រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ផ្ទះស្តុកក្រណាត់បោះដុំមួយល្វែងត្រូវបានអគ្គិភ័យឆាបឆេះបង្កឱ្យក្លាយជាអណ្ដាតភ្លើងយ៉ាងសន្ធោសន្ធៅ ហើយក៏ជាប់ម្ចាស់ផ្ទះស្រីៗចំនួន០៣នាក់នៅខាងក្នុងនោះផងដែរ បណ្ដាលអោយឈ្លក់ផ្សែងភ្លើង និងរលាកភ្លើង របួសធ្ងន់-ស្រាលទាំង៣នាក់ ។ ហេតុការណ៍នេះបង្កឱ្យមានការភ្ញាក់ផ្អើលនេះកាលពីវេលាម៉ោង៣និង៣០នាទីទៀបភ្លឺឈានចូលថ្ងៃទី២៦ ខែមករា ឆ្នាំ២០២២ នៅចំណុចផ្ទះលេខ១C ផ្លូវបេតុង ភូមិបឹងសាឡាង ក្រុម១ នៅជាប់នឹងបុរីសម្បត្តិ ស្ថិតក្នុងសង្កាត់ឫស្សីកែវ ខណ្ឌឫស្សីកែវ ។
សេចក្តីរាយការណ៍បន្តថា ម្ចាស់ផ្ទះកើតហេតុ និងអ្នកស្នាក់នៅក្នុងផ្ទះនៅមិនទាន់ស្គាល់អត្តសញ្ញាណនៅឡើយទេ ខណៈកំពុងបញ្ជូនទៅសង្គ្រោះនៅមន្ទីរពេទ្យ ។
យោងតាមប្រភពព័ត៌មានពីប្រជាពលរដ្ឋនៅជិតខាងផ្ទះកើតហេតុ បានប្រាប់អោយដឹងថា ផ្ទះខាងលើ គឺស្តុកក្រណាត់ពេញក្នុងផ្ទះដោយទុកសម្រាប់លក់បោះដុំនៅផ្សារអូឡាំពិក ។ ហើយនៅមុនពេលកើតហេតុ នាពេលល្ងាចគឺម្ចាស់ផ្ទះគាត់បានដុតកំទេចក្រណាត់នៅខាងមុខផ្ទះរបស់គាត់ តែត្រូវសមត្ថកិច្ចមូលដ្ឋានចុះទៅហាមឃាត់ ហើយក៏ត្រូវបានម្ចាស់ផ្ទះពន្លត់ភ្លើងវិញទៅ។
ពលរដ្ឋបន្តថា លុះដល់ម៉ោងកើតហេតុ ស្រាប់តែមានអណ្ដាតភ្លើងឆាបឆេះយ៉ាងសន្ធោសន្ធៅនៅខាងក្នុងផ្ទះកើតហេតុ និងខាងមុខផ្ទះភ្លើងក៏បានឆេះរាលដាលដល់រថយន្តតូយ៉ូតាព្រូសមួយគ្រឿងទៀតផង បណ្តាលឲ្យខូចខាតទាំងស្រុង ទើបបង្កឱ្យមានការភ្ញាក់ផ្អើលដល់អ្នកជិតខាង ហើយក៏នាំគ្នាគោះទ្វារ និងស្រែកហៅម្ចាស់ផ្ទះ ប៉ុន្តែដោយសារតែភ្លើងឆាបឆេះខ្លាំងទៅហើយ ទើបអ្នកនៅខាងក្នុងមិនអាចចេញមកក្រៅបាន គឺបានត្រឹមនាំគ្នារត់ទៅជាន់លើដំបូល ដើម្បីគេចពីអណ្ដាតភ្លើងតែប៉ុណ្ណោះ។
ប្រភពពីប្រជាពលរដ្ឋដដែល បានបន្តទៀតថា ភ្លាមៗនោះ គាត់ក៏បានរាយការណ៍ប្រាប់សមត្ថកិច្ចមូលដ្ឋាន ដើម្បីសុំរថយន្ដពន្លត់អគ្គិភ័យជាច្រើនគ្រឿងចេញអន្តរាគមន៍ជួយសង្គ្រោះ ។
បន្ទាប់ពីទទួលបានដំណឹងខាងលើនេះភ្លាម កម្លាំងសមត្ថកិច្ចនៃការិយាល័យបង្ការ និងពន្លត់អគ្គិភ័យ ក៏បានចេញរថយន្តពន្លត់អគ្គិភ័យជាច្រើនគ្រឿង មកអន្តរាគមន៍ជួយសង្គ្រោះទាន់ពេលវេលា និងបានជួយសង្គ្រោះអាយុជីវិតមនុស្សដែលជាប់នៅខាងក្នុងផ្ទះបានដោយសុវត្ថិភាពផងដែរ ។
គួរបញ្ជាក់ថា ពាក់ព័ន្ធនឹងអគ្គិភ័យខាងលើ គឺបណ្តាលមនុស្សស្រីចំនួន៣នាក់ដែលជាម្ចាស់ផ្ទះនោះ រងរបួសធ្ងន់-ស្រាល ដោយកូនស្រីម្ចាស់ផ្ទះម្នាក់រងរបួសធ្ងន់ ចំណែកម្តាយ និងស្ត្រីម្នាក់ទៀតរបួសស្រាល ប៉ុន្តែគួរឱ្យអនិច្ចាណាស់ កូនស្រីរបស់ម្ចាស់ផ្ទះដែលរងរបួសធ្ងន់នោះ ខណៈពេលបញ្ជូនទៅដល់មន្ទីរពេទ្យ គឺបានស្លា.ប់បាត់បង់ជីវិតទៅហើយ។
គួរបញ្ជាក់ទៀតថា ចំពោះមូលហេតុដែលបង្កអោយមានអណ្ដាតភ្លើងឆាបឆេះខាងលើនេះ សមត្ថកិច្ចនៅមិនទាន់អាចបញ្ជាក់បានទេ ខណៈសមត្ថកិច្ចកំពុងតែស្រាវជ្រាវរកមូលហេតុដែលបណ្តាលឱ្យកើតមានអគ្គិភ័យនេះ ។ ហើយចំពោះសម្ភារៈខូចខាតគឺក្រណាត់នៅក្នុងផ្ទះលេខ១C រងការខូចខាតទាំងស្រុង និងរថយន្តតូយ៉ូតាព្រូស ពណ៌ទឹកប្រាក់ ពាក់ស្លាកភ្នំពេញ 2BG-2501 ក៏រងការខូចខាតទាំងស្រុងតែម្តង ។
ព័ត៌មានពិស្តារនឹងមានផ្សាយជូននៅពេលក្រោយបន្តទៀត ។
ចែករំលែកព័តមាននេះ