ការសិក្សាដែលគាំទ្រដោយរដ្ឋាភិបាលអង់គ្លេសបានរកឃើញថា រោគសញ្ញានៃជំងឺកូវីដ១៩ លេចឡើងយ៉ាងឆាប់រហ័សបន្ទាប់ពីការឆ្លង ជា​ងការរកឃើញពីមុនៗ។

នៅក្នុងការសិក្សាស្រាវជ្រាវរបស់កម្មវិធី Human Challenge Program បានរកឃើញថា មនុស្សដែលមានសុខភាពល្អធម្មតា ហើយពេលឆ្លងកូវីដរួច គឺឆាប់មានរោគសញ្ញាស្តែងចេញលឿនជាងការរកឃើញពីមុនៗ។ វាត្រូវចំណាយពេលត្រឹមតែ២ថ្ងៃប៉ុណ្ណោះ ដើម្បីស្តែងចេញរោគសញ្ញាក្រោយពីបានឆ្លងរួច។

អ្នកជំនាញបានរកឃើញថា ការឆ្លងវីរុសកូវីដ១៩ដំបូងលេចឡើងក្នុងបំពង់ក ហើយបន្ទាប់មកឈានដល់កម្រិតធ្វើទុក្ខកំពូលនៅថ្ងៃទីប្រាំ។

រហូតមកដល់ពេលនេះ អ្នកជំនាញ រួមទាំងមកពីអង្គការសុខភាពពិភពលោក (WHO) បានជឿជាក់យ៉ាងទូលំទូលាយថា វាត្រូវចំណាយពេលពី ៥ ទៅ ៦ថ្ងៃ ចាប់ពីពេលដែលនរណាម្នាក់បានឆ្លងមេរោគកូវីដ ដើម្បីបង្ហាញរោគសញ្ញា។ ប៉ុន្តែការស្រាវជ្រាវថ្មីបានបង្ហាញថា រោគសញ្ញាចាប់ផ្តើមចេញតាំងពីថ្ងៃទី២ ក្រោយពីបានឆ្លងរួច។ នៅថ្ងៃទី៥ គឺជាការលេចចេញរោគសញ្ញាខ្លាំងជាងគេ។

ជាផ្នែកមួយនៃការសិក្សា អ្នកស្ម័គ្រចិត្ត ៣៦នាក់ ដែលមានអាយុពី ១៨ ដល់ ២៩ឆ្នាំ ដែលមិនធ្លាប់មានកូវីដពីមុនមកទេ ត្រូវបានដាក់ឱ្យឆ្លងមេរោគដោយចេតនាក្នុងកម្រិតតូចមួយនៃមេរោគតាមរយៈច្រមុះ។ គេបានរកឃើញថា មនុស្សចំនួនពាក់កណ្តាលបានឆ្លង ហើយចាប់ផ្តើមលេចចេញរោគសញ្ញាក្រោយពីបានឆ្លង២ថ្ងៃ៕