លោក​ទូត សន្ទនា​ជាមួយ​ចៅស្រី​លោក ស៊ី​ន ស៊ី​សា​មុត ពី​តន្ត្រី​កម្ពុជា - Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

លោក​ទូត សន្ទនា​ជាមួយ​ចៅស្រី​លោក ស៊ី​ន ស៊ី​សា​មុត ពី​តន្ត្រី​កម្ពុជា

1 ខែ មុន

រាជធានី​ភ្នំពេញ​៖ លោក​ឯកអគ្គរដ្ឋទូត​សហរដ្ឋអាមេរិក​ប្រចាំ​កម្ពុជា W. Patrick Murphy និង​អ្នក​ចម្រៀង កញ្ញា ស៊ី​ន សេដ្ឋ​សុ​ជ្ឈ​តា ដែល​ជា​ចៅស្រី​បង្កើត​អធិរាជ​សម្លេង​លោក…

រាជធានី​ភ្នំពេញ​៖ លោក​ឯកអគ្គរដ្ឋទូត​សហរដ្ឋអាមេរិក​ប្រចាំ​កម្ពុជា W. Patrick Murphy និង​អ្នក​ចម្រៀង កញ្ញា ស៊ី​ន សេដ្ឋ​សុ​ជ្ឈ​តា ដែល​ជា​ចៅស្រី​បង្កើត​អធិរាជ​សម្លេង​លោក ស៊ី​ន ស៊ី​សា​មុត បាន​ថត​ទុក​នូវ​វី​ដ​អូ​ជជែក​គ្នា អំពី​វិស័យ​តន្ត្រី​នៅ​កម្ពុជា និង​ចំណាប់អារម្មណ៍​ក្នុង​ការ​រក្សា​មរតក​​ចម្រៀង​របស់​ជីតា​នាង ។

Picture

លោក​ឯកអគ្គរដ្ឋទូត បាន​ភ្ញាក់ផ្អើល ដោយ​ដឹង​ថា​ លោក ស៊ី​ន ស៊ី​សា​មុត នៅ​តែ​ទទួល​បានការ​ស្រឡាញ់​​ពេញ​និយម ស្តាប់​ចម្រៀង​លោក នៅ​ទូ​ទាំង​ប្រទេស​កម្ពុជា ទោះបី​លោក​បាន​បាត់បង់​ជីវិត​​អស់​រយៈពេល​ជា​យូរ​មក​ហើយ​ក្តី ។

លោក​ឯកអគ្គរដ្ឋទូត បាន​មាន​ប្រសាសន៍​ថា​៖ «​ខ្ញុំ​ស្តាប់​ចម្រៀង​របស់​គាត់​តាម ស្ថានីយ៍​វិទ្យុ​ខ្លះ បាន​ឃើញ​រូបថត​គាត់ ដាក់​តាំងនៅ​តាម​ភោជនីយដ្ឋាន និង​សណ្ឋាគារ​ប្រណីត​មួយ​ចំនួន​។ រហូត​ដល់​​សព្វ​ថ្ងៃនេះ បទ​ចម្រៀង​របស់​លោក នៅ​តែ​ពី​​រោះ​រណ្តំ​ចិត្ត របស់​មនុស្ស​ទាំង​ចាស់ ក្មេង​សព្វ​ថ្ងៃនេះ​»​។

Picture
Picture

កញ្ញា ស៊ី​ន សេដ្ឋ​សុ​ជ្ឈ​តា បានឱ្យ​ដឹង​ថា កញ្ញា​មិន​ដែល​បានឃើញ​ជីតា​របស់​នាង​ដោយ​ផ្ទាល់​នោះ​​ទេ តែ​កញ្ញា​បានដឹង​ឮ​រឿងរ៉ាវ​គាត់ តាម​ជីដូន​បង្កើត​របស់​កញ្ញា​ដែល​រស់នៅ​ខេត្តស្ទឹងត្រែង​។

Picture

កញ្ញា សេដ្ឋ​សុ​ជ្ឈ​តា បន្ត​ថា ៖ «​បទ​ចម្រៀង​ជា​ច្រើន​របស់​គាត់ បង្កប់​អត្ថន័យ ប្រើ​ន័យធៀប​ជីវិត​មនុស្ស​ទៅ​នឹង​ធម្មជាតិ​។ លោកយាយ​ថា នា​ថ្ងៃមួយ ពួក​គាត់​ទាំង​ពីរ បាន​ទៅ​លេង​សៀមរាប ដើរ មើល​​ប្រាសាទ ហើយ​លោកយាយ​ខ្ញុំ​ចង់​ចូល​មើល​ប្រាសាទ​មួយ តែ​លោកតា​ខ្ញុំ (​ស៊ី​ន ស៊ី​សា​មុត​) បាន​​និយាយ​ថា គាត់​នឹង​រង់ចាំ​នៅ​ខាងក្រៅ ហើយ​ប៉ុន្មាន​ម៉ោង​ក្រោយមក គាត់​សរសេរ​បាន​ចម្រៀង​​មួយ​បទ​។ ខ្ញុំ​មានការ​ស្ញប់ស្ញែង​ចំពោះ​រឿងរ៉ាវ ទាក់ទង​នឹង​ការ​និពន្ធ​បទ​ចម្រៀង​របស់​គាត់»​។

Picture

សូម​ជម្រាប​ជូន​ថា កញ្ញា សេដ្ឋ​សុ​ជ្ឈ​តា បាន​បញ្ចេញ​នូវ​ចម្រៀង​ថ្មី ៣ បទ ដោយ​បទ​ទី​១ នឹង​ចេញ​​នៅ​ថ្ងៃ​ទី​១៩ ខែកុម្ភៈ​នេះ​ហើយ ។ កញ្ញា សេដ្ឋ​សុ​ជ្ឈ​តា បាន​បន្ថែម​ថា ៖ «​ខ្ញុំ​ប្រើ​ពាក្យ​សាមញ្ញ ហើយ​ត្រង់​ៗ ក្នុង​បទ​ចម្រៀង​ទាំងនេះ ពីព្រោះ​ខ្ញុំ​ចង់​ឲ្យ​ទស្សនិកជន ងាយ​យល់​»​។

Picture

គួរ​បញ្ជាក់​ផង​ដែរ​ថា កិច្ច​សន្ទនា​វី​ដេ​អូ​រយៈពេល ២០ នាទី របស់​លោក​ឯកអគ្គរដ្ឋទូត​សហ​រដ្ឋ​អាមេរិក​ប្រចាំ​កម្ពុជា និង​អ្នកចម្រៀង កញ្ញា ស៊ី​ន សេដ្ឋ​សុ​ជ្ឈ​តា ត្រូវ​បាន​ផលិត​ដោយ​ក្រុមហ៊ុន Cambodian Broadcasting Service​ ដែល​បាន​ចាក់​ផ្សាយ​តាម​បណ្តាញ​សង្គម​ហ្វេ​ស​ប៊ុ​ក របស់​​ស្ថានទូត​អា​មេ​រិ​ក នៅ​ថ្ងៃ​ទី​១១ ខែកុម្ភៈ​នេះ​។ អ្នក​សារព័ត៌មាន​អាច​ផ្សាយ និង​ប្រើប្រាស់​នូវ​វី​ដេ​អូ​នេះ​ទាំងស្រុង​បាន ៕