បន្ទាយមានជ័យ៖ នគរបាលការិយាល័យព្រហ្មទណ្ឌកំរិតស្រាល នៃស្នងការដ្ឋាននគគរបាលខេត្តបន្ទាយមានជ័យបានបញ្ជូន ជនសង្ស័យម្នាក់ ទៅសាលាដំបូងខេត្តបន្ទាយមានជ័យ ថ្ងៃទី២៧ ខែកក្កដា ឆ្នាំ២០២១ ពីបទលួចគោរបស់ប្រជាពលរដ្ឋ នៅភូមិប្រាសាទ ឃុំស្លក្រាម ស្រុកស្វាយចេក ខេត្តបន្ទាយមានជ័យ។
លោកវរសេនីយ៍ទោ ពេជ្រ ប៊ុនធឿន នាយការិយាល័យនគរបាលព្រហ្មទណ្ឌកំរិតស្រាល បានឲ្យដឹងថា ជនសង្ស័យឈ្មោះ សោន ម៉ៅ ភេទប្រុស អាយុ ៤៥ឆ្នាំ នៅភូមិស្នោ ឃុំត្រពាំងស្នោ ខេត្តព្រះវិហារ។ ជននេះ បានចូលលួចគោញី ចំនួន ៣ក្បាល របស់ប្រជាពលរដ្ឋ ឈ្មោះ វ៉ាត់ ផុន នៅភូមិប្រសាទ ឃុំស្លក្រាម ស្រុកស្វាយចេក ដែលបានចងចម្ងាយពីផ្ទះ ៥០ម៉ែត្រ នៅយប់ថ្ងៃទី២៥ ខែកក្កដា ឆ្នាំ២០២១ ហើយត្រូវសមត្ថកិច្ចនគរបាលស្រុកស្វាយចេក ឃាត់បានរថយន្តដឹកគោ ម៉ាក ហុកឡកូរ៉េ ពណ៌ខៀវ ពាក់ស្លាកលេខ កំពត 2A-0595 នៅវលាម៉ោង ១២ និង៥៥នាទីកណ្តាលអាធ្រាត្រ ឈានចូលថ្ងៃទី២៦ ខែកក្កកដា ឆ្នាំ២០២១ នៅលើកំណាត់ផ្លូវជាតិលេខ ៥៦A មុខអនុវិទ្យាល័យកកោះ ស្ថិតក្នុងភូមិកកោះ ឃុំស្លក្រាម ស្រុកស្វាយចេក។ ជនសង្ស័យ និងវត្ថុតាង ត្រូវបាននាំទៅអធិការដ្ឋាននគរបាលស្រុកស្វាយចេក ដើម្បីសួរនាំ និងបញ្ជូនបន្ត ទៅការិយាល័យនគរបាលព្រហ្មទណ្ឌកំរិតស្រាល ដើម្បីសួរនាំបន្ថែម។
លោកនាយការិយាល័យ បានបញ្ជាក់ថា នៅចំពោះមុខសមត្ថកិច្ច ជនសង្ស័យ ឈ្មោះ សោន ម៉ៅ បានសារភាពថា ខ្លួន និងបក្សពួក ចំនួន ២នាក់ទៀត មានឈ្មោះ ផុន និងឈ្មោះ ឆើត ពួកគេបានជិះម៉ូតូ ម្នាក់ ១គ្រឿង និងរូបគេ ជាអ្នកបើកឡាន មកពីស្រុកអន្លង់វែង បាននាំគ្នា មកលួចគោ នៅនៅភូមិប្រសាទ ឃុំស្លក្រាម ស្រុកស្វាយចេក។ ក្រោយពីលួចបាន ពួកគេយកគោដឹកឡើងឡានរួច ឈ្មោះ ផុន និងឈ្មោះ ឆើត បានជិះម៉ូតូគេចខ្លួន ទៅស្រុកអន្លង់វែងមុន។ ចំណែករូបគេបើកឡានដឹកគោញីទាំង ៣ក្បាលនោះ។ ពេលមកដល់តាមផ្លូវជាតិ ត្រូវបាននគរបាល ឃាត់។
ជនសង្ស័យសារភាព បន្តថា រូបគេ និងបក្សពួក ធ្លាប់លួចគោ ចំនួន ៣លើកមកហើយ ក្នុងភូមិសាស្ត្រនៃខេត្តបន្ទាយមានជ័យនេះ។
លោកវរសេនីយ៍ទោ ពេជ្រ ប៊ុនធឿន បានបញ្ជាក់ទៀតថា ដោយផ្អែកលើបណ្តឹងរបស់ជនរងគ្រោះ និងឃាត់ខ្លួន មានវត្ថុតាងជាក់ស្តែង ព្រមទាំងចម្លើយសារភាព ជនសង្ស័យឈ្មោះ សោន ម៉ៅ ត្រូវបានកម្លាំងនគរបាលជំនាញព្រហ្មទណ្ឌកំរិតស្រាល បញ្ជូនទៅសាលាដំបូង ខេត្តបន្ទាយមានជ័យ ដើម្បីចាត់ការតាមនីតិវិធីច្បាប់។ ចំណែកគោទាំង ៣ក្បាល ត្រូវបាននគរបាលស្រុកស្វាយចេក ប្រគល់ជូនម្ចាស់ដើមវិញ៕ ណុប រក្សា
ចែករំលែកព័តមាននេះ