បើទោះបីជាកន្លងមក តារាកំប្លែងស្រី អ្នកនាង អ៊ីត បានចេញមុខបញ្ជាក់ម្តងហើយ ម្តងទៀត អំពីទំនាក់ទំនងរបស់អ្នកនាង និងលោក អ៊ុក ដារ័ត្ន ថា មិនមែនជាទំនាក់ទំនងស្នេហាស៊ីជម្រៅអ្វីនោះទេ ពោលគឺរូបភាព
រាជធានីភ្នំពេញ ៖ បើទោះបីជាកន្លងមក តារាកំប្លែងស្រី អ្នកនាង អ៊ីត បានចេញមុខបញ្ជាក់ម្តងហើយ ម្តងទៀត អំពីទំនាក់ទំនងរបស់អ្នកនាង និងលោក អ៊ុក ដារ័ត្ន ថា មិនមែនជាទំនាក់ទំនងស្នេហាស៊ីជម្រៅអ្វីនោះទេ ពោលគឺរូបភាពស្និទ្ធស្នាលទាំងអស់នេះ គ្រាន់តែមិត្តរួមអាជីព ក៏ដូចការសម្តែងតែប៉ុណ្ណោះ។
តែរឿងរ៉ាវអាស្រូវស្នេហារបស់អ្នកមេម៉ាយរូបស្រស់ និងកំលោះសង្ហារូបនេះ នៅតែមិនទៅឆ្ងាយពីការវែកញែករបស់មហាជន និងអ្នកគាំទ្រទាល់តែសោះ។ ជាក់ស្តែងថ្មីៗនេះទៀតសោត ខណៈរឿងរ៉ាវដែលលើកឡើងថា លោកកំពុងមានសេ្នហាជាមួយអ្នកនាង អ៊ីត ក៏បានផ្ទុះឡើងជាថ្មី ខណៈតារាប្រុសសង្ហានេះ បានទម្លាយប្រយោគមួយឃ្លាដ៏ចាក់ដោតនិ ងគួរអោយចាប់អារម្មណ៍ថា «ពេលនេះ លោកអាចនឹងកំពុងសន្សំលុយដើម្បីដណ្តឹងកូនគេ»។ ប៉ុន្តែតារារូបនេះ មិនបានបង្ហើបថា ជានរណាអោយច្បាស់នោះទេ ដោយលោកសុំធ្វើការលាក់សិន។
តាមរយៈបទសម្ភាសន៍ជាមួយសារព័ត៌មានកោះសន្តិភាព កំលោះសង្ហាមុខមានមន្តស្នេហ៍ លោក ដារ័ត្ន បានបញ្ជាក់ថា លោកពិតជាកំពុងសន្សំលុយដើម្បីដណ្តឹងមនុស្សដែលលោកស្រលាញ់ពិតមែន។ យ៉ាងណាមិញ លោកក៏បានឆ្លៀតបកស្រាយ និងលាតត្រដាងការពិតនៃទំនាក់ទំនងរបស់លោក និងអ្នកនាង អ៊ីត ច្បាស់ៗថា វាគ្រាន់តែជាទំនាក់ទំនងមិត្តរួមអាជីពសិល្បៈតែប៉ុណ្ណោះ។ ហើយលោកសូមចិត្តមហាជន និងអ្នកគាំទ្រ កុំមានការយល់ច្រឡំថាលោកសាងស្នេហា៍ក្រៅឆាកជាមួយអ្នកនាងអ៊ីត នាំឱ្យប៉ះពាល់ដល់កិត្តិយសរបស់អ្នកនាង។
លោកបានបន្តថា លោកមិនចង់អោយមហាជនយល់ច្រឡំ ឬមានការងឿងឆ្ងល់ និងលើកឡើងម្តងហើយម្តងទៀតចំពោះរឿងអាស្រូវស្នេហានេះ ព្រោះវាកើតមានដូចជាយូរក្រែលដែរហើយ ដោយអូសបន្លាយរយៈ៣ឆ្នាំមកហើយ ទាំងដែលលោក និងអ្នកនាងអ៊ីត អត់មានសេ្នហាជាមួយគ្នាសោះ។
សម្រាប់លោកផ្ទាល់ លោកបញ្ជាក់ថា ទាក់ទងជាមួយទំនាក់ទំនងដ៏ជិតស្និទ្ធជាមួយអ្នកនាងអ៊ីត គ្រាន់ជាមិត្តរួមការងារអាជីពតែប៉ុណ្ណោះ ដោយជាទូទៅលោក និងអ្នកមេម៉ាយកូនមួយរូបនេះ ត្រូវមានការងារសម្តែងជាមួយគ្នាជាច្រើន ដូចជា កាត់សក់ សម្តែងកំប្លែង ច្រៀងតាមរោងការ និងការងារសិល្បៈផ្សេងៗជាច្រើនទៀត។ ដូច្នេះលោកត្រូវសម្តែងអោយសម ត្រូវចេះលេបខាយពាក្យសម្តី ដោយធ្វើយ៉ាងម្តេចអោយមហាជនមើលទៅអោយដូចជាការពិត ហើយអ្វីដែលលោកចង់អោយមហាជនដឹងនោះ លោក និងអ្នកមេម៉ាយរូបស្រស់ គឺគ្រាន់តែមិត្តភក្តិរួមអាជីពតែប៉ុណ្ណោះ។
កំលោះសង្ហាវ័យ៣១ឆ្នាំរូបនេះ បានបន្ថែមថា សម្រាប់ពាក្យចរចាមអារ៉ាមកន្លងមក សម្រាប់លោកមិនអីនោះទេ ព្រោះលោកជាមនុស្សប្រុស តែអ្វីដែលលោកមានការព្រួយបារម្ភនោះ គឺកិត្តិយស កេរ្តិ៍ឈ្មោះរបស់អ្នកនាងអ៊ីត ព្រោះអ្នកនាងជាមនុស្សស្រី ហើយក៏ជាតារាកំប្លែងមួយដួង ដែលមានមហាជនស្គាល់ច្រើន ដូច្នេះសម្រាប់លោក លោកពិតជាមានការព្រួយបារម្ភជាខ្លាំងទាក់ទងជាមួយកិត្តិយស និងកេរ្តិ៍របស់តារារូបនេះ។
លើសពីនេះទៀត លោកបានបន្ថែមថា «ប្រសិនបើលោកស្រឡាញ់អ្នកនាងអ៊ីត មិនដឹងថា អ្នកនាងអ៊ីត យកលោកឬអត់នោះទេ?» ដោយមូលហេតុ អ្នកនាង អ៊ីត ដែលមានស្រុកកំណើតនៅខេត្តកំពង់ស្ពឺរូបនេះ មិនធ្លាប់មានទំនាក់ទំនងស្នេហា ឬភាពស្និទ្ធស្នាលជាមួយនរណានោះឡើយ ក្រោយអ្នកនាងមេម៉ាយប្រហែលជាជិត១០ឆ្នាំមកហើយនោះ។ ចំណែករឿងស្នេហាវិញ គឺថា បេះដូងលោកនៅទំនេរស្អាត ពោលគឺមិនមានទំនាក់ទំនងស្នេហាជាមួយនរណាឡើយ។
តែនៅពេលសាកសួរថា តើទៅថ្ងៃមុខ ទំនាក់ទំនងរបស់លោកជាមួយនឹងអ្នកនាងអ៊ីត អាចប្រែប្រួលដែរឬទេ? អ៊ុក ដារ័ត្ន បានពោលថា បច្ចុប្បន្ននេះ បើនិយាយពីទាក់ទងវិញ គឺរាល់ទំនាក់ទំនងជាមួយអ្នកសិល្បៈ ក៏ដូចជាអ្នកនាងអ៊ីត គ្រាន់តែជាមិត្តរួមអាជីព តែនាពេលអនាគត លោកមិនអាចកំណត់បាននោះទេ។
ងាកមកការងារសិល្បៈរបស់លោកវិញ កំលោះសង្ហា អ៊ុក ដារ័ត្ន បានបន្តថា សព្វថ្ងៃនេះ លោកក៏មានការងារជាច្រើន ក្រោយពីលោកបានចូលសិល្បៈជាលើកដំបូងនៅឆ្នាំ២០១០ ដោយចាប់ផ្តើមការងារជាតារាសម្តែង តារាម៉ូដែល និងការងារសិល្បៈផ្សេងៗជាច្រើនទៀត។ ជាចុងក្រោយ លោក អ៊ុក ដារ័ត្ន បានចង់សំណូមពរអោយមហាជនថា ឈប់មានការយល់ច្រឡំបន្តទៅទៀត ហើយលោកក៏មិនខឹងសម្បារចំពោះបងប្អូនមួយចំនួនដែលកន្លងមក ធ្លាប់បានវា.យតម្លៃពីរឿងរ៉ាវអាស្រូវខាងលើ ដោយលោកចាត់ទុកថា បងប្អូនមិនបានដឹងការពិត ទើបចេះតែលើកឡើងថា លោកមានស្នេហាក្រៅឆាកជាមួយអ្នកនាង អ៊ីត៕
ចែករំលែកព័តមាននេះ