តាមប្រតិទិនចន្ទគតិ នៃពិធីចូលឆ្នាំចិន ត្រូវនឹងថ្ងៃទី៣ កុម្ភៈ ឆ្នាំ២០១១ គឺជាថ្ងៃដំបូងនៃឆ្នាំថោះ ឬឆ្នាំទន្សាយ ជាឆ្នាំទី៤ ក្នុងចំណោមឆ្នាំទាំង១២មាន ជូត ឆ្លូវ ខាល ថោះ រោង ម្សាញ់ មមី មមែ វក រកា ច កុរ។ ប្រជាជនចិននៅមានជំនឿដ៏ជ្រាលជ្រៅទាក់ទិននឹងព្រះចន្ទថា ជាអាស្រមនៃសត្វទន្សាយពណ៌ស របស់ទេពធីតា «ឆាងអ័រ» និងមានពេលខ្លះបង្ហាញជាលក្ខណៈគីង្គក់កំពុងផ្សំថ្នាំដោយមានឆ្នាំងថ្នាំដាក់នៅក្បែរខ្លួន។ តាមជំនឿរបស់ជនជាតិចិនខាងលើ ទន្សាយគឺជាសត្វផ្តល់គុណប្រយោជន៍ក្នុងការព្យាបាលជំងឺ ដូចដែលយើងធ្លាប់ឃើញស្លាកសញ្ញាទំនិញ ឬឱសថបុរាណចិនភាគច្រើនប្រើរូបទន្សាយធ្វើជាពាណិជ្ជសញ្ញាសំគាល់ទំនិញរបស់ខ្លួន។
ក្រៅពីនេះទន្សាយប្រៀបដូចជាជំនាងផ្ទះបញ្ជាក់នូវពេលវេលាដ៏ល្អអធិកអធម និងមានសំណាងល្អ ប្រសិនបើប្រទះឃើញទន្សាយពណ៌ក្រហម ចាត់ទុកថាជាសិរីមង្គល។ ទន្សាយក៏មានបង្ហាញនៅក្នុងជំនឿរបស់ជនជាតិចិនផ្សេងៗទៀត ដូចជា៖
-អ៊ូ ហ្វើយ ធូ ចូវ ៖ ជាពេលវេលាឆ្លងផុតដ៏ឆាប់រហ័ស ដូចជាដំណើរនៃសត្វ «ក្អែក» ព្រះអាទិត្យ និង «ទន្សាយ» ព្រះចន្ទ។
-ជៀវ ធូ សាន គូ ៖ ជាទន្សាយឆ្លាតអាចប្រើបញ្ញាគេចខ្លួនចេញពីអ្នកតាមប្រមាញ់បានយ៉ាងងាយ។
គួរបញ្ជាក់ថា ឆ្នាំថោះ ឬទន្សាយក្នុងជំនឿរបស់ជនជាតិចិនបុរាណមានលក្ខណៈដ៏ជាក់ច្បាស់មួយ គឺ «រត់លោត»។
ដូច្នេះក្នុងឆ្នាំទន្សាយនេះ ជនជាតិចិនមានជំនឿថា ជាអំឡុងពេលវេលាដ៏ល្អដែលកើតមានការអភិវឌ្ឍន៍ដ៏ឆាប់រហ័ស និងរីកចំរើន ដោយរដ្ឋាភិបាលចិនបានបង្កើតមេដាយជាឆ្នាំទន្សាយចំនួន១.០០០មេដាយ ធ្វើពីប្រាក់សុទ្ធ១០០% ជារូបទន្សាយសំរាប់ធ្វើជានិមិត្តរូបនៃភាពថ្កុំថ្កើង និងមានចម្លាក់ជាអក្សរចិននៅមួយផ្នែកទៀតរបស់មេដាយថា «ឈៀន ឈើង វ៉ាន លី» មានន័យថា «អនាគតដ៏យូរអង្វែងម៉ឺនឆ្នាំ»៕
ចែករំលែកព័តមាននេះ