ពិធីការិនីល្បីឈ្មោះ អ្នកនាង កែវ ចាន់និមល បានធ្វើឲ្យកូនស្រីរបស់នាងរំភើបរហូតស្រក់ទឹកភ្នែក ដោយសារតែនាងបានផ្តល់នូវកាដូដ៏ពិសេសមួយសម្រាប់កូនស្រី ក្នុងថ្ងៃ
រាជធានីភ្នំពេញ ៖ ពិធីការិនីល្បីឈ្មោះ អ្នកនាង កែវ ចាន់និមល បានធ្វើឲ្យកូនស្រីរបស់នាងរំភើបរហូតស្រក់ទឹកភ្នែក ដោយសារតែនាងបានផ្តល់នូវកាដូដ៏ពិសេសមួយសម្រាប់កូនស្រី ក្នុងថ្ងៃខួបកំណើត ដែលធ្វើឡើងកាលពីម្សិលមិញ ខណៈពេលដែលកាដូនោះ មានតម្លៃមិនអាចកាត់ថ្លៃបានសម្រាប់ក្រុមគ្រួសាររបស់នាង។
កាដូដ៏មានតម្លៃសម្រាប់កូនស្រីរបស់នាងនាពេលនេះ គឺការពពោះកូនទី២ ររបស់អ្នកនាង ដែលនោះក៏ជាការចង់បាន និងជាការបំពេញបំណងបន្ថែមសម្រាប់កូនស្រីរបស់ខ្លួន ដែលចង់មានប្អូនម្នាក់ ក្នុងពេលដែលកូនស្រីទី១របស់នាង បានចម្រើនវ័យកាន់តែធំហើយនោះ។
តាមរយៈវីដេអូឃ្លីបមួយ ដែលពិធីការិនីប្រចាំស្ថានីយទូរទស្សន៍ហង្សមាស រូបនេះបានបង្ហោះតាមបណ្តាញសង្គមហ្វេសប៊ុកបង្ហាញពីសកម្មភាពអ្នកនាង កែវ ចាន់និមល កាន់កាដូតូចមួយហុចឲ្យកូនស្រីបើកមើល ដែលនៅក្នុងកាដូនោះ គឺជារូបថតនៃការពិនិត្យអេកូមើលសុខភាពកូនទី២ របស់នាង។
កាដូនោះ បានធ្វើឲ្យកូនស្រីរបស់នាងរំភើបរហូតស្រក់ទឹកភ្នែកនៅក្នុងថ្ងៃខួបកំណើត ខណៈពេលដែលអ្នកនាង កែវ ចាន់និមល បានបញ្ជាក់ប្រាប់កូនស្រី ក៏ដូចជាភ្ញៀវដែលបានចូលរួមពិធីខួបកំណើតនាពេលនោះថា នេះជាការពិនិត្យអេកូរបស់នាងកាលពីព្រឹកមិញ។
ជាមួយនឹងរូបភាពវីដេអូដែលបានបង្ហោះខាងលើនេះ កែវ ចាន់និមល ក៏បានភ្ជាប់ជាមួយនឹងសារថា គ្រប់យ៉ាង គឺដើម្បីទេពី ដំបូងប៉ាម៉ាក់គិតថា មានតែកូនម្នាក់គឺគ្រប់គ្រាន់ហើយសម្រាប់គ្រួសារយើង តែដោយសារកូនស្តាប់បង្គាប់ មិនដែលធ្វើអោយប៉ាម៉ាក់ពិបាក ទោះប៉ាម៉ាក់រវល់យ៉ាងណាក៏ដោយ ទើបប៉ាម៉ាក់ព្យាយាមបំពេញបំណងកូនគ្រប់យ៉ាង។
យ៉ាងណាតាមរយៈសារ និងវីដេអូដែល កែវ ចាន់និមល បានបង្ហាះនាពេលនេះ បានធ្វើឲ្យមិត្តភក្តិ និងប្រិយមិត្តគាំទ្របាននាំគ្នាចូលទៅធ្វើការខំមិន ដោយបានសម្តែងការអបអរសាទរនៅពេលដែលពិធីការិនីរូបនេះ បានសម្រេចក្តីបំណងនៅក្នុងការមានកូនម្នាក់បន្ថែមទៀតនាពេលនេះ។
ជាការកត់សម្គាល់ ក្រោយពេលដែលឆ្លងកាត់រឿងរ៉ាវស្នេហាត្រីកោណមួយភ្លើងចម្បើងជាមួយពិធីកររួមទ្រនំកាលពីពេលកន្លងទៅ ពិធីការិនីដែលមានសំនួនវោហា អ្នកនាង កែវ ចាន់និមល បានចាប់ផ្តើមរឹតចំណងស្នេហាជាគ្រួសារឲ្យកាន់តែរឹងមាំបន្ថែមទៀត។
ជាធម្មតា បើទោះបីជាការងាររវល់យ៉ាងណាក៏ដោយ ប៉ុន្តែ កែវ ចាន់និមល ក៏មិនបានភ្លេចពីការចំណាយពេលជួបជុំគ្រួសារនៅក្នុងការដើរលំហែ និងញ៉ាំអាហារនៅទីកន្លែងកំសាន្តនានាជាបន្តបន្ទាប់ ក្នុងពេលដែលនាងក៏បានចំណាយពេលច្រើនសម្រាប់មើលថែកូនស្រីតែមួយរបស់នាងផងដែរ។
ចំណងស្នេហ៍របស់នាង និងស្វាមីដែលបានចងភ្ជាប់គ្នាអស់រយៈពេលប្រមាណជាង១០ឆ្នាំមកនេះ បានធ្វើឲ្យ កែវ ចាន់និមល ទទួលបានសុភមង្គលយ៉ាងខ្លាំង ដោយស្វាមីរបស់នាងតែងតែផ្តល់ការស្រឡាញ់សម្រាប់នាង និងគ្រួសារជាមួយនឹងការរស់នៅក្នុងផ្ទះវីឡាដ៏ប្រណីត ហើយនឹងការប្រើប្រាស់របស់ទំនើប និងស៊ីវិល័យផងដែរ។ ទោះជាយ៉ាងណាក៏ដោយ ចំណងដៃកូនទីពីរ ដែល កែវ ចាន់និមល កំពុងតែពពោះនាពេលនេះ គេរំពឹងថា វានឹងធ្វើឲ្យចំណងគ្រួសាររបស់អ្នកនាងកាន់តែផ្អែមល្ហែម និងរឹងមាំបន្ថែមទៀត៕
ចែករំលែកព័តមាននេះ