ស្រុកព្រៃនប់ ៖ បើតាមសេចក្តីរាយការណ៍បឋមបានឱ្យដឹងថា មានករណីក្មេងលង់ទឹកមួយបានកើតឡើង ខណៈពេលដើរតាមពីក្រោយឪពុកទៅមើលស្រែ ក៏ស្រាប់តែលង់ទឹកស្រែបណ្តាលឱ្យបាត់បង់ជីវិតនៅនឹងកន្លែងកើតហេតុតែម្តង បង្កឱ្យមានការភ្ញាក់ផ្អើលកាលពីវេលាម៉ោង១១និង២០នាទីព្រឹក ថ្ងៃទី១៨ ខែសីហា ឆ្នាំ២០២០ នៅចំណុចភូមិជំពូខ្មៅ ឃុំទួលទទឹង ស្រុកព្រៃនប់ ខេត្តព្រះសីហនុ ។
សេចក្តីរាយការណ៍បន្តថា ជនរងគ្រោះមានឈ្មោះ សុខា រតនៈ ភេទប្រុស អាយុ២ឆ្នាំ ស្នាក់នៅភូមិ-ឃុំកើតហេតុខាងលើ។
បើស្តាប់តាមការរៀបរាប់របស់ស្ត្រីឈ្មោះ ណន សុភ័ក្ត្រ អាយុ៣០ឆ្នាំ ត្រូវជាម្តាយក្មេងប្រុសរងគ្រោះ បានអោយដឹងថា កូនរបស់ខ្លួនបានដើរតាមពីក្រោយឪពុកទៅមើលស្រែនៅខាងក្រោយផ្ទះ ប៉ុន្តែឪពុកមិនបានដឹងខ្លួនថា កូនដើរពីក្រោយនោះទេ លុះនៅពេលដែលបាត់កូនយូរពេក ក៏បាននាំគ្នាដើររកកូន ក៏ស្រាប់តែប្រទះឃើញកូនលង់ទឹកបាត់ទៅហើយ។
ក្រោយពេលកើតហេតុ សមត្ថកិច្ចបានចុះពិនិត្យសពជនរងគ្រោះ ក្រោយពីពិនិត្យរួច ក៏ប្រគល់សពជូនក្រុមគ្រួសារដើម្បីយកមកធ្វើបុណ្យតាមប្រពៃណី ។
ចែករំលែកព័តមាននេះ