ព្រះនាងតូច នរោត្ដមជេនណា បានបង្ហោះរូបភាពថ្មីជាច្រើនសន្លឹក ក្នុងការតុបតែងខ្លួនជាមួយឈុតសម្លៀកបំពាក់ប្រពៃណីបុរាណខ្មែរ ដែលមានឈ្មោះថាឈុត «ផ្ការំដួលកម្ពុជា»
រាជធានីភ្នំពេញ ៖ នៅយប់ថ្ងៃទី០២ ខែកញ្ញា ឆ្នាំ២០២២ ព្រះនាងតូច នរោត្ដមជេនណា បានបង្ហោះរូបភាពថ្មីជាច្រើនសន្លឹក ក្នុងការតុបតែងខ្លួនជាមួយឈុតសម្លៀកបំពាក់ប្រពៃណីបុរាណខ្មែរ ដែលមានឈ្មោះថាឈុត «ផ្ការំដួលកម្ពុជា» ។
យ៉ាងណាមិញ ឈុតប្រពៃណីបុរាណខ្មែរ ដែលព្រះនាងតុបតែងលើព្រះកាយ ឈ្មោះ«ផ្ការំដួលកម្ពុជា» នេះ ជាឈុតពណ៌មាស គ្របស្បៃពីលើ រំលេចទៅដោយអក្សរខ្មែរសរសេរលើឈុតនេះថា «កម្ពុជា» និងមានលាយឡំទៅដោយការរចនាឆ្នៃម៉ូតផ្ការំដួលយ៉ាងស្រស់ស្អា អមទៅដោយគ្រឿងអលង្ការមានដូចជា ខ្សែ.ក ខ្សែដៃ និងខ្សែក្រវ៉ាត់ចង្កេះ លើឈុតនេះផងដែរ។
ដោយឡែក ងាកមកចាប់អារម្មណ៍សារដែលបង្ហោះអមជាមួយរូបភាពលើបណ្ដាញសង្គម ព្រះនាងតូចជេនណា បានមានព្រះបន្ទូលថា «ឈុត ផ្ការំដួលកម្ពុជានេះ ជាផ្កាតំណាងអត្តសញ្ញាណជាតិខ្មែរ ដែលចាស់ៗបុរាណខ្មែរយើងតែងតែមកប្រដូចស្រីក្រមុំទៅនឹងផ្ការំដួល ក៏ព្រោះតែផ្ការំដួលមានរូបរាងស្រស់ស្អាត និងមានក្លិនពិដោរក្រអូបឈ្ងុយឈ្ងប់គួរជាទីទាក់ទាញមហាជន»។
ព្រះនាងមានព្រះបន្ទូលរំលឹកទៅដល់កូនខ្មែរទាំងអស់អោយចង់ចាំថា «ប្រជាជនខ្មែរគ្រប់រូប ជាពិសេសយុវជនខ្មែរទាំងអស់ ចូលចាំ និងធ្វើខ្លួនអោយក្លិនក្រអូប និងស្រស់ស្អាតដូច ផ្ការំដួល ដែលតំណាងអោយប្រទេសជាតិ ក៏ដូចជាខ្លួនឯងផ្ទាល់»។
មួយឈុតរចនាថ្មីនេះដែរ ទទួលបានការចាប់អារម្មណ៍ និងផ្ទុះការសរសើរជាខ្លាំង ទៅលើព្រះនាងតូចនរោត្ដមជេនណា ដោយបងប្អូនខ្លះលើកឡើងថា «ស្រស់ស្អាតសមសួនដូចកុលធីតាខ្មែរតែម្ដង ព្រះនាងតូច» ។ ខ្លះបានសម្ដែងការអរគុណដល់ព្រះនាងថា « អរគុណព្រះនាងតូច ដែលតែងតែលើកស្ទួយវប្បធម៌ អរិយធម៌ខ្មែរ និងនាំយកនៅឈុតសម្លៀកបំពាក់ប្រពៃណីបុរាណខ្មែរ មកអោយកូនខ្មែរបានស្គាល់ ក៏ដូចជាអោយបណ្ដាប្រទេសនានាបានស្គាល់ផងដែរ»។
គួរបញ្ជាក់ថា ត្រឹមរយៈពេលដល់២ម៉ោងតែប៉ុណ្ណោះ ការបង្ហោះរូបភាពថ្មីក្នុងឈុត រំដួលកម្ពុជា ដែលតំណាងអត្តសញ្ញាណជាតិខ្មែរនេះ ទទួលបានចំនួនអ្នក like រហូតដល់ទៅជាង 7K (អ្នកឡាច ៧០០០នាក់) និង Comment ជាង400 (ខមិនជាង ៤០០ ខមិន) រួមទាំងការ Shares រហូតដល់ទៅ ជាង600Shares ឯណោះ ។
សូមរំលឹកផងដែរថា ព្រះនាងតូច នរោត្ដមជេនណា គឺជាខ្សែរាជវង្សវ័យក្មេងបំផុត មានព្រះជនទើប១០ព្រះវស្សា ដែលទទួលបានប្រជាប្រិយភាពយ៉ាងខ្លាំងក្លា និងត្រូវបានប្រជាជនខ្មែរទាំងក្នុង និងក្រៅប្រទេស គោរពស្រលាញ់ និងគាំទ្រព្រះនាងភ្លូកទឹកភ្លូកដីដូចទឹកបាក់ទំនប់ តាមរយៈសមត្ថភាព ទេពកោសល្យរបស់ទ្រង់ក្នុងវិស្ស័យសិល្បៈ មិនថា ការរាំ ច្រៀង និងសម្ដែងនោះទេ។
ជាពិសេសទ្រង់តែងតែបង្ហាញ និងលើកស្ទួយពីវប្បធម៌ អរិយធម៌ខ្មែរ យ៉ាងខ្លាំងនៅលើបណ្ដាញសង្គម ដោយជាការផលិតបទចម្រៀងប្រពៃណីបុរាណខ្មែរ និងបង្ហាញឈុតសម្លៀកបំពាក់ប្រពៃណីបុរាណខ្មែរ រួចរៀបរាប់ពីប្រវត្តិឈុតនីមួយៗ និងប្រាប់ឈ្មោះអោយកូនខ្មែរបានស្គាល់ជាដើម។
មួយវិញទៀតនោះ ព្រះជនទើប១០ព្រះវស្សាមែនពិត តែព្រះនាងតូច ជេនណា អាចព្រះបន្ទូលបានដល់ទៅ ៥ ភាសា គឺភាសាបារាំង ភាសាចិន ភាសាថៃ និងភាសាអង់គ្លេស យ៉ាងស្ទាត់ជំនាញ រួមទាំងភាសាខ្មែរ ដែលជាជាតិកំណើតរបស់ទ្រង់ផងដែរ ៕
ចែករំលែកព័តមាននេះ