គ្រាន់តែឡើងតំណែងភ្លាម រដ្ឋមន្ត្រីក្រសួងព័ត៌មានមីយ៉ាម៉ាព្រមានប្រព័ន្ធផ្សព្វផ្សាយយ៉ាងចាស់ដៃ
ប្រទេសមីយ៉ាម៉ា ៖ យោងតាមការចេញផ្សាយរបស់សារព័ត៌មាន មីយ៉ាម៉ា ថាមស៍ ចេញផ្សាយថ្ងៃទី០៣ ខែ កុម្ភៈ ឆ្នាំ ២០២១…
ប្រទេសមីយ៉ាម៉ា ៖ យោងតាមការចេញផ្សាយរបស់សារព័ត៌មាន មីយ៉ាម៉ា ថាមស៍ ចេញផ្សាយថ្ងៃទី០៣ ខែ កុម្ភៈ ឆ្នាំ ២០២១ បានឱ្យដឹងថា ក្រសួងព័ត៌នៃប្រទេសមីយ៉ាម៉ា បានចេញសេចក្តីថ្លែងការណ៍ នៅថ្ងៃទី២ ខែកុម្ភៈ ឆ្នាំ២០២១ ដោយព្រមានដល់ប្រព័ន្ធផ្សព្វផ្សាយ និងពលរដ្ឋមួយចំនួនកុំឱ្យផ្សព្វផ្សាយពាក្យចចាមអារ៉ាមតាមបណ្តាញសង្គម ឬញុះញង់ឱ្យមានភាពចលាចល ដោយជំរុញឱ្យប្រជាជនសហការជាមួយរដ្ឋាភិបាល ។
យោងតាមសេចក្តីប្រកាសបន្តថា ៖ «ប្រព័ន្ធផ្សព្វផ្សាយ និងពលរដ្ឋមួយចំនួនកំពុងផ្សព្វផ្សាយពាក្យចចាមអារ៉ាមលើប្រព័ន្ធផ្សព្វផ្សាយសង្គមមួយចំនួនដែលធ្វើការប្រមូលផ្តុំ ដើម្បីញុះញង់ឱ្យមានភាពច្របូកច្របល់ និងការចេញសេចក្តីថ្លែងការណ៍ដែលអាចបង្កភាពចលាចល» ។ យើងជម្រុញឱ្យប្រជាជនកុំអនុវត្តសកម្មភាពទាំងនេះ ហើយយើងកំពុងជូនដំណឹងដល់សាធារណៈជនឱ្យចូលរួមសហការស្របតាមច្បាប់ និងរដ្ឋាភិបាលដែលមានស្រាប់។
សូមជម្រាបជូនថា បន្ទាប់ពីប្រកាសប្រទេសក្នុងគ្រាមានអាសន្ន នៅថ្ងៃទី១ ខែកុម្ភៈ ឆ្នាំ ២០២១មក លោកឧត្តមសេនីយ៍ Min Aung Hlaing បានតែងតាំងលោក U Chit Hlaing ជារដ្ឋមន្ត្រីថ្មីនៃក្រសួងព័ត៌មាន ដែលបានជំនួសលោករដ្ឋមន្ត្រី U Pe Myint។
គួរបញ្ជាក់ផងដែរថា លោក U Chit Hlaing គឺជាអតីតមន្ត្រីយោធា និងជាអ្នកនិពន្ធក្រោមឈ្មោះ Chit Naing (ចិត្តវិទ្យា) ។ សេចក្តីថ្លែងការណ៍នេះបានធ្វើឡើងមួយថ្ងៃ បន្ទាប់ពីការតែងតាំងរបស់គាត់ ។
សេចក្តីជូនដំណឹងបានចាប់ផ្តើមដោយលើកឡើងអំពីអនុក្រឹត្យ ដែលបានប្រកាសប្រទេសក្នុងគ្រាអាសន្នរយៈមួយឆ្នាំរបស់រដ្ឋាភិបាលយោធា ដែលក្នុងអំឡុងពេលមួយឆ្នាំនេះ គឺក្នុងគោលបំណងដោះស្រាយភាពមិនស្របគ្នា នៅក្នុងបញ្ជីបោះឆ្នោតដែលមានចាប់តាំងពីថ្ងៃទី៨ ខែ វិច្ឆិកា ឆ្នាំ ២០២០មកម្ល៉េះ។
សេចក្តីជូនដំណឹងបាននិយាយថា បញ្ហានេះបំផ្លាញសាមគ្គីភាពជាមួយជនជាតិភាគតិច និងបង្កអន្តរាយដល់ស្ថិរភាពរបស់ប្រទេសជាតិ ។ ដោយឡែកសេចក្តីជូនដំណឹងនេះ មិនបានផ្តល់ព័ត៌មានលម្អិត ឬផ្តល់ឧទាហរណ៍ណាមួយ អំពីប្រភេទនៃពាក្យចចាមអារ៉ាម ឬការប្រមូលផ្តុំ ដែលសេចក្តីជូនដំណឹងបានសំដៅទៅលើនោះទេ ៕
ចែករំលែកព័តមាននេះ