លោកយាយម្នាក់ប្រកាសយកកូន ក្រោយទើបរៀបការប្តីក្មេងថ្មីថ្មោង
អាមេរិក ៖ លោកយាយអាយុ៦១ឆ្នាំ ដែលមានកូន៧នាក់ និងចៅ១៧នាក់ បានបង្កការភ្ញាក់ផ្អើល។
អាមេរិក ៖ លោកយាយអាយុ៦១ឆ្នាំ ដែលមានកូន៧នាក់ និងចៅ១៧នាក់ បានបង្កការភ្ញាក់ផ្អើល។ បន្ទាប់ពីប្រកាសថា គាត់ត្រៀមខ្លួនរួចហើយ ដើម្បីពង្រីកសមាជិកគ្រួសារ ដោយយកកូនម្នាក់ទៀត ជាមួយប្តីវ័យ២៤ឆ្នាំរបស់គាត់ ដែលទើបតែរៀបការហើយថ្មោងថ្មី។ នេះបើយោងតាមប្រភពពីគេហទំព័រ LADbible ចេញផ្សាយកាលពីថ្ងៃទី១៥ ខែមិថុនា កន្លងទៅ។
លោកយាយ Cheryl McGregor បានភ្ជាប់ពាក្យជាមួយប្តីវ័យក្មេងរបស់គាត់ឈ្មោះថា Quran McCain កាលពីឆ្នាំ ២០២១។ បន្ទាប់ពីជួបគាត់ជាលើកដំបូងនៅហាង Dairy Queen ក្នុងទីក្រុង Rome រដ្ឋ Georgia កាលពីឆ្នាំ ២០១២ នៅពេលដែល Quran ទើបអាយុត្រឹមតែ១៥ឆ្នាំ ។ ហើយកំពុងធ្វើការឱ្យកូនប្រុសរបស់លោកយាយ ដែលមានឈ្មោះថា Chris ។
ទោះជាយ៉ាងណា បន្ទាប់ពីពិធីមង្គលការ ដែលត្រូវបានផ្សាយផ្ទាល់តាមប្រព័ន្ធអ៊ីនធឺណិតទៅកាន់មនុស្សជាង២ម៉ឺននាក់ បានបញ្ចប់សព្វគ្រប់ហើយ។ លោកយាយ Cheryl និងប្តី កំពុងស្វែងរកជំហានបន្ទាប់ ដើម្បីមានកូនជាមួយគ្នា។
លោកយាយ Cheryl បាននិយាយថា «ប្តីខ្ញុំតែងតែចង់បានកូន។ ហើយខ្ញុំក៏ចង់មានកូនជាមួយគាត់ផងដែរ។ ជាការពិតណាស់ ដោយសារតែអាយុរបស់ខ្ញុំ ដូច្នេះយើងនឹងត្រូវទទួលបានសេវាពពោះជំនួស ឬកូនចិញ្ចឹម ដែលយើងកំពុងស្វែងរក»។ ខណៈពេលកំពុងជជែកអំពីផែនការយកកូនរបស់គាត់ លោកយាយ Cheryl បានប្រាប់ថា ពួកគាត់នឹងយកកូននៅឆ្នាំនេះតែម្តង។
យោងតាមប្រភពពីសារព័ត៌មាន The Mirror បានឱ្យដឹងថា កូនទាំង៧នាក់របស់លោក Cheryl ដែលមានអាយុចន្លោះពី ២៩ឆ្នាំ ដល់ ៤១ឆ្នាំ សុទ្ធតែបាននិយាយថា ពួកគេនឹងសហការគ្នា ដើម្បីជួយចិញ្ចឹមបីបាច់កូនម្តាយរបស់ពួកគេ។
សូមជម្រាបជូនថា ដោយសារតែគម្លាតអាយុដ៏ច្រើនរវាងប្តីប្រពន្ធ១គូនេះ ទទួលបានការចាប់អារម្មណ៍យ៉ាងខ្លាំងនៅលើបណ្តាញសង្គម TikTok ដែលទទួលបានអ្នកតាមដានរហូតដល់ ២,២លាននាក់៕
ចែករំលែកព័តមាននេះ