ទីក្រុងហុងកុងអាចនឹងដាក់ការបិទខ្ទប់ (ចាក់សោរទីក្រុង) យ៉ាងតឹងរ៉ឹង ដែលតម្រូវឱ្យមនុស្សនៅផ្ទះរបស់ពួកគេ មិនចេញទៅណា។ អាជ្ញាធរបានចុះហត្ថលេខាកាលពីថ្ងៃចន្ទ (ទី២៨​ ខែកុម្ភៈ) ជាមួយនឹងយុទ្ធសាស្ត្ររក្សាទិន្នន័យសូន្យនៃការឆ្លងកូវីដរបស់ទីក្រុង។

រយៈពេលពីរឆ្នាំនៃគោលនយោបាយរក្សាទិន្នន័យសូន្យនៃការឆ្លងកូវីដរបស់ទីក្រុង ដ៏តឹងរឹង បានរក្សាការពារមិនឱ្យមានកូវីដឆ្លង តែតាំងពីមានការលេចមុខរបស់កូវីដអូមីក្រុងមក ការឆ្លងបានកើនឡើងជាខ្លាំង ដែលធ្វើឱ្យថ្នាក់ដឹកនាំគិតគូរដល់ការបិទខ្ទប់ទីក្រុង។

មេដឹកនាំទីក្រុងហុងកុងលោកស្រី Carrie Lam ពីមុនបានច្រានចោលការចាក់សោរទូទាំងទីក្រុង ហើយជំនួសមកវិញបានបញ្ជាឱ្យអ្នករស់នៅទីនោះទាំងអស់ ចំនួន ៧.៤លាននាក់ធ្វើតេស្តរកកូវីដនៅក្នុងខែមីនា។ ប៉ុន្តែ​នៅ​ពេល​ត្រឡប់​មក​វិញ លេខាធិការ​សុខាភិបាល Sophia Chan បាន​បញ្ជាក់​កាល​ពី​ថ្ងៃ​ចន្ទ​ថា វា​នៅ​តែ​ជា​ជម្រើសក្នុងការបិទខ្ទប់។

នៅពេលសួរដោយអ្នកធ្វើបទបង្ហាញនៅវិទ្យុពាណិជ្ជកម្មថា តើការចាក់សោរនៅតែត្រូវបានច្រានចោល តែលោកស្រីបានឆ្លើយថា៖ “ទេ យើងនៅតែពិភាក្សាគ្នាសិនពីរឿងនេះ។”

លោកស្រីបានបន្ថែមថា៖ “តាមទស្សនៈវិស័យសុខភាពសាធារណៈ ដើម្បីនាំមកនូវប្រសិទ្ធភាពល្អបំផុតនៃការធ្វើតេស្តជាសកលជាកាតព្វកិច្ច យើងត្រូវកាត់បន្ថយចលនារបស់មនុស្សក្នុងកម្រិតមួយ។ ដើម្បីកាត់បន្ថយចលនា អ្នករស់នៅទីក្រុងគួរតែនៅផ្ទះ ឬជៀសវាងការចេញទៅក្រៅតាមដែលអាចធ្វើទៅបាន។”

គួរបញ្ជាក់ផងដែរថា ទីក្រុងហុងកុងបានប្រកាសពីការឆ្លងថ្មីចំនួន ២៦០០០ករណី និង ការស្លាប់ចំនួន ៨៣នាក់ កាលពីថ្ងៃអាទិត្យ។ កាលពីមុន ហុងកុងមានករណីឆ្លងត្រឹមតែ ១២០០០ករណីប៉ុណ្ណោះ៕