រាជធានីភ្នំពេញ ៖ បុរសជនជាតិអង់គ្លេសម្នាក់ត្រូវបានគេប្រទះឃើញដេកស្លាប់ សង្ស័យដោយសារតែការប្រើប្រាស់គ្រឿងញៀនច្រើនហួសកំរិត បណ្តាលអោយគាំងបេះដូងស្លាប់ នៅក្នុងបន្ទប់ផ្ទះជួលមួយកន្លែង ក្រោយពីទើបតែមកចូលស្នាក់នៅជាមួយ និងបុរសជាមិត្តភក្តិជនជាតិអង់គ្លេសដូចគ្នាម្នាក់ទៀត បានមួយថ្ងៃនោះ ។ ហេតុការណ៍នេះដែរបានបង្កឱ្យមានការភ្ញាក់ផ្អើលកើតឡើងកាលពីម៉ោង១១យប់ ថ្ងៃទី០៩ ខែវិច្ឆិកា ឆ្នាំ២០១៦ នៅចំណុចផ្ទះលេខ៣E2 ផ្លូវលេខ២០៨ ក្រុមទី៧ ភូមិ១ ក្នុងសង្កាត់បឹងរាំង ខណ្ឌដូនពេញ ។
តាមប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា បុរសរងគ្រោះមានឈ្មោះ THOMAS JASON BARRY អាយុ៤៦ឆ្នាំ ជនជាតិអង់គ្លេស ជាអ្នកទេសចរណ៍ ត្រូវបានគេប្រទះឃើញដេកស្លាប់ នៅក្នុងផ្ទះជួលកើតហេតុខាងលើ មុនពេលកើតហេតុ បុរសជាជនរងគ្រោះបានទៅទិញបារី កាហ្វេ និងស្រាបៀរមួយចំនួនយកមកអង្គុយផឹកស៊ីជាមួយ និងបុរសជាមិត្តភក្តិម្នាក់ឈ្មោះ DURKIN KENNETH WILLIAM ។ ក្រោយពីផឹកស្រាបៀរអស់មួយកំប៉ុងម្នាក់រួចហើយ ដោយមានអាការៈឈឺក្បាលនោះ បុរសជាមិត្តភក្តិក៏បានចូលទៅដេកមុន ហើយបុរសជាជនរងគ្រោះនៅអង្គុយផឹកបន្តទៅទៀតតែម្នាក់ឯង ។ រហូតមកដល់ម៉ោង២៣យប់ថ្ងៃកើតហេតុ បុរសជាមិត្តភក្តិក៏បានភ្ញាក់ហើយដើរចូលទៅក្នុងបន្ទប់របស់បុរសរងគ្រោះ ប្រទះឃើញគេដេកផ្កាប់មុខ ក៏ចូលទៅដាស់មើល ទើមដឹងថា ស្លាប់បាត់បង់ជីវិតទៅហើយ ។
គួរបញ្ជាក់ថា បុរសរងគ្រោះទើបតែចូលមកកាន់ប្រទេសកម្ពុជាយើងកាលពីវេលាម៉ោង១២និង០០នាទី ថ្ងៃត្រង់ ថ្ងៃទី០៩ ខែវិច្ឆិកា ឆ្នាំ២០១៦ នេះបើតាមរបាយការណ៍ពីអាកាសយានដ្ឋានអន្តរជាតិភ្នំពេញ លុះមកយប់ថ្ងៃដដែល ក៏ត្រូវបានស្លាប់បាត់បង់ជីវិតតែម្តង ។
ក្រោយពេលកើតហេតុកម្លាំងមានសមត្ថកិច្ចមូលដ្ឋាន និងមន្ត្រីជំនាញក៏បានចុះមកធ្វើការត្រួតពិនិត្យ និងធ្វើកោសលវិច្ច័យសព បានឃើញថា បុរសរងគ្រោះពិតជាស្លាប់ដោយសារតែជម្ងឺគាំងបេះដូង ព្រោះតែរូបគេបានប្រើប្រាស់ថ្នាំញៀន ប្រភេទម៉ក់ហ្វីនច្រើនហួសកំរិតពេក ហើយសាកសពត្រូវបានបញ្ជូនយកទៅរក្សាទុកនៅមន្ទីរពេទ្យមិត្តភាពខ្មែរ-សូវៀត ដើម្បីរង់ចាំក្រុមគ្រួសារមកទទួលយកទៅកាន់ស្រុកកំណើតវិញ៕
ចែករំលែកព័តមាននេះ