យោងតាមគាថាធម្មបទ ព្រះមានព្រះភាគត្រាស់ថា ដរាបណាបុណ្យមិនទាន់ហុចផលឱ្យ ដរាបនោះមនុស្សល្អរមែងឃើញអំពើបុណ្យ ថាមិនល្អ តែពេលណាបុណ្យហុចផលឱ្យ ពេលនោះមនុស្សល្អឃើញអំពើបុណ្យ ថាល្អពិតមែន ។ ព្រោះហេតុនោះបុគ្គលគប្បីរួសរាន់ប្រញាប់ប្រញាល់ក្នុងសេចក្ដីល្អ…
យោងតាមគាថាធម្មបទ ព្រះមានព្រះភាគត្រាស់ថា ដរាបណាបុណ្យមិនទាន់ហុចផលឱ្យ ដរាបនោះមនុស្សល្អរមែងឃើញអំពើបុណ្យ ថាមិនល្អ តែពេលណាបុណ្យហុចផលឱ្យ ពេលនោះមនុស្សល្អឃើញអំពើបុណ្យ ថាល្អពិតមែន ។
ព្រោះហេតុនោះបុគ្គលគប្បីរួសរាន់ប្រញាប់ប្រញាល់ក្នុងសេចក្ដីល្អ គប្បីហាមប្រាមចិត្តឱ្យផុតស្រឡះពីអំពើអាក្រក់ ព្រោះថា បើបុគ្គលធ្វើសេចក្ដីល្អយឺតពេក ចិត្តនឹងត្រេកអរក្នុងសេចក្ដីអាក្រក់ ឬក្នុងអំពើបាបមិនខាន ។
ចំណែកអំពើបាបទោះជាតិចតួចក្តីក៏មិនត្រូវមើលងាយឡើយដូចព្រះពុទ្ធត្រាស់ថា បុគ្គលមិនគួរមើលងាយបាបថាបាបមានប្រមាណតិចតួចនឹងមិនឱ្យផលឡើយ សូម្បីតែក្អមទឹក ដែលគេបើកគ្របចំហ រមែងពេញដោយតំណក់ទឹកភ្លៀងដែលស្រក់ធ្លាក់ចុះមក ម្ដងមួយតំណក់ៗបាន យ៉ាងណាមិញ បុគ្គលពាលធ្វើអំពើបាប ទោះបីជាម្ដងបន្តិចៗ ក៏រមែងពេញដោយបាបបានក៏យ៉ាងដូច្នោះដែរ ។
ហេតុនេះបើបុគ្គលធ្វើអំពើបាប មិនគួរធ្វើអំពើបាបនោះញឹកញាប់ទេ និងមិនគួរត្រេកអរក្នុងអំពើបាបនោះផងដែរ ព្រោះថាការសន្សំនូវបាបរមែងនាំសេចក្ដីទុក្ខមកឱ្យតាំងពីលោកនេះរហូតដល់បរលោក ៕ សាន សារិន
ចែករំលែកព័តមាននេះ