ខេត្តកណ្ដាល ៖ បើតាមសេចក្តីរាយការណ៍បឋមឲ្យដឹងថា អំពើហិង្សាមួយបានក្លាយទៅជាសោកនាដកម្មបង្កដោយជនល្មើស៤នាក់ប្រើកាំបិតផ្គាក់កាប់ផ្តាច់ជីវិតគូបដិបក្ខ ទោះជាប្រពន្ធជនរងគ្រោះស្រែកយំលើកដៃសំពះអង្វរយ៉ាងណាក្តី ដែលហេតុការណ៍នេះបានកើតឡើងកាលពីថ្ងៃទី៣១ ខែមករា ឆ្នាំ២០២១ នៅចំណុចមុខផ្ទះជនរងគ្រោះ (ទំនប់៣៨)…
ខេត្តកណ្ដាល ៖ បើតាមសេចក្តីរាយការណ៍បឋមឲ្យដឹងថា អំពើហិង្សាមួយបានក្លាយទៅជាសោកនាដកម្មបង្កដោយជនល្មើស៤នាក់ប្រើកាំបិតផ្គាក់កាប់ផ្តាច់ជីវិតគូបដិបក្ខ ទោះជាប្រពន្ធជនរងគ្រោះស្រែកយំលើកដៃសំពះអង្វរយ៉ាងណាក្តី ដែលហេតុការណ៍នេះបានកើតឡើងកាលពីថ្ងៃទី៣១ ខែមករា ឆ្នាំ២០២១ នៅចំណុចមុខផ្ទះជនរងគ្រោះ (ទំនប់៣៨) ស្ថិតក្នុងភូមិព្រែកតារ័ត្ន ឃុំពោធិ៍បាន ស្រុកកោះធំ ខេត្តកណ្តាល ។
សេចក្តីរាយការណ៍បន្តថា ជនរងគ្រោះដល់ជីវិតខាងលើឈ្មោះ វ៉ាន់ វុន ភេទប្រុស អាយុ៣៥ឆ្នាំ មុខរបរនេសាទត្រី មានទីលំនៅក្នុងភូមិព្រែកតារ័ត្ន ឃុំពោធិ៍បាន ស្រុកកោះធំ ខេត្តកណ្តាល ។
សេចក្តីរាយការណ៍ឲ្យដឹងបន្តថា យោងតាមការបំភ្លឺរបស់ឈ្មោះ អ៊ីម សុខងីម ភេទស្រី ត្រូវជាប្រពន្ធរបស់ជនរងគ្រោះបានរៀបរាប់ប្រាប់សមត្ថកិច្ចថា នៅមុនពេលកើតហេតុ វេលាម៉ោងប្រមាណ៥និង៣០នាទីល្ងាចថ្ងៃខែខាងលើនេះ ប្ដីរបស់គាត់ដែលជាជនរងគ្រោះបានត្រឡប់មកពីលេងផ្ទះបងប្អូននៅឯឃុំក្អមសំណរ ស្រុកលើកដែក ខេតកណ្តាលវិញ ដោយស្ថិតក្នុងស្ថានភាពស្រវឹងស្រារួចទៅហើយ ហើយក៏បានចូលដេកនៅលើអង្រឹងក្នុងរោងបាយខាងក្រោយផ្ទះ ។
ប្រពន្ធជនរងគ្រោះបន្តថា លុះដល់វេលាម៉ោង៦និង៥០នាទីល្ងាច ស្រាប់តែឈ្មោះ ស៊ាង ឌៀប ភេទប្រុស ជនជាតិវៀតណាម ដែលមានផ្ទះនៅខាងកើតផ្ទះរបស់គាត់ បានជិះម៉ូតូមកហៅជនរងគ្រោះ (ប្តីគាត់) ឲ្យទៅផឹកស្រាជាមួយពួកគេ តែប្តីគាត់មិនព្រមទៅ ដោយសារតែឈ្មោះ ស៊ាង ឌៀប និងបក្ខពួកមួយក្រុមនោះធ្លាប់មានទំនាស់ទាស់ពាក្យសំដីនិយាយជេរឌឺដងដាក់គ្នាកន្លងមក ។
ប្រពន្ធជនរងគ្រោះបន្តទៀតថា នៅពេលប្តីរបស់គាត់ប្រកែកមិនព្រមទៅ ក៏ស្រាប់តែកើតមានទំនាស់ពាក្យសំដីតូចធំដាក់គ្នាម្តងទៀតកាន់តែខ្លាំងឡើងៗ រហូតបានធ្វើឲ្យពួកគាត់ទាំង២នាក់ដេញវាយគ្នាទៅវិញទៅមក និងដេញវ៉ៃគ្នាទៅដល់ជិតមុខរោងអ្នកតាភូមិ ដែលនៅខាងលិចផ្ទះ។ ដោយឃើញដូច្នោះ ខាងភាគីជនបង្កមាន៣នាក់បងប្អូន ដោយ១- ឈ្មោះ លន សុខវឿន (កាន់កាំបិតផ្គាក់) ២-ឈ្មោះ លន សុខវី (កាន់កាំបិតផ្គាក់) និង៣-ឈ្មោះ លន សុខវន (កាន់ដំបងឈើ) បានរត់មកព្រួតគ្នាវាយ និងកាប់ទៅលើជនរងគ្រោះ ធ្វើឲ្យជនរងគ្រោះរត់គេចខ្លួនទៅពូនក្បែរពាងទឹកខាងមុខផ្ទះ ។
ប្រភពដដែលបន្តថា ប៉ុន្តែគ្រានោះជនសង្ស័យជាគូទំនាស់អត់ក្តីមេត្តា ដោយទាំង៤នាក់បានតាមទាន់នឹងប្ដូរគ្នាកាប់ម្ដងម្នាក់ៗទៅលើជនរងគ្រោះ បណ្តាលឲ្យដេកដួលទៅនឹងដីរហូតបាត់បង់ជីវិតនៅក្នុងថ្លុកឈាមមួយរំពេច ខណៈនោះទោះជារូបគាត់ជាប្រពន្ធស្រែកយំផង លើកដៃសំពះអង្វរ.កពួកគេយ៉ាងណាក៏ដោយ ក៏ពួកគេមិនលើកលែងដែរ ។
ភរិយាជនរងគ្រោះបន្តថា ក្រោយកើតមានអំពើកាប់ប្រហារនោះមក ជនសង្ស័យទាំង៤នាក់ បងប្អូនខាងលើ ក៏បាននាំគ្នាគេចខ្លួនបាត់អស់ ដោយកាន់កាំបិតនៅដៃទៅជាមួយផង ។ បន្ទាប់ពីជនដៃដល់បាននាំគ្នាគេចខ្លួនបាត់អស់ទៅ និងនៅពេលឃើញប្ដីគាត់ដេកបាត់បង់ជីវិតនៅក្នុងថ្លុកឈាម ដោយស្នាមរបួសជាច្រើនកាំបិត រូបគាត់ក៏បានជិះម៉ូតូទៅប្រាប់បងប្អូនឲ្យមកជួយមើល និងទៅរាយការណ៍ជូនសមត្ថកិច្ចនគរបាលមូលដ្ឋាន ដើម្បីដឹងពីហេតុការណ៍នេះតែម្តង។
ក្រោយពីទទួលបានព័ត៌មានខាងលើនេះភ្លាម កម្លាំងសមត្ថកិច្ចនគរបាលជំនាញ ខេត្ត ស្រុក និងមូលដ្ឋាន បានចុះទៅដល់កន្លែងកើតហេតុ និងបានពិនិត្យកន្លែងកើតហេតុ ព្រមទាំងសាកសពជនរងគ្រោះ ។ បន្ទាប់មកបានធ្វើការសន្និដានថា ករណីកាប់ផ្តាច់ជីវិតយ៉ាងឃោរឃៅរហូតដល់មរណភាពជនរងគ្រោះនេះ គឺចាត់ទុកជាអំពើ ឃា.ត.ក.ម្ម ។
ដូច្នោះសមត្ថកិច្ចមានភារកិច្ចដុតដៃដុតជើង ស្រាវជ្រាវ និងស្វែងរកចាប់ខ្លួនជនបង្កដែលសុទ្ធតែបានស្គាល់អត្តសញ្ញាណទាំងអស់នោះ យកមកផ្តន្ទាទោសតាមច្បាប់។ ចំណែកសពជនរងគ្រោះ ត្រូវបានភរិយា និងក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ