ស្អែកនេះ! រថយន្តប៉ុន្មានប្រភេទនេះមិនឱ្យបើកឆ្លងកាត់មហាវិថីឈ្នះឈ្នះ១ព្រឹក
- ភ្នំពេញ
រាជធានីភ្នំពេញ ៖ បើគ្មានអ្វីប្រែប្រួលទេនោះ នៅព្រឹកស្អែកចំថ្ងៃច័ន្ទ ទី ០១ ខែកុម្ភៈ ឆ្នាំ២០២១ រថយន្តដឹកទំនិញ រថយន្តធុនធំ…
រាជធានីភ្នំពេញ ៖ បើគ្មានអ្វីប្រែប្រួលទេនោះ នៅព្រឹកស្អែកចំថ្ងៃច័ន្ទ ទី ០១ ខែកុម្ភៈ ឆ្នាំ២០២១ រថយន្តដឹកទំនិញ រថយន្តធុនធំ និងរថយន្តដឹកដីគ្រប់ប្រភេទ នឹងមិនត្រូវបានអនុញ្ញាតឲ្យបើកឆ្លងកាត់លើកំណាត់មហាវិថីឈ្នះឈ្នះ ចាប់ពីផ្លូវជាតិលេខ៦ រហូតដល់ស្ពានព្រែកព្នៅ រយៈពេលមួយព្រឹកពេញ ។ នេះបើយោងតាមសេចក្តីជូនដំណឹងរបស់សាលារាជធានីភ្នំពេញ ។
ប្រភពដដែលបានឲ្យដឹងថា ការបញ្ចៀសចរាចររថយន្តដឹកទំនិញ រថយន្តធុនធំ និងរថយន្តដឹកដីជាបណ្តោះអាសន្ននេះ គឺធ្វើឡើងតែមួយព្រឹកថ្ងៃទី ១ ខែកុម្ភៈ ក្នុងអំឡុងពេលបើកការដ្ឋានសាងសង់រោងចក្រប្រព្រឹត្តកម្មទឹកស្អាតបាក់ខែង និងពិធីសម្ភោធដាក់ឲ្យដំណើរការជាផ្លូវការរោងចក្រប្រព្រឹត្តកម្មទឹកស្អាតចំការមន ។
សូមបញ្ជាក់ថា តាមកម្មវិធីដែលបានគ្រោងទុក នៅព្រឹកថ្ងៃទី១ ខែកុម្ភៈ ឆ្នាំ២០២១ សម្តេចតេជោហ៊ុន សែន នាយករដ្ឋមន្ត្រីកម្ពុជានឹងអញ្ជើញជាអធិបតីភាពដីខ្ពង់ខ្ពស់ ក្នុងពិធីបើកការដ្ឋានសាងសង់រោងចក្រប្រព្រឹត្តកម្មទឹកស្អាត បាក់ខែង និងប្រកាសសម្ពោធដាក់ឲ្យដំណើរការជាផ្លូវការរោងចក្រប្រព្រឹត្តកម្មទឹកស្អាត ចំការមន ស្ថិតនៅភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។ ដែលគម្រោងសាងសង់រោងចក្រផលិតទឹកស្អាតថ្មីមួយទៀត ស្ថិតនៅសង្កាត់បាក់ខែង ចំណាយទឹកប្រាក់ប្រមាណជាង ២២០លានដុល្លារអាមេរិក។
សូមបញ្ជាក់ផងដែរថា សេចក្តីប្រកាសរបស់រដ្ឋាករទឹកស្វយ័តក្រុងភ្នំពេញ បង្ហាញថា គម្រោងសាងសង់រោងចក្រប្រព្រឹត្តកម្មទឹកស្អាត បាក់ខែង មានសមត្ថភាពផលិត ១៩៥.០០០ ម៉ែត្រគូប ក្នុងមួយថ្ងៃ ស្ថិតក្នុងសង្កាត់បាក់ខែង ចាប់ផ្តើមសាងសង់ នៅខែមេសា ឆ្នាំ២០១៩។ រោងចក្រប្រព្រឹត្តកម្មទឹកស្អាត បាក់ខែង ត្រូវបានសាងសង់ឡើង បន្ទាប់ពីការសាងសង់រោងចក្រប្រព្រឹត្តកម្មទឹកស្អាត និរោធ ជំហានទី២ បានសម្ពោធដាក់ឲ្យប្រើប្រាស់ជាផ្លូវការកាលពីដើមខែមេសា ឆ្នាំ២០១៧។
រោងចក្រប្រព្រឹត្តកម្មទឹកស្អាត បាក់ខែង នឹងក្លាយជាទីតាំងផលិតទឹកស្អាតធំជាងគេ នៅក្នុងរាជធានីភ្នំពេញ ហើយនៅពេលការសាងសង់ ត្រូវបានបញ្ចប់ យើងនឹងអាចផ្គត់ផ្គង់ទឹកស្អាតបានប្រមាណជា ១ លានម៉ែត្រគូប ក្នុងមួយថ្ងៃ ។
សម្តេចតេជោ ហ៊ុន សែន នៅរសៀលថ្ងៃសៅរ៍ ទី ៣០ ខែមករានេះ បានឲ្យដឹងផងដែរអំពីដំណើរនៃការអភិវឌ្ឍទឹកស្អាតនៅកម្ពុជា ។ សម្តេចបានបញ្ជាក់ថា ទឹកគឺជាតម្រូវការដ៏ចាំបាច់មួយក្នុងជីវភាពប្រចាំថ្ងៃរបស់មនុស្ស សត្វ រុក្ខជាតិនានា ព្រមទាំងសម្រាប់កិច្ចការអភិវឌ្ឍ សេដ្ឋកិច្ចជាតិផងដែរ ។ ហេតុនេះហើយ ការងារផ្គត់ផ្គង់ទឹកស្អាត គឺជាកិច្ចការចម្បងមួយ សំដៅបំពេញតម្រូវការក្នុងសង្គម អោយស្របទៅនឹងការរីកចម្រើន នៃសេដ្ឋកិច្ចជាតិ និងស្ថិតនៅក្នុងយុទ្ធសាស្ត្រចតុកោណរបស់រាជរដ្ឋាភិបាលកម្ពុជា។
សម្តេចតេជោ បានបន្តថា ឆ្លើយតបទៅនឹងតម្រូវការដ៏ចាំបាច់ ក្នុងជីវភាពរស់នៅប្រចាំថ្ងៃ របស់ប្រជាពលរដ្ឋទាំងទីក្រុង និងជនបទនោះ រាជរដ្ឋាភិបាលកម្ពុជា បានមានផែនការច្បាស់លាស់មួយក្នុងការអភិវឌ្ឍវិស័យទឹកនេះ និងដើម្បីសម្រេចបាននូវ «គោលនយោបាយទឹកស្អាតរបស់សម្តេចតេជោ» ដែលកំណត់ថា នៅឆ្នាំ២០២៥ ប្រជាពលរដ្ឋរស់នៅតាមទីក្រុង ទីប្រជុំជន នៅទូទាំងប្រទេសនឹងទទួលបាននូវការផ្គត់ផ្គង់ទឹកស្អាត១០០% ៕
ចែករំលែកព័តមាននេះ