អង្គការសុខភាពពិភពលោក (WHO) បាននិយាយកាលពីថ្ងៃអង្គារថា ចំនួនករណីឆ្លងកូវីដថ្មីៗនៅជុំវិញពិភពលោកបានធ្លាក់ចុះ ២១% ក្នុងសប្តាហ៍ចុងក្រោយនេះ ដែលជាសប្តាហ៍ទី៣ ជាប់ៗគ្នាដែលករណីឆ្លងបានធ្លាក់ចុះ។

នៅក្នុងរបាយការណ៍ជំងឺរាតត្បាតប្រចាំសប្តាហ៍របស់ទីភ្នាក់ងារសុខភាពអង្គការសហប្រជាជាតិ WHO បាននិយាយថា មានការឆ្លងវីរុសថ្មីច្រើនជាង ១២លានកាលពីសប្តាហ៍មុន។ ចំនួនអ្នកស្លាប់ថ្មីនៃកូវីដ១៩ បានធ្លាក់ចុះ ៨% មកនៅត្រឹមប្រហែល ៦៧០០០ករណី នៅទូទាំងពិភពលោក ដែលជាលើកទីមួយហើយដែលការស្លាប់ប្រចាំសប្តាហ៍បានធ្លាក់ចុះចាប់តាំងពីដើមខែមករាមក។

តំបន់ប៉ាស៊ីហ្វិកខាងលិចគឺជាតំបន់តែមួយគត់ដែលបានឃើញការកើនឡើងនៃករណីឆ្លងកូវីដ ជាមួយនឹងការកើនឡើង ២៩% ខណៈដែលចំនួននៃការឆ្លងនៅកន្លែងផ្សេងទៀតបានធ្លាក់ចុះយ៉ាងខ្លាំង។ ចំនួនអ្នកស្លាប់ថ្មី ក៏បានកើនឡើងផងដែរនៅប៉ាស៊ីហ្វិកខាងលិច និងអាហ្រ្វិក ខណៈដែលធ្លាក់ចុះនៅគ្រប់ទីកន្លែង។ ចំនួនករណីឆ្លងថ្មី ខ្ពស់បំផុតត្រូវបានគេឃើញនៅក្នុងប្រទេសរុស្ស៊ី អាល្លឺម៉ង់ ប្រេស៊ីល សហរដ្ឋអាមេរិក និងកូរ៉េខាងត្បូង។

WHO បាននិយាយថា កូវីដអូមីក្រុង នៅតែជាប្រភេទកូវីដលេចធ្លោលើសលប់នៅទូទាំងពិភពលោក ដែលមានចំនួនច្រើនជាង ៩៩% នៃកូវីដទាំងអស់ ជាមួយមូលដ្ឋានទិន្នន័យមេរោគដ៏ធំបំផុតរបស់ពិភពលោក។

អង្គការសុខភាពពិភពលោកក៏បានរាយការណ៍ផងដែរថាភស្តុតាងវ៉ាក់សាំងដែលមានបង្ហាញថា “ការចាក់ថ្នាំបង្ការដូសជម្រុញ ធ្វើឱ្យប្រសើរឡើងយ៉ាងខ្លាំងនូវប្រសិទ្ធភាពវ៉ាក់សាំង ប្រឆាំងនឹងកូវីដប្រភេទអូមីក្រុង ប៉ុន្តែបាននិយាយថាព័ត៌មានលម្អិតបន្ថែមទៀតនៅតែត្រូវការជាចាំបាច់អំពីរយៈពេលដែលការការពារបែបនេះមានប្រសិទ្ធភាព៕