រាជធានីភ្នំពេញ ៖ ក្រុមហ៊ុនផលិតស្រាបៀរកម្ពុជា (CBL) បានប្រកាសបង្ហាញជាផ្លូវការនូវស្រាបៀរACB អិចស្ត្រាស្តោតដបដែលរចនាឡើងជាមួយរូបរាងថ្មីដ៏គួរឱ្យទាក់ទាញ។ ពិធីនេះធ្វើឡើងនៅសណ្ឋាគារស៊ូហ្វីតែលភ្នំពេញភូគីត្រា
រាជធានីភ្នំពេញ ៖ ក្រុមហ៊ុនផលិតស្រាបៀរកម្ពុជា (CBL) បានប្រកាសបង្ហាញជាផ្លូវការនូវស្រាបៀរACB អិចស្ត្រាស្តោតដបដែលរចនាឡើងជាមួយរូបរាងថ្មីដ៏គួរឱ្យទាក់ទាញ។ ពិធីនេះធ្វើឡើងនៅសណ្ឋាគារស៊ូហ្វីតែលភ្នំពេញភូគីត្រា កាលពីល្ងាចថ្ងៃទី ១៧ កញ្ញា ២០១៦ ។
ព្រឹត្តិការណ៍នេះរៀបចំឡើងជាលក្ខណៈ រាត្រីសមោសរដែលមានឈ្មោះថា «ABC Golden Black Night »ត្រូវបានរៀបចំយ៉ាងពិសេសដើម្បីប្រកាសសម្ពោធលក់ស្រាបៀរទឹកខ្មៅដបថ្មី ដោយបានអញ្ជើញភ្ញៀវពិសេសៗ រួមទាំងថ្នាក់ដឹកនាំជាន់ខ្ពស់ និងបុគ្គលិកប្រតិបត្តិរបស់ក្រុមហ៊ុនដៃគូពាណិជ្ជកម្ម ជាពិសេសវត្តមាននៃតារាចម្រៀង តារាសម្ដែង និងតារាបង្ហាញម៉ូតជាច្រើន ដូចជាអ្នកនាងពេជ្រ សោភា លោក ជី ដេវីដ កញ្ញា សុគន្ធ នីសា លោកឆាយ វីរៈយុទ្ធ លោក អ៊ុន សុទ្ធា និងតារាល្បីៗជាច្រើនរូបទៀត ។
កម្មវិធីរាត្រីនោះជាកម្មវិធីជប់លៀងពាក់របាំងមុខ ដែលភ្ញៀវអញ្ជើញចូលរួមតម្រូវឱ្យស្លៀកពាក់ពណ៌ខ្មៅ និងពណ៌មាស និងពាក់របាំងមុខពិសេសដើម្បីបន្ថែមភាពអាថ៌កំបាំងនៃព្រឹត្តិការណ៍នេះ ។ ជាពិសេសមានការចូលរួមសម្ដែងពីក្រុមអ្នកលេងសៀកអន្តរជាតិ The Magic Cube មកពីប្រទេសបារាំងមកសម្ដែងសៀករហស្សកម្មបែបទំនើប និងលាតត្រដាង ACBអិចស្ត្រាស្តោត រូបរាងដបថ្មីនៅលើឆាក ព្រមទាំងមានកម្មវិធីដើរម៉ូដពាក់របាំងមុខ និងការសម្ដែងរបាំស្រមោលសហសម័យដែលបង្ហាញពីប្រវត្តិនៃស្រាបៀរ ACB អិចស្ត្រាស្តោត ។ ការសម្ដែងនេះបានបង្កបរិយាកាសកាន់តែរំភើបរីករាយបន្ថែមទៀតជាមួយនឹងតន្ត្រីដែលប្រគំឡើងដោយក្រុមតន្ត្រីអន្តរជាតិនិងជាមួយបទពិសោធន៍ថ្មីនៃការទទួលទានអាហារបែបបស្ចិមប្រទេសលំដាប់សណ្ឋាគារផ្កាយ៥ផងដែរ ។
ក្នុងបទសម្ភាសន៍ជាមួយអ្នកសារព័ត៌មានក្នុងស្រុកជាច្រើន តារាល្បីៗជាច្រើនរូបបាននិយាយស្រដៀងគ្នាថា ពួកគាត់ចូលចិត្តទទួលទាន ACB អិចស្ត្រាស្តោត ពីព្រោះពួកគាត់ឱ្យតម្លៃទៅលើអ្វីៗដែលល្អប្រណីតនៅក្នុងជីវិត ហើយស្រាបៀរទឹកខ្មៅនេះ ត្រូវបានវាយតម្លៃខ្ពស់ជាស្រាបៀរទឹកខ្មៅមានគុណភាពខ្ពស់ ធ្វើឡើងពីគ្រឿងផ្សំដែលបានសម្រិតសម្រាំងយ៉ាងពិសេសជាមួយនឹងដំណើរការនៃខ្សែសង្វាក់ផលិតយ៉ាងល្អឥតខ្ចោះ ។
ACB អិចស្ត្រាស្តោតសក្តិសមជាមួយយុវវ័យសម័យថ្មី និងផ្ដល់នូវបទពិសោធន៍ថ្មីក្នុងការក្រេបរសជាតិនៃស្រាបៀរ ACB អិចស្ត្រាស្តោត ដែលបានរចនាជារូបរាងថ្មីគួរជាទីទាក់ទាញ ហើយក៏មានយុទ្ធនាការផ្សព្វផ្សាយថ្មីមួយទៀតដែលហៅថា ឆ្ពោះទៅរកឧត្តមភាពទឹកខ្មៅល្អដូចមាស ដើម្បីគាំទ្រដល់ផលិតផលថ្មីនេះផងដែរ ៕
ចែករំលែកព័តមាននេះ