ខេត្តប៉ៃលិន ៖ មានករណីគ្រោះថ្នាក់ចរាចរណ៍មួយ ដោយរថយន្តមួយគ្រឿងបើកបរចេញពីផ្ទះឆ្លងផ្លូវជាតិលេខ៥៧ មិនប្រយ័ត្នក៍ជ្រុលទៅបុកម៉ូតូមួយគ្រឿង ដែលបើកបរនៅលើដងផ្លូវក្នុងទិសដៅពីកើតទៅលិច រួចម៉ូតូនោះក៏រេចង្កូតទៅកៀរម៉ូតូមួយគ្រឿងទៀត បណ្ដាលឲ្យដួលរងរបួសធ្ងន់២នាក់ និងស្រាល២នាក់ ចំណែករថយន្តខូចខាតស្រាលផ្នែកខាងមុខ…
ខេត្តប៉ៃលិន ៖ មានករណីគ្រោះថ្នាក់ចរាចរណ៍មួយ ដោយរថយន្តមួយគ្រឿងបើកបរចេញពីផ្ទះឆ្លងផ្លូវជាតិលេខ៥៧ មិនប្រយ័ត្នក៍ជ្រុលទៅបុកម៉ូតូមួយគ្រឿង ដែលបើកបរនៅលើដងផ្លូវក្នុងទិសដៅពីកើតទៅលិច រួចម៉ូតូនោះក៏រេចង្កូតទៅកៀរម៉ូតូមួយគ្រឿងទៀត បណ្ដាលឲ្យដួលរងរបួសធ្ងន់២នាក់ និងស្រាល២នាក់ ចំណែករថយន្តខូចខាតស្រាលផ្នែកខាងមុខ រីឯម៉ូតូទាំង២គ្រឿង មួយគ្រឿងខូចខាតធ្ងន់ និងមួយគ្រឿងទៀតខូចខាតស្រាល ។
ហេតុការណ៍ខាងលើនេះបានកើតឡើងកាលពីវេលាម៉ោង៤និង៤នាទីរសៀលថ្ងៃទី២៧ ខែមករា ឆ្នាំ២០២១ នៅចំណុចភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ។
សមត្ថកិច្ចជំនាញបានឲ្យដឹងថា ភាគីរថយន្តមួយគ្រឿងម៉ាកនីហ្សាន់ណាវ៉ារ៉ា ពណ៌ទឹកប្រាក់ ស៊េរីឆ្នាំ២០១៩ ពាក់ស្លាកលេខ ប៉ៃលិន ២B-៨២៨៧ បើកបរដោយឈ្មោះ ផល ណារី ភេទស្រី អាយុ៣៧ឆ្នាំ មុខរបរមេផ្ទះ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ។
សមត្ថកិច្ចជំនាញបានបន្តថា ចំណែកជនរងគ្រោះទាំង៤នាក់ដែលជិះម៉ូតូទាំង៤គ្រឿង រួមមាន ម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៨ ពាក់ស្លាកលេខ បាត់ដំបង ១AC-២១៦៩ បើកបរដោយឈ្មោះ អ៉ឹង ប៉េងឡុង ភេទប្រុស អាយុ១៥ឆ្នាំ ជាសិស្ស រស់នៅភូមិប៉ាហ៉ីត្បូង សង្កាត់ប៉ៃលិន ក្រុងប៉ៃលិន រងរបួសធ្ងន់បាក់ជើងខាងស្ដាំ និងអ្នករួមដំណើរឈ្មោះ គ្រៀង មួយគីម ភេទ ស្រី អាយុ១៥ឆ្នាំ ជាសិស្ស (របួសធ្ងន់បាក់ជើងខាងឆ្វេង) រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ។ ជនរងគ្រោះទាំងពីរនាក់ ក្រោយពីបញ្ជូនទៅមន្ទីរពេទ្យបង្អែកខេត្តប៉ៃលិន ដោយសារធ្ងន់ធ្ងរពេក ក៏បញ្ជូនបន្តទៅសង្គ្រោះនៅមន្ទីរពេទ្យខេត្តបាត់ដំបង។
រីឯម៉ូតូមួយគ្រឿងទៀតម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ប៉ៃលិន ១C-១៦៩៣ បើកបរដោយឈ្មោះ ហុក ហុងហាន ភេទប្រុស អាយុ១៧ឆ្នាំ ជាសិស្ស រស់នៅភូមិស្រង់ ឃុំស្ទឹងកាច់ ស្រុកសាលាក្រៅ របួសស្រាល និងឈ្មោះ វ៉ាង គង់ហេង ភេទប្រុស អាយុ១៧ឆ្នាំ ជាសិស្ស រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន របួសស្រាល ។
ក្រោយពីបានវាស់វែងរួច នគរបាលជំនាញនៃស្នងការខេត្តប៉ៃលិនបានយករថយន្ត និងម៉ូតូទៅរក្សាទុកនៅស្នងការដ្ឋាននគរបាលខេត្តប៉ៃលិនដើម្បីរង់ចាំការដោះស្រាយតាមនីតិវិធីច្បាប់ ៕
ចែករំលែកព័តមាននេះ