រឿងជំនឿទោះជាស្ថិតក្នុងរូបិយក្តី អរូបិយក្តីគ្មានអ្នកណាហាមឃាត់មិនឱ្យជឿទេ ជឿក៏ជឿចុះតែត្រូវមានហេតុផល និងប្រកបដោយបញ្ញាផង ដើម្បីកុំឱ្យខូចប្រយោជន៍ ។ ដោយហេតុថា មានមនុស្សពីមួយជំនាន់ទៅមួយជំនាន់តែងនិយាយតៗគ្នាថា អ្នកមានគូស្នេហ៍ត្រូវបានចាស់ទុំហាមប្រាមមិនឱ្យទៅលេងវត្តភ្នំទេ ព្រោះខ្លាចលោកយាយពេញច្រណែនហើយបំបែកបំបាក់ឱ្យបែកគ្នា ។
តើជំនឿបែបនេះអាចយកជាការបានទេ ? ចំពោះរឿងនេះមានយុវវ័យច្រើនណាស់ ដែលនៅតែមិនអស់ចិត្ត ដោយអ្នកខ្លះថា ពិតជាអញ្ចឹងមែន អ្នកខ្លះថា មិនជឿទេ គឺគ្មានអ្នកណាមកបញ្ចូលចិត្តយើងឱ្យបែកគ្នានោះឡើយ ។ ឯអ្នកខ្លះទៀតហាក់ដូចជា ទ្រឹងមិនហ៊ាននិយាយថា ជឿ ឬមិនជឿឡើយ ។
ដើម្បីស្រាយបំភ្លឺឱ្យអស់ចម្ងល់តទៅទៀតព្រឹទ្ធាចារ្យមួយរូបសុំមិនបញ្ចេញឈ្មោះ ជាអ្នកមើលថែរក្សានៅរមណីយដ្ឋានវត្តភ្នំបានបញ្ជាក់ឱ្យដឹងថា អរូបិយជំនឿបែបគ្មានហេតុផលនេះមិនអាចទទួលយកបានទេ ។ តាមពិតទៅយាយពេញឯណាដាច់ចិត្តពង្រាត់កូនចៅឱ្យព្រាត់គ្នានោះ មានតែលោកយាយមានបារមីជួយថែរក្សា ជួយបន់ស្រន់សុំឱ្យគូស្នេហ៍ស្រឡាញ់គ្នាបានយូរអង្វែង ។ ជួបគ្នាជាគូគាប់ និងរស់នៅដោយសុខសាន្តអស់មួយជីវិត ។
ព្រឹទ្ធាចារ្យបានអះអាងថា បារមីលោកយាយពេញតែងជួយថែរក្សាកូនចៅទូទាំងនគរឱ្យបានសុខចម្រើន សម្បូរសប្បាយ រកទទួលទានមានបាន ដូច្នេះសម្តីទាំងអស់នោះគ្រាន់តែជាពាក្យចចាមអារ៉ាមគ្មានការណ៍ពិតអ្វីទាំងអស់ ចាប់ពីពេលនេះទៅសូមអស់ចម្ងល់ពីរឿងនេះ ៕ សាន សារិន
ចែករំលែកព័តមាននេះ