រាជធានីភ្នំពេញ ៖ រឿងរ៉ាវចម្លែកចិត្តមួយបានកើតឡើងនៅទីតាំងឆៀករថយន្តរបស់ក្រសួងសាធារណការនិងដឹកជញ្ជូន ខណៈដែលរថយន្តនីស្សាន់២បាំងកន្លះមួយគ្រឿងដែលម្ចាស់យកមកឆៀក ស្រាប់តែគេផ្អើលឈុលដោយសារតែពេលបើកកាបូរថយន្ត ស្រាប់តែឃើញពស់ថ្លាន់ធំមួយក្បាលដែលមានទម្ងន់ប្រមាណ១០គីឡូក្រាមនៅក្នុងម៉ាស៊ីនរថយន្ត បង្កឱ្យមានងឿងឆ្ងល់ជាខ្លាំង ដែលហេតុការណ៍នេះបានកើតឡើងកាលពីព្រឹកថ្ងៃទី២១ មករា កន្លងមក ។
តាមគណនីឈ្មោះ Phun Sereysoaphon ភុន សេរីសោភ័ណ បានបង្ហោះនៅថ្ងៃទី២១ មករា បានបង្ហាញពីការភ្ញាក់ផ្អើលមនុស្សជាច្រើននាក់ ដែលនាំគ្នាចោមរោមមើលមន្ត្រីឆៀករថយន្តរកវិធីចាប់ពស់ចេញពីក្នុងម៉ាស៊ីនរថយន្ត ។ អ្នកខ្លះនិយាយបែបកំប្លែងដាក់ថា យកឡានមកឆៀក ចាំបាច់យកពស់ថ្លាន់មកជាមួយធ្វើអ្វីពូ ? មានអ្នកខមិនខ្លះបានបញ្ចេញយោបល់បែបកំប្លែងថា វា «ពស់» ខ្ជិលលូនចង់ជិះឡានមកមើលគេឆៀកម្តង ។ ខ្លះថា មានលាភធំហើយ ម្ចាស់រថយន្តឆៀកបានទាំង២ ។
មិនអាចរកម្ចាស់រថយន្តដើម្បីបំភ្លឺបាននោះទេ ជុំវិញពស់ថ្លាន់១ក្បាលមកសម្ងំក្នុងរថយន្តបែបនេះទំនងបែបបែបផ្ទះនៅតំបន់បឹងដែលមានព្រៃនិងជាតំបន់ទើបអភិវឌ្ឍន៍ ។ ករណីពស់ចូលក្នុងរថយន្តនេះតែងកើតមានច្រើនលើកមកហើយដែរ មានខ្លះពស់លូនចូលកែបម៉ូតូក៏មានដែរ ។ នេះវាគ្រាន់តែជារឿងប្លែកមួយប៉ុណ្ណោះ ព្រោះមិនធ្លាប់មានបែបនេះពីមុនមក ៕
ចែករំលែកព័តមាននេះ