ខេត្តបាត់ដំបង៖ អ្នកបើកត្រាក់ទ័រម្នាក់រងរបួសធ្ងន់ រីឯត្រាក់ទ័រក៏រងការខូចខាតច្រើនគួរសមដែរ ដោយសារបើកភ្ជួរដីចំការ ជាន់ប៉ះចំលើគ្រាប់មីនប្រឆាំងរក្រោះ (មីនតោន) កាលពីវេលាម៉ោង១០និង២៤នាទីព្រឹថ្ងៃទី២៦ មករា នៅចំណុចភូមិស្រះចក ឃុំសន្តិភាព…
ខេត្តបាត់ដំបង៖ អ្នកបើកត្រាក់ទ័រម្នាក់រងរបួសធ្ងន់ រីឯត្រាក់ទ័រក៏រងការខូចខាតច្រើនគួរសមដែរ ដោយសារបើកភ្ជួរដីចំការ ជាន់ប៉ះចំលើគ្រាប់មីនប្រឆាំងរក្រោះ (មីនតោន) កាលពីវេលាម៉ោង១០និង២៤នាទីព្រឹថ្ងៃទី២៦ មករា នៅចំណុចភូមិស្រះចក ឃុំសន្តិភាព ស្រុកសំពៅលូន ដែលគេអះអាងថា ជាគ្រាប់មីនសេសសល់ពីសម័យសង្គ្រាម។
មន្ត្រីនគរបាលបុស្ដ៏រដ្ឋបាល ឃុំសន្តិភាព បានរាយការណ៏ថា អ្នកបើកត្រាក់ទ័រដែលគ្រាន់តែរងរបួសនោះ ឈ្មោះ ឌុល គង់ អាយុ៤៥ឆ្នាំ រស់នៅភូមិអូរកណ្ដោល ឃុំសន្តិភាព។ បុរសនេះបានស៊ីឈ្នូលបើកត្រាក់ទ័រឲ្យឈ្មោះ សន សៅ ប្រសុអាយុ៤២ឆ្នាំ នៅភូមិអូរចំណិប ឃុំតាស្ដា ស្រុកសំពៅលូន។ ជនរងគ្រោះបានជួបគ្រោះថ្នាក់ នៅពេលគាត់បើកត្រាក់ទ័រទៅភ្ជួរដីចំការនៅចំណុចខាងលើ។
បើតាមអ្នកភូមិបាននិយាយថា នៅចំណុចកើតហេតុនេះ មិនសមមានសេសស់គ្រាប់មីនប្រឆាំងរថក្រោះដ៏គ្រោះថ្នាក់បែបនេះទេ។ ព្រោះដីចំការនោះស្រលះអស់ទៅហើយ ដែលម្ចាស់ដីបានជួលឲ្យគេអាស្រ័យផលរាល់ឆ្នាំកន្លងមក។ ប្រភពដដែលបានបញ្ជាក់ថា គេបានឃើញត្រាក់ទ័រនោះបើកភ្ជួរដីចំការនោះតាំងពីព្រលឹម លុះប៉ុន្មានម៉ោងក្រោយ ស្រាប់តែស្នូរផ្ទុះលាន់កក្រើកដី។ ភ្លាមៗនោះគេមើលឃើញតែផ្សែងឃ្មូលខ្មាញ់ តែគេរាល់គ្នាបានសន្និដ្ឋានយ៉ាងច្បាស់ថា សំឡេងផ្ទុះដ៏កក្រើកនោះ ប្រាកដជាត្រាក់ទ័រជាន់មីនតោនតែម្ដង។
ប៉ុន្តែក្រោយពីផ្សែងហោះទៅលើអាកាសអស់ ស្រាប់តែលេចចេញនូវត្រាក់ទ័រ ដែលបែកកង់ក្រោយខាងស្ដាំ និង ដំបូលធ្លុះធ្លាយក្រាបក្បែររណ្ដៅគ្រាប់មីនយ៉ាងរន្ធត់ ទើបមានការភ្ញាក់ផ្អើលនាំគ្នារត់ទៅមើល និងបានឃើញអ្នកបើកបរខ្ទាតចេញពីត្រាក់ទ័រស្លប់ឈឹង ដែលមានស្នាមរងរបួសជាទម្ងន់ពេញរាងកាយ។
អធិការស្រុកសំពៅលូន លោក ពេជ្រ សារ៉ែន បានប្រាប់កោះសន្តិភាពថា បើតាមប្រវត្តិដីចំការនោះ គឺម្ចាស់ដី បានជួលឲ្យម្ចាស់ត្រាក់ទ័រធ្វើការដាំដុះពី២ទៅ៣ឆ្នាំកន្លងមកហើយ។ ម្ចាស់ត្រាក់ទ័របានភ្ជួរដីចំការនេះដាំដំឡូង ដាំពោតស្ទើររាល់ឆ្នាំ តែមិនដែលមានបញ្ហាទេ លុះពេលចុះភ្ជួរលើកនេះ បែរជាប៉ះចំគ្រាប់មីនតោនផ្ទុះបណ្ដាលឲ្យរងគ្រោះយ៉ាងធ្ងន់ធ្ងរ។ ប៉ុន្តែយ៉ាងណា លោកអធិការបានបញ្ជាក់ថា គ្រាប់មីនតោនប្រឆាំងរថក្រោះនោះ គឺ ជាកាកសំណល់សង្គ្រាម ដែលកប់នៅក្នុងដីសេសសល់ពីសម័យសង្គ្រាម។
ប្រជាពលរដ្ឋគួរតែមានការប្រុងប្រយ័ត្នផងដែរ ចំពោះទីតាំងទាំងឡាយណា ដែលគួរឲ្យសង្ស័យថា អាចមានសេសសល់នូវគ្រាប់យុទ្ធភ័ណ្ឌនានា ដែលមិនទាន់ផ្ទុះ។ ព្រោះកន្លងមក កាកសំណល់សង្គ្រាមដែលសេសសល់នៅក្នុងដីច្រើនណាស់ បានឆក់យកជីវិតប្រជាកសិករ ឬ ធ្វើឲ្យពិការ តាមរយៈការប៉ះពាល់ការដើរជាន់ ឬ បើកត្រាក់ទ័រភ្ជួរដីកិនចំលើគ្រាប់ជាដើម បើទោះជាដីចំការធ្លាប់អាស្រ័យផលរាល់ឆ្នាំក្ដី៕
ចែករំលែកព័តមាននេះ