងបង្ហោះនោះចោលវិញ ក្រោយពេលបញ្ចេញសាធារណៈត្រឹមរយៈពេលខ្លីតែប៉ុណ្ណោះ។ ចំណុចនេះហើយ បានធ្វើអោយមហាជនសម្តែងការសង្ស័យថា រឿងរ៉ាវលែងលះរបស់អ្នកនាង គីម លីហ្សា និងស្វាមី ហាក់នៅស្រពិចស្រពិលនៅឡើយ អាចថា ជាការសម្តែង ឬក៏គ្រាន់តែជាការខឹងគ្នាមួយឆាវ ហើយក៏ផ្សះផ្សារគ្នាវិញ។
យ៉ាងណាចុងក្រោយ អ្នកនាង គីម លីហ្សា ក៏បានព្រលយសារខ្លីថ្មីមួយបង្ហោះលើបណ្តាញសង្គមថា «គ្មានអ្នកណាឆ្កួត យករឿងគ្រួសារឯងមកសម្តែងនោះទេ សមត្ថភាពរកលុយខ្ញុំមានពេញខ្លួន»។
ពាក់ព័ន្ធបញ្ហាខាងលើនេះដែរ កោះសន្តិភាពនៅមិនទាន់អាចស្វែងរកការបកស្រាយពីអ្នកនាង គីម លីហ្សា បាននៅឡើយទេ គិតត្រឹមថ្ងៃទី៤ ខែឧសភា ឆ្នាំ២០២៣នេះ ខណៈពេលដែលការសាកសួរនៅមិនទាន់មានការឆ្លើយតបនៅឡើយ។
ជាការកត់សម្គាល់ អ្នកនាង គីម លីហ្សា បានសម្រេចចូលរោងការជាមួយនឹងលោក គីវ វុឌ្ឍី ដែលជាអាណិកជនខ្មែររស់នៅប្រទេសអូស្ត្រាលី កាលពីអំឡុងចុងឆ្នាំ២០១៣ ក្នុងពេលដែលចំណងអាពាហ៍ពិពាហ៍របស់ពួកគេ រហូតមកទល់នាពេលនេះ គឺបានទទួលចំណងដៃកូន២នាក់ហើយដែរ៕
ចែករំលែកព័តមាននេះ