សាលាក្រុងធ្លាប់ព្រមានផាកពិន័យ នៅតែមានអ្នកដើរបិទស្ទីកគ័រយ៉ាងអនាធិបតេយ្យ
រាជធានីភ្នំពេញ ៖ ករណីបិទផ្សាយមួយសេរី ព្រោងព្រាតពាសពេញក្រុងភ្នំពេញនេះ មិនមែនជាករណីទើបកើតមានថ្មីនោះទេ បិទស្ទីកគ័រ បូមលូ មិនថា ផ្ទះ ជញ្ជាំង…
រាជធានីភ្នំពេញ ៖ ករណីបិទផ្សាយមួយសេរី ព្រោងព្រាតពាសពេញក្រុងភ្នំពេញនេះ មិនមែនជាករណីទើបកើតមានថ្មីនោះទេ បិទស្ទីកគ័រ បូមលូ មិនថា ផ្ទះ ជញ្ជាំង…
រាជធានីភ្នំពេញ ៖ ករណីបិទផ្សាយមួយសេរី ព្រោងព្រាតពាសពេញក្រុងភ្នំពេញនេះ មិនមែនជាករណីទើបកើតមានថ្មីនោះទេ បិទស្ទីកគ័រ បូមលូ មិនថា ផ្ទះ ជញ្ជាំង របងវត្ត បង្គោលភ្លើង ដើមឈើ ប្រអប់កុងទ័រអគ្គិសនី រហូតដល់រថយន្តទៀត បានកើតឡើងរាប់សិបឆ្នាំកន្លងមកហើយ រហូតមកទល់ពេលនេះ កាន់អនាធិបតេយ្យខ្លាំងឡើងៗ ធ្វើឲ្យបាត់បង់សណ្ដាប់ធ្នាប់សាធារណៈ ប៉ះពាល់សោភ័ណភាពទីក្រុង ។
ក្រដាសដែលបិទនោះ មានដាក់លេខទូរស័ព្ទទាំងអស់ ផ្សព្វផ្សាយពីការលក់ដីថោកៗ ទទួលបញ្ចាំដែលមានការប្រាក់ទាប បង្រៀនតាមផ្ទះ សេវាប្រាក់កម្ចីមានការប្រាក់ទាប ហើយអ្វីដែលច្រើនជាងគេនោះ គឺស្ទីកគ័រ បូមលូ ។
មានប្រជាពលរដ្ឋខ្លះ ក៏បាននាំគ្នាបកក្រដាសទាំងនោះចេញដែរ ព្រោះបិទជាន់គរផ្តុំលើគ្នាឡើងក្រាស់ អាក្រក់មើលជាទីបំផុត ប៉ុន្តែអ្នកបកមិនឈ្នះ អ្នកដើរបិទទេ រំលងប៉ុន្មានថ្ងៃ វិលមករកសភាពដើមដដែល ។
ជាក់ស្តែងនៅថ្ងៃទី២៣ វិច្ឆិកា ២០២០នេះ ក៏មានបងប្អូនប្រជាពលរដ្ឋហើយ ថតរូបបានអ្នកដែលដើរបិទស្ទីកគ័រទាំងនោះ ភាគច្រើន គឺយុវវ័យក្មេងៗ ដែលម្ចាស់ឫថៅកែអាជីវកម្ម បានជួលពួកគេអោយដើរបិទគ្រប់ទិសទី ។ ដោយអ្នកដើរបិទទាំងអស់នោះ មានពាក់ម៉ាស ពាក់មួកសុវត្ថិភាព ស្ពាយកាបូប ដៃកាន់ដុំក្រដាសស្ទីកគ័រ (ក្រដាសមានជ័រកាវ) ។
មានមហាជនខ្លះលោកឆ្ងល់ថា គ្រប់ក្រដាសផ្សព្វផ្សាយទាំងនោះសុទ្ធតែដាក់លេខទូរស័ព្ទសម្រាប់ទាក់ទងទាំងអស់ ហេតុអ្វីអាជ្ញាធរមានសមត្ថកិច្ច មិនអាចធ្វើអ្វីបានក្រៅតែពីជូនដំណឹង ព្រមាន ហើយនៅតែមានអ្នកដើរបិទអនាធិបតេយ្យ នៅតាមទីសាធារណៈ កើតមានដដែល ?
សូមបញ្ជាក់ថា កាលពីថ្ងៃទី៦ កក្កដា ២០២០នេះ រដ្ឋបាលរាជធានីភ្នំពេញ បានចេញសេចក្ដីជូនដំណឹង ព្រមានពិន័យដល់គ្រប់អង្គភាព ស្ថាប័នឯកជន វិទ្យាស្ថានអប់រំ អង្គការ សមាគម និងក្រុមហ៊ុននានា ឲ្យបញ្ឈប់ជាបន្ទាន់ នូវការបិតផ្សាយបណ្ណព័ត៌មាន ការចងផ្ទាំងផ្សាយអនាធិបតេយ្យ ការចែកខិត្តប័ណ្ណផ្សេងៗ និងប្រើឧបករណ៍បំពងសំឡេង ផ្សព្វផ្សាយពាណិជ្ជកម្ម នៅតាមទីសាធារណៈ ។
ដោយសារកន្លងមក រដ្ឋបាលរាជធានីភ្នំពេញ ធ្លាប់បានធ្វើការណែនាំឲ្យបញ្ឈប់ជាច្រើនលើកហើយ ប៉ុន្តែបច្ចុប្បន្ន រដ្ឋបាលរាជធានីភ្នំពេញនៅតែ សង្កេតឃើញមានអង្គភាព ស្ថាប័នឯកជន វិទ្យាស្ថានអប់រំ ក្រុមហ៊ុននានា បន្តធ្វើការចងផ្ទាំងផ្សាយអនាធិបតេយ្យ ចែកខិត្តប័ណ្ណ តាមភ្លើងស្តុប បិតផ្សាយព័ត៌មាន ប័ណ្ណផ្សាយពាណិជ្ជកម្ម នៅតាមបង្គោលភ្លើង ដើមឈើ របងអគារសាធារណៈ របងការដ្ឋាន រមណីយ ដ្ឋាន គូរគំនូរអាហ្វីស ការប្រើប្រាស់ឧបករណ៍បំពងសំឡេង ផ្សព្វផ្សាយពាណិជ្ជកម្ម ការដង្ហែក្បួន ផ្សព្វផ្សាយផលិតផលផ្សេងៗនៅតាមរថយន្ត ម៉ូតូ រ៉ឺម៉ក និងការដាក់ឆត្រ តាមដងផ្លូវសាធារណៈចែកស៊ីមកាត ព្រមទាំងចែកខិត្តប័ណ្ណផ្សេងៗ ដែលបង្កឲ្យប៉ះពាល់យ៉ាងធ្ងន់ធ្ងរ ដល់សោភ័ណភាព សណ្ដាប់ធ្នាប់សាធារណៈ អនាម័យ និងបរិស្ថានក្នុងរាជធានីភ្នំពេញ ។
ដើម្បីរួមចំណែកលើកកម្ពស់សោភណភាព និងកិត្យានុភាពរាជធានីភ្នំពេញ រដ្ឋបាលរាជធានីភ្នំពេញ សូមជូនដំណឹងជាថ្មីម្ដងទៀត ដល់គ្រប់អង្គភាព ស្ថាប័នឯកជន វិទ្យាស្ថានអប់រំ អង្គការ សមាគម និងក្រុមហ៊ុននានា ត្រូវបញ្ឈប់ជាបន្ទាន់ នូវការចងផ្ទាំងផ្សាយអនាធិបតេយ្យ ចែកខិត្តប័ណ្ណតាមភ្លើងស្តុប បិតផ្សាយប័ណ្ណព័ត៌មាន ប័ណ្ណផ្សាយពាណិជ្ជកម្ម នៅតាមបង្គោលភ្លើង ដើមឈើ របងអគារសាធារណៈ របងការដ្ឋាន រមណីយដ្ឋាន គូរគំនូរអាហ្វីស ការប្រើប្រាស់ឧបករណ៍បំពងសំឡេង ផ្សព្វផ្សាយពាណិជ្ជកម្ម ការដង្ហែក្បួន ផ្សព្វផ្សាយផលិតផលផ្សេងៗ នៅតាមរថយន្ត ម៉ូតូ រ៉ឺម៉ក និងការដាក់ឆត្រតាមដងផ្លូវសាធារណៈចែកស៊ីមកាត ព្រមទាំងចែកខិត្តប័ណ្ណផ្សេងៗ ។ ទន្ទឹមនេះ រដ្ឋបាលរាជធានីភ្នំពេញ ស្នើឲ្យអាជ្ញាធរគ្រប់លំដាប់ថ្នាក់ ក្នុងរាជធានីភ្នំពេញ រួមទាំងរដ្ឋបាលខណ្ឌ សាលាសង្កាត់ និងនគរបាលប៉ុស្តិ៍ ត្រូវយកចិត្តទុកដាក់ សហការឃ្លាំមើល និងមានវិធានការយ៉ាងម៉ឺងម៉ាត់បំផុត ចំពោះជនដែលបានប្រព្រឹត្តនូវសកម្មភាពអវិជ្ជមានទាំងនេះ ហើយត្រូវធ្វើការអប់រំ ឬតម្រូវឲ្យចុះកិច្ចសន្យា ចំពោះមុខសមត្ថកិច្ច ឲ្យបានច្បាស់លាស់ ព្រមទាំងតម្រូវឲ្យចុះប្រមូល ឲ្យបានស្អាតនូវសម្ភារ ដែលបានបង្កឲ្យបាត់បង់សោភ័ណភាព និងរបៀបរៀបរយសង្គម ។
រដ្ឋបាលរាជធានីភ្នំពេញ គូសបញ្ជាក់ថា ក្នុងករណីមិនរាងចាល ត្រូវធ្វើការផាកពិន័យទៅតាមស្ថានទម្ងន់ទោស ដែលសាម៉ីជនបានប្រព្រឹត្ត ឬផ្អាកអាជីវកម្ម ក្នុងករណីធ្ងន់ធ្ងរ ត្រូវបញ្ជូនខ្លួនទៅតុលាការ ៕
ចែករំលែកព័តមាននេះ