ខេត្តកណ្តាល ៖ ជនសង្ស័យម្នាក់ជាប្អូនថ្លៃ ត្រូវបាននគរបាលស្រុកកៀនស្វាយធ្វើការឃាត់ខ្លួន បន្ទាប់ពីគំរាមសម្លា.ប់បងថ្លៃ និងដុតផ្ទះ ដុតឡាន ដោយសារខឹងបងថ្លៃស៊ីលុយដាច់២០ម៉ឺនរៀលពីថៅកែការដ្ឋានដឹកដីរបស់ខ្លួន ។
ហេតុការណ៌នេះបានកើតឡើង នៅថ្ងៃទី២៥ ខែមករានេះ វេលាម៉ោង២០និង២០នាទី ស្ថិតនៅក្នុងភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល ។
ជនរងគ្រោះឈ្មោះ ដាំ ជា ភេទប្រុស អាយុ៤៦ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្ដាល ។
ជនសង្ស័យឈ្មោះ ឈន ប៊ុនណាក់ ភេទប្រុស អាយុ២៨ឆ្នាំ ជនជាតិខ្មែរ មុខរបរបើកឡាន មានទីលំនៅ ភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល ។
បើតាមរបាយការណ៌របស់សមត្ថកិច្ច ដែលទើបទទួលបាននៅព្រឹកថ្ងៃទី២៦ ខែមករានេះថា ជនរងគ្រោះកំពុងតែដេកនៅក្នុងបន្ទប់ផ្ទះរបស់ខ្លួន ស្រាប់តែជនសង្ស័យឈ្មោះ ឈន ប៊ុនណាក់ ភេទប្រុស អាយុ ២៨ឆ្នាំ ត្រូវជាប្អូនថ្លៃ មានទីលំនៅភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល បានមកធាក់ទ្វារបន្ទប់ដេករបស់ជនរងគ្រោះ ហើយស្រែកហៅអោយមកចេញខាងក្រៅនឹងបានគំរាមគំហែង ជនរងគ្រោះថា បើមិនចេញមកក្រៅទេ និងដុតផ្ទះ វ៉ៃកម្ទេចឡាន ហើយនឹងសម្លា.ប់ជនរងគ្រោះចោល ។
លឺដូច្នេះ ជនរងគ្រោះភ័យក៏បានរត់ទៅយកឡានបើកផ្ញើផ្ទះអ្នកភូមិនៅក្បែរគ្នានឹងបានទូរស័ព្ទប្រាប់សមត្ថកិច្ចប៉ុស្តិ៍នគរបាលរដ្ឋបាលកំពង់ស្វាយអោយចុះមកអប់រំណែនាំ ជនសង្ស័យអោយឈប់រករឿងខ្លួនទៀត ។
លុះដល់ថ្ងៃទី២៥ ខែមករា ឆ្នាំ២០២២ វេលាម៉ោង២០និង២០នាទី ជនសង្ស័យឈ្មោះ ឈន ប៊ុនណាក់ ភេទប្រុស បានកាន់កាំបិតផ្គាក់ផ្លែដែកដងឬស្សីរករឿងជនរងគ្រោះ ដោយបានគំរាមគំហែងរកដុតផ្ទះ វ៉ៃកម្ទេចឡាន និងរកសម្លា.ប់ជនរងគ្រោះឈ្មោះ ដាំ ជា ភេទប្រុសចោលម្ដងទៀត ។
ពេលនោះជនរងគ្រោះ បានមកដាក់ពាក្យបណ្តឹងនៅប៉ុស្តិ៍នគលបាលរដ្ឋបាលកំពង់ស្វាយ ក្រោយពីទទួលបានពាក្យបណ្តឹងពីជនរងគ្រោះរួចកម្លាំងប៉ុស្តិ៍នគរបាលរដ្ឋបាលកំពង់ស្វាយបានចុះទៅដល់កន្លែងហេតុ រួចបាននាំខ្លួនជនសង្ស័យយកមកប៉ុស្តិ៍នគរបាលរដ្ឋបាលកំពង់ស្វាយ ដើម្បីធ្វើការសាកសួរ ។
នៅចំពោះសមត្ថកិច្ច ជនសង្ស័យបានឆ្លើយសារភាពថាកា លពីថ្ងៃទី២១ ខែមករា ឆ្នាំ២០២២ខ្លួនបានតេទូរស័ព្ទទៅឈ្មោះទី សេងចាំង ភេទប្រុស អាយុប្រហែល៤៧ឆ្នាំ ជនជាតិខ្មែរ មុខរបរថៅកែការដ្ឋានដឹកដី មានទីលំនៅភូមិព្រែកបាឡាក់ឆឹង ឃុំត្រោយស្លា ស្រុកស្អាង ខេត្តកណ្ដាល ដើម្បីសុំចូលធ្វើការងារវិញ ហើយនឹងសុំខ្ជីប្រាក់ចំនួន២០០០០០៛(ម្ភៃម៉ឺនរៀល) រួចថៅកែការដ្ឋានដឹកដី បានប្រាប់ថា ចាំផ្ញើរតាមឈ្មោះដាំ ជា ភេទប្រុស(ត្រូវជាបងថ្លៃរបស់ខ្ញុំ) ។
លុះដល់ម៉ោង២១និង៣០នាទី ថ្ងៃខែ ឆ្នាំដដែល ខ្លួនស្រវឹងស្រាបានទៅគោះទ្វារផ្ទះជនរងគ្រោះ(បងថ្លៃ) ដើម្បីសួរនាំរឿងលុយដែលខ្លួនបានខ្ជីពីថៅកែដឹកដី ពេលនោះជនរងគ្រោះ(បងថ្លៃ)បានហុចមីកញ្ចប់ពណ៌ខៀវ ចំនួនប្រាំកញ្ចប់មកអោយ ភ្លាមនោះខ្លួនបាននិយាយគំរាមគំហែងជនរងគ្រោះជាច្រើន តែភ្លេចអស់មិនចាំថា ខ្លួនបាននិយាយពាក្យសម្ដីអ្វីខ្លះ ។
លុះដល់ថ្ងៃទី២៥ ខែមករា ឆ្នាំ២០២២វេលាម៉ោង២០ និង២០នាទីជនសង្ស័យបានផឹកស្រាថ្នាំស្រវឹងកាន់កាំបិតផ្គាក់ដងឬស្សី ផ្លែដែកស្រែកជេរគំរាមគំហែងរកសម្លា.ប់ និងរកដុតផ្ទះជនរងគ្រោះចោល ។
ជនសង្ស័យបានឆ្លើយសារភាពទៀតថា មូលដែលខ្លួនធ្វើសកម្មភាពបែបនេះលើជនរងគ្រោះមកពីខ្លួនខឹងជនរងគ្រោះមិនព្រមអោយលុយដែលខ្លួនបានខ្ជីពីថៅកែម្ចាស់ការដ្ឋានដឹកដីរបស់ខ្លួន ។
បច្ចុប្បន្នជនសង្ស័យរួមទាំងវត្ថុតាងបញ្ចូនមកកាន់អធិការដ្ឋាននគរបាលស្រុកកៀនស្វាយ ដើម្បីបន្តតាមនីតិវិធីច្បាប់ ៕
ចែករំលែកព័តមាននេះ